Lesbók09.01.02 — Enter

Æ, nú dámar mér ekki. Æææ, mér dámar ekki neitt. Ég bregð mér af bæ - kaupi kaffi og með því og ber það í byl og gaddi aftur á skrifstofu ritstjórnar Baggalúts, því ég er ljúfmenni og ber umhyggju fyrir starfsfélögum mínum. Keypti meir að segja napóleonshatta.
En hvað bíður mín í skuggum þegar ég sný við? - uppréttar hendur krepptar um rýtingsskepti. Ég er stunginn og felldur í gólfið um leið og ég legg frá mér kaffirjómann.

Minn ágæti félagi "Dr." Númi Fannsker fer um með gassagangi og subbuskap í nýjum pistli og ræðst á góðan dreng, ljúfling og heiðursmann - Egil Helgason.

Ég gæti - en geri ekki - farið öðrum orðum um annan pistil sem birtist hér á síðum. Sá er ekki svara verður, skrifaður af rústrauðri hugsýn Fannars Fannsker, sonar Núma. Ég læt það dapra níð liggja milli hluta, enda höfundur vanviti.
Núma hefði ég þó ekki trúað til slíkra skrifa - bjakk.

Fannskerið ræðst með eggjum og galli á Egil, sem ekki hefur annað unnið til saka en skafa eilítinn mosa af legsteini þjóðskjalavörðunnar Halldórs Guðjónssonar. Hann leyfði sér í tilefni aldarafmælis þessarar meintu fánastangar okkar Íslendinga að þrífa flaggið og draga það í svo sem eins og hálfa stöng.
Hann leyfði sér og þann munað að lesa eins og eina tvær bækur skáldsins - stalst til að gjóa augum yfir skrifin sem annars standa óhreyfð, ósnertanleg í hillum, greyptar í gull. Jú, Númi Fannsker, Egill er læs - hann kann alla stafina og hefur um skeið getað raðað þeim saman - ólíkt sumum.
Sjálfum er mér ekki í nöp við Halldór sem rithöfund, ég reyti ekki í mig það sem ég þekki ekki. Hann krotaði jú einhver ósköp niður og fékk gefið út - en ég hef ekki séð þau skrif, og legg mig ekki fram við að leita þeirra. Ég hef nóg að lesa.

Á annan bóg hef ég séð margar myndir af Halldóri, heyrt hann gaspra andstuttan í útvarp og séð til hans pokabuxnaklæddan í sjónvarpi. Hann kom mér alla tíð fyrir sjónir sem uppskafningur, pervisinn spjátrungur.
Ekki komu skrif Egils um meintan stalínisma og yfirlæti mér á óvart. Mér er reyndar til efs að maður með slíkt höfuðlag og Halldór hafi viljað neinum manni gott - og ekki bar sprettan á efri vör með sér náungakærleik.

Ég veit að Egill Helgason er góður maður, hann hefur ásjónu engils og vaxtarlag góðkynja æxlis. Hann er ef til vill ekki óskeikull í dómum sínum, en hann er réttlátur. Ef hann segir að Halldór Guðjónsson sé asni þá er Halldór Guðjónsson asni.

Góðar stundir Númi minn.

 
Enter — Sálmur
 
Enter — Dagbók
 
Númi Fannsker — Dagbók
 
Númi Fannsker — Dagbók
 
Númi Fannsker — Forystugrein
 
Enter — Forystugrein
 
Spesi — Forystugrein
 
Spesi — Sálmur
 
Fannar Númason Fannsker — Forystugrein
 
Enter — Sálmur
 
        1, 2, 3 ... 172, 173, 174 ... 180, 181, 182