Spesi

Ávallt er það sönn og einlæg ánægja fyrir okkar litla land þegar okkur heimsækja heimsfrægir listamenn til að lyfta andanum og næra sálina með tónlistaflutningi sínum. Mikið verk hefur verið unnið hér á landi við að flytja inn alls kyns graðhesta sem flytja það sem kallað er rock'n roll og má nefna því til stuðnings ýmsar hátíðir sem haldnar hafa verið að undanförnu, en þar má líta óalandi og óferjandi táninga í annarlegu ástandi stíga trylltan dans við þau óhljóð sem ribbaldarnir ákveða að framleiða hverju sinni. Á hinn bóginn hefur hin sanna tónlist, sem ýmist er af illgirni uppnefnd sígild eða alvarleg, ítrekað beðið lægri hlut fyrir rockinu þegar til þess kemur að flytja inn listamenn erlendis frá. Lengi hef ég beðið þess að úr þessu rætist, setið í stofu minni gnístandi tönnum og gráti nærri yfir hlutskipti mínu og annarra listhneigðra Íslendinga og látið mér nægja að sitja þolinmóður tónleika okkar annars ágætu sinfóníuhljómsveitar.

En viti menn! Nú virðist sem metnaðarfullir tónleikahaldarar séu loks að taka við sér. Til marks um það var stórkostlegum erlendum listamanni nýlega boðið að halda tónleika hér á landi. Er þar um að ræða hið einstaka tónskáld og söngkonu ungfrú Bjork sem kom hingað til lands alla leið frá hinu þekkta heimsveldi Englandi til að flytja tónlist við undirleik Sinfóníuhljómsveitar Íslands.Sem listunnandi gat ég vitaskuld ekki látið mig vanta á viðburð sem þennan og sótti því þessa tónleika fullu eftirvæntingar.
Og hvílíkir tónleikar! Með ungfrú Bjork í för voru tveir einkar magnaðir amérískir framúrstefnulistamenn, hörpuleikari, inúítasöngkona og grænlenskur stúlknakór. Saman magnaði þessi fölþjóðlegi hópur einstakan seið sem töfraði áheyrendur alla svo um munaði.

Ekki ætla ég að hætta mér út í greiningu á tónlist þeirri sem þarna var flutt, til þess starfa eru kallaðir menn sem mér eru mun hæfari. Aðeins vil ég að lokum minnast á eitt atriði varðandi flutninginn, en það snýr að texta sönglaganna.Við nokkur laganna flutti ungfrú Bjork nefnilega íslenskan texta, en það er nokkuð sem ég hefi aldrei heyrt erlendan listamann gera áður. Vakti þetta töluverða undrun mína, en einnig aðdáun, því augljóst er að hún hefur lagt mikla vinnu í þýðingu textanna úr engilsaxnesku. Þegar síðan kom að lagi er nefnist Akkerislagið - en í texta þess kemur fyrir setningin "Hér á ég heima" - varð mér þetta ljóst: Ungfrú Bjork vill flytjast til Íslands og einnig flytja ríkisfang sitt hingað! Þessi uppgötvun varð til þess að stífla mín brast og ég felldi tár sem barn væri og það skammlaust innan um fullan sal af fólki.

Í kjölfar vitrunar minnar vil ég segja eitt við ráðamenn íslensku þjóðarinnar: Komið er að yður að leggja yðar að mörkum til að draumur þessa stórkostlega listamanns verði að veruleika. Ungfrú Björk hefur gert drauma sína ljósa á alþjóðavettvangi og nú kemur í okkar hlut að sjá til þess að þeir rætist. Hér á hún heima!