Lesbók18.12.01 — Enter

Já Rauðhetta leynist víða.

Er það sem ég sjái nú rauðum bjarma stafa af síðum mín elskaða Baggalúts? Er það sem ég heyri litla roðamaura skríða hér með veggjum og eitra þræði þessa unaðsvefs og yndislundar? Og hví spyr ég? Jú - mér varð það á að lesa skrif míns ágæta kollega, Doktors H. H. FritzHerberts um það sem mér var - af fávísi máske, og jafnvel kreddudýrkun - kennt að kalla Guðs útvalda land. Já ég las á Baggalúti grein manns, sem ég trúði að væri ljós í huga og skarpgreindur, persónu sem ég virti sem bróður - góðs drengs sem á tíðum spilar fallega knattspyrnu

En nú er minn góði félagi búinn að flækja sig í rauðum dregli stalínismans - hann hefur fengið ofbirtu í viðkvæm augu sín af dvöl sinni í landi lenínistans roða-Blairs, þar sem vinstri öfgamenn ráða ríkjum og sýra huga heiðvirðra og sæmilega greindra pilta með silfraðri skrúðmælgi hins sannfærða Marxista.

Já minn kæri doktor, þú dregur Ísraelsríki - helgast allra - niður í þinn eigin þrönggirta forarpytt þar sem blinduð svín æða um og gleypa allt sem tönn á festir og hægt er að kjamsa á með tálguðum skoltum - leika við með klofnum tungum. Hver ert þú að dæma erkiengilinn Aríel, sem úthlutað er á æðsta degi sæti við hlið drottins - afburðamanns sem skynjar heilagleika - og mikilvægi - guðs ríkis, betur en þú hendir reiður á breskum sóðakrám og keldum?

Vita skaltu minn vísi doktor; að leiðarlokum munu villihrútar af þínu sauðahúsi hlaupa um slétturnar hundeltir af heilögum eldi - og þá munu ykkar rauðu kver og fúlskeggjuðu skurðgoð mega sín lítils gegn innblásnum herjum engilsins Aríels. Þið skuluð troðnir í það svað sem ykkur ber, þann sorphaug sem þið hafið skapað ykkur með ofurtrú á lítilfjörlega, mannlega getu.

Við erum maðkar minn góði FritzHerbert, það eina sem við megnum gegnum okkar stuttu jarðarpínu er að skríða - fet fyrir fet í rétta átt, í átt að ljósi og yl, - ekki rauðum logum vítis.

 
Enter — Forystugrein
 
Enter — Forystugrein
 
Enter — Sálmur
 
Númi Fannsker — Forystugrein
 
Enter — Sálmur
 
Spesi — Forystugrein
 
Númi Fannsker — Forystugrein
 
Enter — Forystugrein
 
Enter — Forystugrein
 
     1, 2, 3 ... 180, 181, 182