Baggalútur

Sálmur – Enter

Þetta er gamall kvæðisstubbur sem ég jós útúr mér eftir að ég andaði að mér helíumi úr forláta gasblöðru sem mér áskotnaðist á einni af fjölmörgum útihátíðum þessa góða lands.

í dögun fær þrællinn að dúra
í dögun þarf fjallkonan ekki að skúra
að morgni má maðkurinn blunda
að morgni skal fátt nema gjálífi stunda

já, í býtið fær eyminginn óhindrað tjáð
allt sem hann þráir að segja

en hinn - þá er réttast að þegja!

30/4/02

Fréttir

Enter – 23/5/13

Ný ríkisstjórn verður í háskerpu

Enter – 21/5/13

Kolbeini kapteini meinaður aðgangur að kommentakerfum

Enter – 20/5/13

Paul McCartney semur fyrir Brúðubílinn

Enter – 18/5/13

Norður–Kórea lýsir yfir sigri í Eurovision

Númi Fannsker – 16/5/13

Búin að eyða endurgreiðslunni

Útgáfa

Lesbók frá fyrri tíð

Göngubrýr

Nú rísa þær líkt og nýburstaðir hvalsgómar úr mýrinni, hlykkjast úr sandhrúgunum sem silfurslegnir sullaormar og þruma yfir ilmandi malbikinu — göngubrýrnar. Spánnýju fínu göngubrýrnar okkar — tilbúnar að ferja alla heimsins erfðafræðinga, stúdenta og mýrarlalla yfir nýbakaða Hringbrautina.

Fínu, fínu göngubrýrnar okkar. Fínu, löngu göngubrýrnar okkar.

Löngu, löngu göngubrýrnar okkar.

Hvenær ætla þessir blessuðu skipulagshrottar okkar að læra? Það á ekkinokkur kjaftur eftir að nenna að paufast yfir þessar spírallanglokur. Frekar freista menn gæfunnar á valhoppi yfir þessar sextán akreinar eða hvað hún nú verður blessuð litla Hringbrautin, fremur en að villast upp þessar hringsóluðu lönguvitleysur.

Hefði það riðið listrænum metnaði og fagurfræðilegri meðvitund borgaryfirvalda að fullu að leggja grefils spangirnar beinar yfir slóðaskufsann? Varla.

Ojæja, þessi þunnildi eru máske ekki alill. Það má efalítið grípa með sér þoturass þarna uppeftir næsta vetur og fá sér nokkrar salíbunur.

Enter 3/5/05