Lesbók06.12.01 — Enter

"Það var svo sem auðvitað," segir aftan á góðri bók. Enn á ný gengur íslenska menningarjarðýtan fram hjá Baggalúti á svívirðilegan og móðgandi hátt. Í vikunni var tilkynnt hverjir væru tilnefndir til íslensku bókmenntaverðlaunanna - ekki það að þau verðlaun séu beysin að burðum né sérstök upphefð á alþjóðlegan mælikvarða, en þau eru þó klapp á öxl, kankvíst bros og vottur um að vel sé gert.

Mér er mál, ég get ekki tvístigið lengur kringum þessa óhæfu, þennan skandal sem enn hefur riðið yfir þjóðina. Á meðan Baggalútur heldur uppi kraftmikilli, uppfræðandi og glaðlegri útgáfustefnu - hljóta undirmálsmenn og niðurrifsseggir viðurkenningu fyrir klaufalega orðuð og klasturslega uppsett ritgerðakorn, sem þeir leyfa sér að kalla bækur. Svei því!!!

Leyfið mér að rýna í lið þessara okkar upptendruðu riddara og fánabera íslenskrar tungu: Í flokki "fagurbókmennta" voru tilnefndar bækurnar 'Gæludýrin', tilgerðalegt væmnirit um lítinn dreng og hamstur; 'Höfundur Íslands', sykurhúðuð og flaustursleg lofræða um Gylfa Ægisson og verk hans; 'Ljóð tíma leið', sjálfsævisögulegt afspyrnuleiðindasamsull um skrifblint skáld; 'Sólskinsrútan', hörmungarskrif um fararstjórn; og loks 'Yfir Ebrofljótið', illa ígrunduð og daunill hugvekja um ferð engisprettu yfir drullupoll. - Er þetta hægt?
Í flokki "fræðirita": 'Björg', tilgerðarlegt yfirlitsrit um íslenskar fingurbjargir; 'Höfundar Njálu', tafskennd nöldurúttekt á einhverri gamallri skræðu; 'Íslenskar eldstöðvar', útþynnt upptalning á eldhúsáhöldum, (ekki í stafrófsröð); 'Konan í köflótta stólnum', ólæsilegt hrafl um konu í köflóttum stól; og að endingu 'Uppgjör við umheiminn', gersamlega mislukkað æviágrip Hitlers, ætlað börnum.

Er von að mér sé orða vant, þegar slíkt hnoð og krass er viðurkennt sem rjómalag íslenskra bókmennta árið 2001. Ég er forviða, hlessa og ekki er laust við að bér sé bumbult. Baggalútur hefur verið svívirtur, sniðgenginn - "liggur í götunni lávarður heims". Góðir landar - leigið spólu.

 
Enter — Forystugrein
 
Enter — Forystugrein
 
Enter — Sálmur
 
Númi Fannsker — Forystugrein
 
Enter — Sálmur
 
Spesi — Forystugrein
 
Númi Fannsker — Forystugrein
 
Enter — Forystugrein
 
Enter — Forystugrein
 
     1, 2, 3 ... 180, 181, 182