Ég vil koma því á framfæri á þessum vettvangi að ég lýsi yfir fullum stuðningi við rassinn á henni Kim Kardashian.

Það þarf djörfung til að þora að stíga fram með þessum hætti og gangast við afturenda sem þessum. Það hefðu ekki allir gert. Kim kemur mér fyrir sjónir sem einstaklega vönduð og heiðarleg manneskja. Hún er óhrædd að koma til dyra eins og hún er klædd og þekkir sín takmörk betur en flestir. Hún þorir að „tala með rassgatinu“ eins og það er orðað. Fyrir það á hún skilið bæði virðingu og hrós.

Nú tekur hún afleiðingum gjörða sinna og sagan ein mun leiða það í ljós hvort um mistök hafi verið að ræða. Ég kýs þó að trúa því að hún Kim láti ekki mótlæti og öfundarraddir stöðva sig og komi tvíefld aftur til leiks síðar. Hún nýt­ur í það minnsta óskoraðs trausts frá mér og ég finn það í kringum mig að það er breiður stuðningur við hana og hennar stórfenglega bakhluta, sem er engum líkur og sannarlega einstakur í sinni röð í heiminum.

Gangi þér vel Kim mín. Öll él birtir upp um síðir … you’ll be back!

Með vinsemd og virðingu,
þinn elskandi Enter.