Formansslagur sjálfstæðisflokks stendur fyrir dyrum.
Þetta er reyndar fremur átakalítill slagur, eiginlega bara svona vinsamlegur gannislagur – sem endar snarlega ef hárgreiðsla annars frambjóðandans á það á hættu að aflagast. Eða ef annar hvor sýnir merki um að fara hugsanlega að gráta.
Þau eru nefnilega viðkvæm, blómin bláu, sem bjóða sig fram. Tveir undurfagrir nýútsprungnir knappar af sama stilknum. Vökvuð og nærð af sama fólkinu, sprottin úr sömu moldinni, dekstruð af sömu höndum, knúin sömu hvísluðu orðunum.
Þetta er í raun dálítið eins og að velja réttan borðdúk fyrir matarboð. Þetta snýst aðallega um sjatteringu. Hvort passar betur tilefninu – servíettunum og stellinu. Hvort kunna gestirnir betur að meta, ljós- eða dökkblátt?
En auðvitað snýst þetta allt um einmitt það. Réttu sjatteringuna. Allt þarf jú að líta óaðfinnanlega út, áður en veislan getur hafist að nýju.
140 milljónir? Er það allt?
Eru 140 milljónir virkilega allt það sem ríkisstjórn Íslands getur séð af til sauðfjárbænda, eftir allt sem á undan er gengið? Er ríkisstjórnin búin að gleyma hverjir það eru sem hafa haldið lífinu í Íslendingum síðustu aldirnar?
Þessi smánarlega ölmusa er auðvitað hneisa og til skammar fyrir alla þjóðina. Og það er líka til skammar þegar menn tala um að sauðfjárbændur (sem og aðrir bændur) eigi að "framleiða fyrir markaðinn" og halda því fram að ef þeir geti ekki selt framleiðsluvörur sínar eigi þeir "bara að fara á hausinn".
Sauðfjárbændur eiga að framleiða kjötið, ekki markaðssetja það! Það er ríkisstjórnin sem á að sjá til þess að það sé markaður fyrir framleiðsluvörur íslenskra bænda, því það er þjóðinni allri til hagsbóta.
En ríkisstjórnin sinnir ekki þeirri skyldu sinni. Þvert á móti hleypir hún allskyns staðgönguvörum kindakjöts inn í landið með allt of lágum tollum og vörugjöldum og horfir aðgerðalaus á neysluvenjur þjóðarinnar breytast í átt að 100% skyndibita- og pizzuáti.
140 milljónir. Gjöriði svo vel. Og svo getiði bara flutt í bæinn og pantað ykkur Dómínós.
» Sálmar | » Gagnrýni | » Sögur | » Leikrit | » Siðir | » Heimsljós
