Í morgun las ég um að ætlunin er að halda hátíðina Bears on Ice hér á landi í september. Þar koma saman karlmenn frá ýmsum löndum, sem eiga það sameiginlegt að vera dálítið „bangsalegir“ í útliti og atgervi; stórir snyrtilegir og blíðgeðja menn, oftar en ekki hændir að leðri - með mikinn og óbeislaðan hárvöxt víðast hvar nema á höfði. Svokallaðir dúllubangsar.

Ég hugsaði til þess með hryllingi hvað gerist þegar þessir glaðlyndu, loðnu bangsastrákar stíga hér á land til að njóta innilegra en jafnframt karlmannlegra samverustunda á Íslandi. Grilla saman, borða saman og dúllubossast saman í heitum hveralaugum og köldum verslunarkjörnum.

Ætli þess verði langt að bíða að sturlaðar skyttur, blindaðar af heift og blóðþorsta fari á stjá og reyni að koma þessum blíðu verum fyrir kattarnef, rétt eins og öðrum ráðvilltum bjarndýrum sem hingað villast með opnum hug í leit að frelsi.