Baggalútur

Forystugrein – Enter

Kaup og kjör hinna vinnandi og hinna minna vinnandi stétta

Enter

Nú eru löggumenn snaróðir yfir lélegu kaupi og bágum kjörum. Þar áður voru það bandsturlaðir leikskólakennarar. Það þykir mér miður. Þetta eru jú þær tvær stéttir manna, auk öskukarla- og kerlinga, sem ég vil að líði sem best í sínu starfi – til að geta sinnt því (og mér) af þeirri alúð sem þörf krefur hverju sinni.

Verri þykir mér þó þögnin hjá öðrum og óþarfari stéttum. Af hverju eru lögfræðingalufsurnar ekki brjálaðar yfir sínum kjörum? Eða bankasnúðarnir? Nú eða allar millistjórnendadulurnar? Og forstýringahimpigimpin?

Mikið liði mér betur ef það yfirlaunaða hyski neyddist til að rotta sig blánefjað saman á götuhornum til að heimta betri kjör. Öskuþreifandi saltvondir bankabéusar og dindilóðar dragtklæddar skilanefndaskvísur. Það væri indælt. Þá liði mér eins og eitthvað réttlæti væri hugsanlega til í henni veröld.

En neibbs, það viðist ekki þörf á því. Því er nú miður og verr.

Sem bendir til að viðkomandi þjóðsugur séu bara nokkuð sáttar við sinn hlut. Sem er eiginlega bara ansi hreint fimbulflennifokking skítt.

24/9/11

Fréttir

Enter – 3/6/13

Sumarfrí Baggalúts 2013

Númi Fannsker – 28/5/13

Margrét Þórhildur komin á stjá

Enter – 27/5/13

Ófrægingarbúðir Vigdísar Hauksdóttir fundnar

Enter – 23/5/13

Ný ríkisstjórn verður í háskerpu

Enter – 21/5/13

Kolbeini kapteini meinaður aðgangur að kommentakerfum

Útgáfa

Lesbók frá fyrri tíð

Lítil lexía

Á leikskóla lærði ég ágæta lexíu, hún er auðlærð og almenn og hljóðar svo - "það er ljótt að stela dóti af óvitum".

Það gildir einu þó óvitinn sé búinn að sanka að sér öllu dótinu úr sandkassanum, dóti sem hann með brögðum og brellum hefur vélað af okkur hinum - og sitji gírugur með sandfyllt vit og leyfi engum að leika með.

Maður tekur ekki af honum dótið. Það er bannað.

Það er alveg sama þó ég safni öllum mínum fylgismönnum saman uppi við rólurnar og telji þeim af eldmóði trú um að óvitinn í sandkassanum hafi ekkert með allt dótið að gera.

Og það er alveg sama þó við í góðum ásetningi fylkjum liði að óvitanum, hrindum honum úr kassanum - og skiptum síðan góssinu bróðurlega milli okkar.

Því eitt lærði ég á leikskólanum - af biturri reynslu.

Ef maður nefnilega tekur dót af óvitum, séstaklega ríkum óvitum - þá standa þeir einfaldlega á fætur, ganga síðan í makindum í burtu, með tárvot augu - og klaga.

Og það er nefnilega þannig, þegar allt kemur til alls, að þó við dverghertogarnir ráðum leikvellinum þegar enginn sér til - þá ráða fóstrurnar meiru. Og þær fylgja reglunum.

Enter 27/4/04