Ég hef tamið mér allt að því ófrávíkjanlega reglu í samskiptum mínum við ofurfrægar hollívúddstjörnur.
Ég læt þær algerlega í friði, svo lengi sem þær abbast ekki upp á mig af fyrra bragði, heimta mynd af sér með mér, nú eða grátbiðja mig um að krota á brjóstin á sér.
Þetta á við um allar ofurfrægar amerískar stjörnur, að undanskilinni Barbru Streisand, hana áskil ég mér fullan rétt til að slefa yfir, ónáða og knúskaffæra, hvar sem ég kemst í tæri við hana.
Eins og fuglinn Fönix rís Baggalútur nú úr ösku, endurnærður og fær í flestan sjó. Sannleikurinn hefir ekki legið í dvala þó Baggalútur hafi nú um nokkurt skeið haldið sig til hlés í þjóðmálaumræðunni og safnað kröftum - hann er enn þarna úti og ritstjórn Baggalúts hefir ekki setið auðum höndum og borað í nef sér í fríinu, því fer víðs fjarri.
Baggalútur snýr aftur með breyttu sniði, notendum til hægðarauka. Má í því sambandi einkum nefna byltingu á möguleikum gesta Baggalúts til að láta til sín taka í umræðum - auk þess sem allt efni vefsins er aðgengilegra og hressilegar fram sett en hingað til. Einnig ber að nefna að fréttir birtast nú ekki í heild sinni á forsíðu (nema nýjasta frétt), heldur hefur verið hönnuð sérstök fréttasíða þar sem boðið er upp á fjölda valmöguleika við fréttaskoðun.
Við vonum sannarlega að gestir vefsins kunni að meta breytingarnar og hlökkum til að rifja upp gömul kynni.
» Sálmar | » Gagnrýni | » Sögur | » Leikrit | » Siðir | » Heimsljós
