Voðalegur endemis vandræðagangur er á þessu Hagkaupsnafni. Nýverið var lagt svo á og mælt um að það skyldi einvörðungu notað í eintölu - og beygði sig þar af leiðandi umyrðalaust undir þágufallið óþjála Hagkaupi. Um leið var fleirtölunni Hagkaupum fleytt út í hafsauga – og enginn skyldi framar dirfast að kaupa sér klósettpappír, kakíbuxur og kíví í Hagkaupum.
Gott og vel.
En nú er bersýnilega búið að gleyma öllum fögrum fyrirheitum og loka óhreina i-ið inni á einhverjum lagernum með ótíndum rúsínum og rófum - því allt mögulegt er skyndilega farið að fást í Hagkaup, óbeygðu og eintöldu.
Þessi hringlandi er hreint með ólíkindum. Og er svosum ekki bundið við þessa tilteknu nýlenduvöruverslun. Ég segi það því enn og aftur; ef íslensk flennifyrirtæki geta ekki skammast til að sætta sig við fjóreina birtingarmynd nafna sinna þá geta þau bara haldið sig annars staðar - á einfaldari málsvæðum.
Og hvað gerist svo ef Samkaupum-Úrvali og Hagkaupi hugkvæmist að sameina krafta sína? Er þá hætta á að það myndist málfræðilegt svarthol sem sogar allt málkerfið inn í sig?
Á nú endalaust að níðast á blessuðum farandverkamönnunum við Káranhjúka sem þar híma í eymd og volæði, rennblautir í fæturna, sundurkramdir á sál og líkama - illa til reika?!
Hvað gerir einmana farandverkamaður á jólum - aleinn og gegnkaldur á sprengfreðnum hjara veraldar? Ekki fær hann að berja augum strípimeyjar eða drýgja dulítið hór með tápmiklum meyjum austurlenskum - onei. Og hann fær ekki lengur að ylja sér við glóð af sígarettu og dulítið tár af viskuvatni, hann má ekki einu sinni baka litla hassskúffuköku á afmælisdaginn sinn til að gleðja vinnufélagana! Svei!
Við borgum þessum greyjum lúsarlaun - langt undir lágmarkslaunum og kroppum svo þær fáu krónur sem þeir þó fá af þeim fyrir að vilja gera sér glaðan dag í helvíti Kárahnjúka!
Já svei! Þótt þetta séu skynlitlar skepnur er óþarfi að níðast á þeim til að fullnægja sínum sjúklegu kenndum!
Ég er hræddur um að hljóð heyrðist úr horni ef vinir okkar í húsdýragarðinum hættu að fóðra svínin yfir háveturinn!
Iss!
» Sálmar | » Gagnrýni | » Sögur | » Leikrit | » Siðir | » Heimsljós
