Voðalegur endemis vandræðagangur er á þessu Hagkaupsnafni. Nýverið var lagt svo á og mælt um að það skyldi einvörðungu notað í eintölu - og beygði sig þar af leiðandi umyrðalaust undir þágufallið óþjála Hagkaupi. Um leið var fleirtölunni Hagkaupum fleytt út í hafsauga – og enginn skyldi framar dirfast að kaupa sér klósettpappír, kakíbuxur og kíví í Hagkaupum.
Gott og vel.
En nú er bersýnilega búið að gleyma öllum fögrum fyrirheitum og loka óhreina i-ið inni á einhverjum lagernum með ótíndum rúsínum og rófum - því allt mögulegt er skyndilega farið að fást í Hagkaup, óbeygðu og eintöldu.
Þessi hringlandi er hreint með ólíkindum. Og er svosum ekki bundið við þessa tilteknu nýlenduvöruverslun. Ég segi það því enn og aftur; ef íslensk flennifyrirtæki geta ekki skammast til að sætta sig við fjóreina birtingarmynd nafna sinna þá geta þau bara haldið sig annars staðar - á einfaldari málsvæðum.
Og hvað gerist svo ef Samkaupum-Úrvali og Hagkaupi hugkvæmist að sameina krafta sína? Er þá hætta á að það myndist málfræðilegt svarthol sem sogar allt málkerfið inn í sig?
Hananú!
Nú er komið í ljós að íslenska sauðkindin, þessi lufsulega lopaskækja, þetta óhrjálega landlýti, lætur sér ekki nægja að níðast á gróðri og úða í sig nýgræðlingum.
Nei. Hún hefur nú verið staðin að því að slafra í sig eggjum! Úti á víðavangi.
Það er því ekki nóg með að þetta bragðfúla sníkjudýr haldi landinu jafn berangurslegu og gróðurlausu eins fituskertu fitnessklofi — heldur er þetta óæta óféti nú líka að hafa af okkur fuglalífið.
Ég sé þessi skjálgeygðu kvikindi fyrir mér, sötrandi óharðnaða eggjarauðu, bryðjandi skurn og jórtrandi á ófleygum ungum — eins og ekkert sé sjálfsagðara, meðan örvinglaðar mæður flögra allt um kring.
Það kæmi mér ekki á óvart að þessi samviskulausi hreiðurspillir hafi étið upp rjúpnastofninn einn og óstuddur. Útrýmt vaðfuglinum, sötrað upp súluna, smjattað á smyrlinum og kjamsað bæði á kríum og kjóum.
Ólukkans aðskotaófreskjur.
Hvenær á að gera þessar rottur hálendisins brottrækar af landinu? Með þeim skít og þeirri skömm sem þeim ber?
» Sálmar | » Gagnrýni | » Sögur | » Leikrit | » Siðir | » Heimsljós
