Jæja. Nú hefur samfélagsrýnirinn, mannvinurinn og listaskáldið (EKKI) Enter séð sig knúinn til að lauma trélími í kaffimálið mitt. Ég hefi hann líka sterklega grunaðan um að standa á bak við röð teiknibóluhryðjuverka í stólnum mínum. Og afhverju? Jú, vegna þess að ég dirfðist að andmæla þeirri fráleitu bábilju að skemmtikrafturinn, gullafmaðurinn og heilagmennið Sting væri leiðinlegur. Sem vísindalegar rannsóknir sýna að er í raun og sann óhemju skemmtilegur.

Þarna sýnir sokkaleistaskáldið sitt rétta andlit og eðli. Þær eru nefnilega ófáar húfurnar sem Enter hefur stolið af mér (og fleirum), ófáar buxurnar sem hann hefur bleytt (nú síðast tveimur mínútum fyrir opnunarræðu mína á samnorrænu fuglaskoðunarþingi í Bergen) og ófá „fantabrögðin,“ sem hann hefur þurft að „kenna mér.“

Þetta finnst lattelepjunni Enter „skemmtilegt.“ Já þetta er voða skemmtilegt.

Hvernig bragðaðist annars „rækjusamlokan,“ Enter? Kannaðistu nokkuð við bragðið af skallameðalinu þínu?