Í frétt hins sjálfumglaða „frétta-“ og athafnamanns Enters (ef það er þá hans rétta nafn), hér á Baggalúti kemur fram að hljómlistarsnillingurinn og jóginn Sting hafi lengi verið talinn með leiðinlegustu fyrirbærum veraldar. Þetta er rangt.
Sting er nefnilega, skv. rannsóknum sem Evrópusambandið, Sameinuðu þjóðirnar, OECD, ESA og fleiri óháðir aðilar hafa gert, líklega einn merkilegasti, skemmtilegasti og fallegasti maður sögunnar. Þar trónir hann efstur meðal jafningja á borð við Jesú Krist, Móður Theresu og Ghandi.
Er það tilviljun að UNESCO hefur undanfarin 30 ár stefnt að því að koma Sting á heimsminjaskrá? Er það tilviljun að Nelson Mandela segir Sting vera fyrirmynd sína í lífinu? Er það tilviljun að í Thailandi eru ellefu musteri þar sem Sting er dýrkaður eins og guð? Ég segi nei.
Ég segi: Leirhnoðarinn, puttasleikjan og partígítarfúskarinn Enter ætti að líta sér nær þegar kemur að stjarnfræðilegum leiðindum. Spegill! Enter. Spegill!
NEI!
Hvaða frostskemmda fiðurhænsn fékk þá firru í höfuðið að Orlando Bloom geti leikið James Bond?
Hann er máski voða krúttlegur í sokkabuxum, með gullslegnu hárkolluna sína og stóra fína bogann. En hamingjan forði okkur frá því að horfa upp á þennan spóleggjaða blómálf panta sér Cosmo á barnum og fara að klípa Q í rassinn.
Til allrar hamingju er ekki búið að fá leyfi hjá foreldrunum til að fastráða krakkakvikindið - en ekki eru aðrir kostir sem nefndir hafa verið skárri. Kollvikadvergurinn Jude Law, ballettdansmærin Hugh Jackman og barnastjarnan Christian Bale.
Svei því.
Vilja þessir apar ekki bara ráða Angelinu Jolie í djobbið, fyrst þeir eru svona staðráðnir í að ráða kellingu? - hún er þó allavega með stór brjóst.
» Sálmar | » Gagnrýni | » Sögur | » Leikrit | » Siðir | » Heimsljós
