Enter

Bittinú. Þá hafa krúttlegu ljósfælnu sortuæxlin sem dafna í myrkviðum Landbankans sent frá sér yfirlýsingu þar sem þau kvarta sáran yfir því að verið sé að pönkast í Halldóri Ásgrímssyni nokkrum vegna meints afláts innan bankakerfisins.

Þeim finnst hann nefnilega ekki eiga líða fyrir afskipti sín af stjórnmálum.

Það er nefnilega það.

Nú veit ég ekki fyllilega hvaða málskilning þessir bankasvartálfar þarna hafa tamið sér í einverunni en ég hefði fjandakornið haldið að Halldór þessi hafi haft örlítið meira en afskipti af íslenskum stjórnmálum.

Einhver gæti sagt að hann hefði beinlínis haft lúkur og limi á bólakafi í öllum glufum íslenskra stjórnmála í rúma þrjá áratugi.

Og ef minnið svíkur mig ekki var hann einmitt herraráð sjávarútvegs bróðurpart 9. áratugarins. Leyfi ég mér að fullyrða að á þeim ágætu árum hafi baráttan milli Duran Duran og Wham! ekki átt hug hans allan.

Seinna vasaðist hann eitthvað smávegis í utanríkismálum og gott ef hann varð ekki síðast og síst forsætisráðherra.

Ef það kallast afskipti þá er það svo sem gott og vel – en hann hefði þá kannki mátt hafa vit á því að skipta sér ekki af því sem kom honum og buddunni hans beinlínis við.