Fáeinar spurningar.
Af hverju er háttvirtum þingmönnum leyft að skjögra ítrekað í pontu, þvoglumæltum og útúrdúruðum?
Finnst háttvirtum þingheimi fyndið og sniðugt að espa og egna þessa sömu þvoglumæltu háttvirtu þingmenn ítrekað til að stíga í pontu og gera sig að fífli?
Er það virkilega stemmarinn á hinu háa Alþingi?
Og er bara allt í lagi að háttvirtir þingmenn, þvoglumæltir eður ei, sitji að kvöldlagi á þessu sama háa Alþingi, flissandi eins og smástelpur?
Eiga háttvirtir þingmenn, þvoglumæltir eður ei, ekki að vera að ræða eitthvað af viti?
Í það minnsta meðan þeir eru í vinnunni?
Fær þetta hyski greidda yfirvinnu ellegar álag fyrir fliss og frammíköll að kvöldlagi?
Eða þvoglumælgi?
Og.
Hvað í sótthreisuðum sokkaplöggum andskotans er háttvirtur þingmaður að þvælast, þvoglumæltur eður ei, á golfmóti MP banka?
Elskulegu landsmenn.
Það er mér mikill heiður að tilkynna að næstkomandi mánudag mun Baggalútur stíga sín fyrstu skref í íslensku útvarpi. Nánar tilekið á hinni alþýðlegu Rás 2, sem er léttlyndari armur hljóðvarpsveldis íslenska ríkisins.
Nú á tímum uggvænlegrar samþjöppunar á fjölmiðlamarkaði er ekki seinna vænna en að þeir tveir óháðu fjölmiðlar sem enn þrífast hér á landi, RÚV og Baggalútur taki þannig höndum saman til að skapa sannleikanum þolanleg lífsskilyrði.
Tilraunaútsendingar Baggalúts hefjast mánudaginn 2. febrúar, laust eftir klukkan fimm, síðdegis.
Góðar stundir.
» Sálmar | » Gagnrýni | » Sögur | » Leikrit | » Siðir | » Heimsljós
