Jæja, þá er maður loksins kominn heim úr Filippseyja- og Malasíuferðinni. Enter þóttist hafa einhverju hlutverki að gegna, sagðist þurfa að rannsaka hitt og þetta og sækja einhverja fyrirlestra. Hann um það. Sjálfur fór ég gagngert til að gera afar ítarlega könnun á mismunandi bragði sama bjórs milli landa. Þannig hafði ég rannsakað aðalframleiðslu landanna tveggja (Tigerbjórinn frá Malasíu og San Miguel frá Filippseyjum) eins og hún bragðast hér á landi, en nú var kominn tími til að bragða varninginn í föðurlandi sínu.

Til að gera langa sögu stutta dvaldi ég aðeins eina nótt (eins og til stóð) í Malasíu, en eitthvað virðist ég hafa ílengst á Filippseyjum. Mig minnir að ég hafi skemmt mér nokkuð vel, þrátt fyrir að nokkuð hafi verið um Austurríkismenn á sama hóteli og ég dvaldi.

Enter virðist hafa stungið mig af og var hann kominn til starfa á ritstjórn á undan mér. Ætli hann hafi ekki lokið sínu "rannsóknarverkefni" snemma eða hypjað sig heim eftir að hafa loks viðurkennt fyrir sjálfum sér hver raunverulegur tilgangur ferðar hans var - að skoða apa.

En hvað um það: Ég komst heim heill á húfi og kem nú tvíelfdur til starfa, mun fróðari en áður um lystisemdir bjórs.

Já, einmitt: Hvað niðurstöðurnar varðar, þá er þetta allt saman eins bara...