Lesbók25.10.01 — Fannar Númason Fannsker

Í einni af fjölmörgum sundferðum mínum í laug Vesturbæjar fyrir skömmu, varð dulítið atvik sem festist í huga mér og varð mér að lokum innblástur í pistling þennan. Ég er maður vel vaxinn, limafagur og allstæltur. Ekki er heldur loku fyrir það skotið að ég þyki allmyndarlegur á velli og býð jafnan af mér þokka góðan. Þá er ég undantekningarlaust vel snyrtur, hvort sem er í sundi eða annarsstaðar. Þar sem ég sat í hinum meðalheita potti sundlaugar Vesturbæjar, er mér litið í átt að inngangi í laugarhúsið sjálft, allreisulega byggingu og vel við haldna. Sé ég þá hvar staulast maður á miðjum aldri og var sá feitur mjög, illa rakaður og á alla lund hinn ógeðfelldasti. Lagði af honum daun af ódýru kölnarvatni og svita, þrátt fyrir þá sjálfsögðu kröfu að menn þvoi sér áður en haldið er út á laugarsvæðið, er hann hlussaðist í pottinn andspænis mér. Myndaðist af því allmikill öldugangur, svo mjög að ég missti jafnvægið um stund. Mér brá nokkuð við þetta og spurði manninn hvort hann gerði sér grein fyrir því að eðlilegt fólk fylltist viðbjóði við það eitt að sjá hann staulast eftir laugarbakkanum, að ekki sé talað um óþefinn sem af honum legði. Við það firrtist mannskepnan nokkuð og muldraði eitthvað á þá leið að hann væri nú öryrki og ætti bágt með gang af þeim sökum, auk þess sem hann safnaði nokkurri fitu vegna þessa. Ég spurði hann þá hvernig honum þætti ef ég gengi nú örna minna þar og þá í pottinum ellegar á bakkanum. Hvort það væri einhver afsökun fyrir því ef ég væri öryrki og ætti því erfitt með að hlaupa á salernið. Bjóst ég svo til að girða niður um mig sundbuxurnar og koma mér fyrir í viðeigandi stellingu. Þá skiptir engum togum að manngerpið hrópar uppyfir sig á vörðinn og segir mig ætla að "skíta í pottinn". Er skemmst frá því að segja að ég var fjarlægður af tveimur stæltum baðvörðum sem sveipuðu mig handklæði og báru inn í klefa. Nú er ekki undarlegt að ég velti fyrir mér eftir meðferð þessa hvursu mismunandi fegurðarskyn og gildismat manna er, og ekki sama hver á í hlut og þykir mér miður að þurfa sífellt að líða fyrir karlmannlegan vöxt minn og skörunglegt fas. Hyggst ég kæra þessa meðferð og bann það sem ég sæti í sundlaugum borgarinnar, en meira um það síðar.

Góðar stundir

Nú geturðu sent Fannari tölvupóst!

 
Númi Fannsker — Forystugrein
 
Númi Fannsker — Forystugrein
 
Enter — Sálmur
 
Enter — Sálmur
 
Enter — Sálmur
 
Spesi — Forystugrein
 
Spesi — Sálmur
 
Númi Fannsker — Sálmur
 
Enter — Sálmur
 
Fannar Númason Fannsker — Forystugrein
 
        1, 2, 3 ... 176, 177, 178 ... 180, 181, 182