Fyrst að við flestum erum(eða viljum vera) óskaplega artí-fartí, þá langar mig að gera ykkur greiða og setja inn hérna auglýsingarafpóst sem mér barst fyrir skömmu.
Kæru fjölmiðlamenn, vinir Nýhils og kunningjar, veraldlegir sem og andlegir leiðtogar í lífum og limum, álitsgjafar - og aðrir.
Um komandi helgi verður alþjóðleg ljóðahátíð Nýhils haldin í annað sinn og verður ekkert til sparað að gera dásemdirnar sem fyllstar ofsa og ást. Færustu sérfræðingar Nýhils í alþjóðlegri og innlendri ljóðlist hafa lagt nótt við nýtan dag síðastliðinn misseri og sett saman allra mögnuðustu mögulega ljóðadagskrá og verður blásið til sannkallaðs ljóðasvalls föstudaginn 10. nóvember næstkomandi og stendur orgían yfir fram á sunnudagsmorgun. Dásemdirnar verða slíkar að andans menn og konur munu froðufella höfuðstöfum og svitna stuðlum langt fram eftir næsta ári, krafturinn slíkur að orð munu ríma sjálfkrafa hvert við annað og allir læsir menn munu falla í stafi, orð, setningar, erindi, kvæði, heilu bálkana!
Hátíðin verður haldin í Stúdentakjallaranum og í Norræna húsinu. Dagskrá er eftirfarandi:
Föstudagur 10. nóvember - Stúdentakjallarinn kl. 20.00-01.00 Ljóðapartý
Laugardagur 11. nóvember - Norræna húsið kl. 12.00-15.00 Málþing um samtímatilraunaljóðlist
Laugardagur 11. nóvember - Norrænahúsið kl. 16.00-18.00 Ljóðaupplestur
Laugardagur 11. nóvember - Stúdentakjallarinn kl. 20.00-01.00 Ljóðapartý
Erlendir þátttakendur eru að þessu sinni þau Kenneth Goldsmith, Matti Pentikäinen, Leevi Lehto, Anna Hallberg, Jörgen Gassilewski, Derek Beaulieu, Jesse Ball, Christian Bök, Katie Degentesh, Gunnar Wærness og Jane Thompson. Frekari upplýsingar um erlendu þátttakendurna má finna í viðhengi.
Auk hinna erlendu gesta, sem að þessu sinni eru helmingi fleiri en síðast, eru fjölmargir Íslendingar, og má þar helst nefna: Þórdís Björnsdóttir, Halldór Arnar Úlfarsson, Kristín Eiríksdóttir, Óttar Martin Norðfjörð, Ingibjörg Magnadóttir, Valur Brynjar Antonsson, Eiríkur Örn Norðdahl, Ófeigur Sigurðsson, Haukur Már Helgason, Ingólfur Gíslason, Kristín Svava Tómasdóttir, Þórunn Erlu Valdimarsdóttir, Bjarni Klemenz, Birgitta Jónsdóttir, Kabarettinn Músífölsk , Stórsveit Áræðis, Donna Mess, Berglind Ágústsdóttir, Reykjavík!, og Skakkamanage.
Hátíðin er unnin í samstarfi við Norræna húsið í Reykjavík og er styrkt af Landsbanka Íslands.
Frekari upplýsingar veitir framkvæmdastjóri hátíðarinnar, Eiríkur Örn Norðdahl (845-2685 eða kolbrunarskald@hotmail.com). Fyrirspurnir um viðtöl við erlenda höfunda eða myndir af þeim skulu berast á sama stað.
Tilvalið tækifæri til að hita aðeins upp fyrir árshátíðina.
Ég vonast til að sjá ykkur sem flest!
Verst að Skáldið er dautt.
Þeir hefðu heldur átt að bjóða upp á vúdúprest sem myndi vekja upp Jónas, Einar Ben, Stein Steinarr, Davíð Stefáns og Hannes Hafstein.
Þá myndi ég mæta.
Þegar þú minntist á Davíð Stefáns var mér hugsað til þessa litla ljóðs sem fær þó heila blaðsíðu út af fyrir sig í Svörtum Fjöðrum.
Kvenlýsing
Þinn líkami er fagur
sem laufguð björk,
en sálin ægileg
eyðimörk.
Fær mig alltaf til að brosa.
Annars hef ég mætt á ljóðasamkomur hjá þessu merkilega félagi og get fullyrt að þau stemningin sem ljóðaflutningurinn skapar tvinnast sérlega vel við þá áfengisneyslu sem fylgir í kjölfarið. Mjög gaman, sem sagt.
Nei, mín upphitun verður annarsstaðara, nánar tiltekið á fylleríi með vinningum