Vandamálið mitt
mýsla er
Ráðið þygg ég þitt
og þakka hér.

Hraust? Það held ég bara
og heilsugóð
Hef Vímus til vara
verði ég óð.

Þetta var nú ljóti leiburðurinn! Hvaða vandamálapakka erum við nú að fá upp í hendurnar? Enn eitt vonlaust vonarskáldið?
‹Krossleggur hendur og horfir, úr öruggri fjarlægð, rannsakandi á Vöndu›
Ertu kannske úr Dölunum, ritdóninn þinn? Reyndu að vanda stíl þinn og orðfar og sýndu þér eldri og reyndari mönnum (konum og körlum) tilhlýðilega virðingu þá mun þér vel farnast. Varastu að vera með einhverja uppvöðslusemi og hortugheit áður en þú hefur fundið þér fótfestu og þú ert komin með svolítinn skráp.
Stattu þig svo, Vanda og vandaðu þig!
Annars heiti ég Sundlaugur Vatne og ég er sundkennari. Viltu koma í sund?
‹Býður Vöndu velkomna með fyrirvara um að hún standi sig vel. Veltir því fyrir sér hvort hann hafi verið of bráður að bjóða henni í sund svona strax við fyrstu kynni.›

Hvaða rugl er þetta í þér, Ísak?

Hvað þá?

Sættu þig við hana, vendu þig á hana og taktu hana alvarlega. Réttritun er mikilvægari en nokkur margföldunartafla og fátt sem þjálfar betur rökræna hugsun. Láttu svo ekki sjá svona fullyrðingar frá þér aftur, sveppurinn þinn, annars er mér að mæta. Viltu koma í glímu?
‹Veltir því fyrir sér hvort hann hafi verið of fljótur á sér að bjóða henni í glímu. Ómögulegt að vita hvort þessi nýliði kann eitthvað fyrir sér.›

Ég á við: Hvað er íslenzkufasisti og er það eitthvað neikvætt?

Einnig: Hvaða tölfræði liggur til grundvallar þeirr staðhæfingu að flestir hér geri villur?

Ertu farinn að sleikja þessa nýliða eitthvað upp? Ég skil ekki að þú hafir neina ástæðu til þess. Vantar þig sálufélaga?

Sundlaugur stendur sig í stykkinu að vanda... annars vil ég bjóða Vöndu velkomin, það er greinilegt að hún er mörgum nýliðum fremri í kvæðagerð og því lýst mér vel á...

‹Brosir út að eyrum og lyftir báðum höndum upp fyrir höfuð til merkis um að sér hafi þótt þetta afskaplega fyndið›

Íslenzkufasisti er orð sem ég nota yfir þann sem pínir mig og þreytir með eilífu hjali um íslenzku, því viðkomandi kann ekkert annað. (Þú ert auðvitað ekki einn þeirra.) Í málsgreininni á undan hafði ég hent gaman að því sem við Haraldur töldum vitleysu. Því taldi ég það ekki vera sleikjuskap að minnast eilítið á þetta líka. Sleikjulæti henta mér ekki.

Ég hef á tilfinningunni að flestir hér geri því miður villur, en þær munu langoftast smávægilegar. En það gefur nýliðum og öðrum auðvitað ekki leyfi til að saurga þræði með lágkúru.

‹Brosir breitt› Góður, Ísak!

Þú ert nú meiri blábjáninn... maður segir velkomna...

Já, og lízt. ‹Heldur niðri í sér hlátrinum›

Já, það er nokkuð ljóst... ‹Flissar›

Það tilkynnist hjer með opinberlega að hjer með höfum vjer með þessu innleggi lýst því yfir að rita ber líst en eigi lýst ef viðkomandi líst á eitthvað en eigi hafi viðkomandi lýst á eitthvað auk þess sem eigi líst oss á blikuna er vjer sjáum hve oft þessu er ruglað saman sem svo leiddi til þess að vjer höfum lýst því yfir er fram kemur í innleggi þessu.

Sundlaugur Vatne.
Uppvöðslusemi og hortugheit? Hvarflar ekki að mér! Ég sýni ykkur öllum tilhlýðilega virðingu, líka þér.
Finnst þér kannski að orð mín til Vímusar sýna einhverja vanvirðingu og horgutheit?
Ef svo er þá skal ég umorða þau svo merking þeirra komist greinilega til skila;

Vandamál mín eru lítil og smá, þakka þér samt fyrir Vímus að gefa mér góð ráð.
og;
Ég er hraust og heilsugóð. Mun samt leita ráða hjá Vímusi, þegar og ef ég veikist eða verð óð.

Ekki er þetta nú góð byrjun hjá mér, að fara strax út í útskýringar og rökræður.‹Roðnar óstjórnlega og borar annarri stórutánni ofan í gólfið›

Þetta hefði nú mátt orða: Ég sýni ykkur öllum tilhlýðilega virðingu, ekki sízt þér.‹Brosir út að eyrum og lyftir báðum höndum upp fyrir höfuð til merkis um að sér hafi þótt þetta afskaplega fyndið›

Tek fram að ég hef ekki sakað þig um hortugheit í garð Vímusar. Sæi ég ástæðu til þess hefði það verið umbúðalaust af minni hálfu. Hér er aðeins um almenna ábendingu að ræða.

Virðingu mína Vatne fær
vitur málfræðingur
Heillandi og konum kær
kjarnyrtur gæðingur.

‹Hneygir sig djúpt og vottar Sundlaugi Vatne virðingu sína.›

Virðingu ég votta þér
Vatne glímukappi.
Heiður gæti hlotnast mér
að heilsa þér með klappi.

‹Ljómar upp›

Það er sko vit í þessum nýliða, félagar.

‹Stekkur hæð sína›