Nei en óvitlaust.

Það er best að flytja hana hingað.

Ein venjuleg á minn mælikvarða
hvk.orð sem skeytt er aftan við önnur orð

Út´á sundum svamlar
sönglar mæðulega
hreyfigetu hamlar
hana rétt skal vega.

Ég held að Vímus þurfi að koma með fleiri vísbendingar, einkum ef þetta er orð sem (bara?) er skeytt aftan við önnur orð. Ég hef reynt lóð, band og net en þau orð virðast ekki falla að allri vísunni.

Já þið verðið að fá eitthvað til að vinna út frá. Orðið er fjögura stafa hvko. og 1. og 4. lína dálítið villandi. Sjálft gátuorðið er ekki svamlandi og það sem er vegið er hlutur sem tilheyrir. Nei stopp hér. þið megið gera eitthvað sjálf.

Varp?

Andvarp (öndin svamlar)
Andvarp (að stynja)
Meinvarp
???

Góður!
Ég var ekki alveg sáttur við gátuna, þótti vera farið full mikið í kringum hlutina´Varp er rétta orðið

Út´á sundum svamlar = Kollan- æðarvarp
sönglar mæðulega = andvarp
Hreyfigetu hamlar = Menn hreyfast varla síðan sjónvarpið kom
hana rétt skal vega. = Kúluvarp Kúlan verður að vera nákvæmlega rétt vegin.

Ég er sammála því að þetta getur verið hvimleitt og ég var ekki alveg sáttur við sjálfan mig þarna. Hugsaði einmitt um æðarvarp á miðju sundi.
Annars er þetta ágætis form en þá verður vísan að vera nákvæm en ekki villandi.

Halelúja, amen og skál!

Þetta er örgáta og ég réði hana strax. = Sídrukkinn prestur.

Velti fyrir mér orðinu, kolla.

Æðarkolla
Æðarkolla
Hárkolla eða vínkolla í beltisstreng
Að vega, væri hugsanlega tengt því að drepa þessa friðuðu önd löglega, en fannst þriðja og ekki síst fjórða ansi langsótt.
En, varp?! Sífullum andvarpandi presti sem varp í stólinn og var út-varpað, hefði aldrei látið sér orðið varp til hugar koma í þessu tilfelli.
Fjandi góð vísa sem slík, en ‹Blótar herfilega og rífur hár sitt›

(Ég var búinn að andvarpa svo mikið yfir þessari vísu, að mér datt það í hug sem svar.)
‹Brosir út að eyrum og lyftir báðum höndum upp fyrir höfuð til merkis um að sér hafi þótt þetta afskaplega fyndið›

En hér er ein aðeins óhefðbundin (en ekki mikið).
Lýsir einu hvorukynsorði, 2 seinni línurnar standa saman:

Ein er ljóshærð, ekkert hrak.
Þá ofurtrukka mærði.
Ef hún les það afturábak
eitthvað hún þá lærði.

Og ef Gimlé er ekki alveg sáttur við það, þá ætla ég að hafa eina hefðbundna með.
Lýsir einu kvenkynsorði:

Heimilið er hennar staður.
Heldur sig á engjum.
Ég jarðávöxtinn jafna glaður.
Hún jagast seint í drengjum.

Eina sem mér dettur í hug við fyrstu vísuna er kannski Amen? (aftur á bak nema, þ.e. læra)

Svo var ég að hugsa hvort önnur vísan gæti verið mús?

Heimilið er hennar staður. - húsamús
Heldur sig á engjum. - hagamús
Ég jarðávöxtinn jafna glaður. - jafningur, sbr. kartöflumús
Hún jagast seint í drengjum. - drengir kippa sér lítið upp við mýs...?

hér kemur ein gamaldags; eitt og sama orð fyrir hverja línu:

Gefin út við skuldaskil
í skóla er hún gefin
leggst á nokkur línubil
ljúfur tekur skrefin.

(Þið voruð ekki lengi að því sem lítið er.
Með síðustu músarlínuna var ég að hugsa að músarlegar konur jagist ekki mikið í karlpeningnum. En þetta er jafngott.)

Grislingur, er þetta nokkuð Lýsi? (Aflýsing, Lýsi, o.s.frv.)

ekki er það nú rétt

En "stika" eða "mælistika"?

ekki heldur

Tala?

Nóta.

rétt - geturðu tengt nótu við allar línurnar?