um kosti loftbóludekkja
Í gegnum vetrarstorma hafa nagladekkin haldið mönnum innan vegar við akstur í krapi og hálku. En nútíminn færir okkur skárri kosti en að myljast þannig áfram á sleipiefnum árstíðanna. Loftbóludekk standa jafnbarða nagladekkjum þegar kemur að veggripi og hemlunarvegalengd. Þau eru hljóðlát og stimamjúk.
Nagladekkin naga malbikið látlaust og umbreyta í viðurstyggilegt duft sem fýkur yfir seka vegfarendur og saklausa. Af hinu stöðuga nagi verða til holur, rennur og skorur. Yfir sumarið er hver einasti götutroðningur fullur af malbikunarvélum og hálfnöktum stráklingum með skóflur. Slíkum holufyllingum fylgja umferðartafir og iðulega rennur vegæði á dagfarsprúða menn á leið frá vinnu.
Það er því samfélagsleg skylda hvers Íslendings sem renniríður að staðaldri um götur borgarinnar að skipta yfir á skaðminna hjóltau. Loftbóludekkin virðast þar góður kostur vilji menn ekki glata umferðaröryggi sínu.
Sem gangandi vegfarandi heyri ég dag frá degi fjölga í flota mulningsvélanna. En stundum staldra ég við og yfir mig fellur sama værð og daginn sem mér var í æsku gefinn pokinn með rauða kóngabrjóstsykrinum. Líkt og úr fjarska heyri ég rödd móður minnar, leiðbeinandi, stranga en um leið milda: Sjúga, ekki bryðja, segir hún. Sjúga, ekki bryðja.
(11 af 17)
Og gera hálfnöktu stráklingana álíka óalgenga og gömul bílnúmer!!! Er þér alvara??
Samt satt.
Mamma þín talar þá væntanlega af reynslu.
Mikið vorkenni ég pabba þínum...
Vel mælir Sjöleitið og skáldlega... vissulega er rétt að bölvuð tannhjólin naga, ekki einasta göturnar heldur einnig göt á pyngjur skattgreiðenda sem standa verða undir kostnaði af vinnu strípalinganna. Ef ég á að borga fyrir það þá krefst ég þess jafnréttis að hálberar stúlkukindur svitni einneg yfir malbikinu oss til gleði og dægradvalar í umferðinni. AMEN
Loftbóludekk standa jafnbarða nagladekkjum þegar kemur að veggripi og hemlunarvegalengd. Segir þú? Hefur þú prófað að fá þér svona gúmísogskál og hrækja á gler og smella því á og prófa að draga það til? Hvað gerist?
Rétt athugað hjá þér Galdrameistari. Gúmísogskálar af þessu tagi ná góðu gripi á hræktu gleri en samkvæmt því sem um framleiðslu er ritað í fræðsluriti Gúmívinnustofunnar ("Gúmmí" er ónefni) þá munu loftbólurnar heldur minna á harðnandi geirvörtu að því leyti að þær draga í sig umhverfisáhrif og stinnast. Þetta ástand kýs ég að kalla Wartburg.
Keðjurnar á! Enda er allt á kafi í snjó í borginni og aldrey nokkurn tímann er saltað!
Ég hef nú prufað þessi loftbóludekk og ég get sagt það með vissu að þegar að svell er þá virkar þetta drasl ekki neitt. Þá er betra að nota nagladekkin. Ég er hindvegar ekki sammála því að nagladekkin séu notuð vegna þess að það er ekki oft sem að svellið kemur. Ef við gefum okkur þá forsendu að vetur sé 6 mánuðir þá er svellið aldrei meira en svona 2 vikur í mestalagi. Hinar 22 vikurnar snjólausar eða slabb og þar segja nagladekkin ekkert. Auk þess vil ég benda á að hemlunarvegalengd bíla á nagladekkjum er lengri á malbiki heldur en þeir sem eru á venjulegum ónelgdum vetrardekkjum.
Ég hef enga trú á loftbóludekkjum og held mig við nagladekkin af illri nauðsyn. Hins vegar hef ég heyrt um e-k karbóndekk, þar sem karbónflísum er blandað í dekkin sem gefa grófa áferð. Það hljómar eins og eitthvað sem gæti virkað á svelli. Hefur einhver reynt þessi dekk?
Góður punktur hjá Frella. Ég hef líka verið á agalega fínum loftbólu dekkjum sem skiluðu mér líka agalega fínt uppá aðra hverja umferðareyju hér í borg. Annars eru naglarnir bölvað sorp.
"Sjúga, ekki bryðja" þetta hljómar eins og titill á bók sem þær gætu sett saman Paris Hilton og Pamela Anderson.
Loftbóludekk á alla bíla!
Er alsæll með þesssar tuðrur.
Kannske fólk hagi akstri og hraða eftir aðstæðum. Dekkin gera ósköp lítið, sama hversu góð þau eru, ef fólk ekur of hratt miðað við aðstæður.
Bless...
- Fæðing hér: 11/8/03 14:00
- Síðast á ferli: 6/4/13 19:49
- Innlegg: 49
Nokkru eftir fæðinguna fluttust mæðginin til Kanada. Þar lagði Sjöleitið stund á stjörnuhimininn, þverskurðarmyndir og kafarabúninga. Rannsóknir Sjöleitis þróuðust seinna út í geimbúningsfræði sem er undirgrein þjóðbúningafræða við Háskólann í Manítóba.