Nú keppast menn við að tjá sig um nýjustu afurð æringjans Mels Gibsonar og er sennilegast borið í bakkafullan lækinn með einni höndinni enn upp á móti hinum.
Gyðingarnir ku víst vera óskaplega sárir yfir því að Mel og faðir hans Gib séu að grafa upp gamlar áyrðingar um að dauði Jesúar Jósepssonar hafi verið þeim að kenna; þeir hafi beinlínis staðið fyrir því að hann var strengdur á kross. Um það má eflaust þrátta mikið, en hafa kristnir menn og gyðingar einhvern tímann íhugað hvað hefði gerst ef Jesús þessi hefði ekki verið strengdur á kross, hverjir svo sem stóðu að þeim óskunda.
Þætti Jesús eitthvað merkilegur ef hann hefði ekki dáið á krossinum, heldur eldgamall, útbrunninn og afdankaður kraftaverkamaður í litlum næturklúbbi í Jerúsalem? Er það ekki einmitt píslarganga Jesúsar sem gerir hann að þeim frelsara sem kristnir menn sjá í honum? Er hann ekki sagður hafa dáið fyrir syndir mannanna? Ætli Elvis Presley, Cory Bennett, Birgitta Haukdal, Jack Kennedy og John Lennon væru sveipuð jafn miklum dýrðarljóma í dag ef þau væru enn á lífi? Dauðinn, þó ótímabær hafi verið í þeirra tilviki og átakanlegur, og hvernig hann bar að, á sannanlega sinn þátt í arfleifð þessa fólks og sama held ég að gildi um Jesús Kr. Jósepsson.
Ég held að tími sé kominn til að hætta að rífast um þetta eldgamla sakamál. Gyðingar sem uppi eru í dag þurfa að mínu viti ekkert að skammast sín fyrir þetta, þó svo að margir þeirra trúi á og lifi eftir sömu kennisetningum og þeir sem grönduðu Jesúsi.
Hana
(1 af 1)
- Fæðing hér: 27/2/04 10:21
- Síðast á ferli: 5/3/04 14:24
- Innlegg: 0
Móðir hans var lausgyrt á yngri árum og átti vingott við margar sinfóníuhljómsveitir sem komu til Björgvinjar á 1. áratug 20. aldar. Hún seldi son sinn 5 ára sem kyndara á saltskip og fjármagnaði þannig skólagöngu sína, en hún varð fyrst kvenna prófessor í þvagfæraskurðlækningum við Maríuhafnarháskóla.
Otto fór um öll heimsins höf á saltskipum og síðar gabbróskipum uns hann settist að í Moskvu 12 ára gamall og fór að selja hnetur. Hann var einarður stuðningsmaður Stalíns og gengdi ýmsum trúnaðarstörfum fyrir ungliðahreyfingu Kommúnistaflokksins í Grotjkynhverfinu, uns hann var sendur á geðveikrahæli 16 ára gamall og loks í gúlagið 19 ára. Þar vann hann við lagningu lestarteina í 3 ár og heillaðist svo af slíkri vinnu að þegar honum var vikið úr gúlaginu fluttist hann til Dresden og fór að vinna í sjálfboðavinnu við skiptispor utan við borgina. Hamm kynntist þar konu, einstæðri móður með 2 börn og hófu þau búskap og eignuðust eitt barn áður en konan og börnin létust í loftárásum bandamanna á borgina. Otto fluttist þá til Spánar þar sem hann var fangelsaður af Frankó stjórninni og loks vistaður á geðveikrahæli í Cordóba uns honum var sleppt árið 1981, 6 árum eftir lát Frankós. Hann hóf að vinna hjá spænsku járnbrautunum og lærði jafnframt kynjafræði, málmsmíði og miðaladalækningar við alþýðuháskólann í Valensíu. Honum var loks gert að yfirgefa Spán í upphafi 9. áratugarins og fluttist hann þá til Íslands og hefur síðan unnið ötullega að járnbrautavæðingu samfélagsins á Austfjörðum.