— GESTAPÓ —
Í uppáhaldi:
Félagsrit:
Ívar Sívertsen
Friðargæsluliði.
Heiðursgestur og  skáldjöfur.
Pistlingur - 9/12/04
Trúbadorakeppni Rásar 2 2005

Í starfi mínu hlusta ég mikið á útvarp og finnst einna þægilegast að hlusta á rás 2. Þar er stundum brugðið á leik og keppt í lögum.

Ég var að hlusta á rás 2 í dag á meðan ég var að keyra og heyrði þar fjögur lög sem valin hafa verið í úrslit. Eitt þeirra heitir Pabbi Minn og er flutt af manni sem kallar sig Dölla. Hvaða kasúldni remúlaðidvergur kallar sig DÖLLA? Hann syngur lag sem fjallar, eins og nafnið gefur til kynna, um pabba sinn. Þetta er líklega óheppnasti pabbi í heimi, ekki bara fyrir hvað hann hefur mátt þola heldur einnig hvernig manngarmurinn lætur syngja til sín. Lagið endar á einhverjum óskiljanlegum hljóðatilraunum með röddinni sem fær mann til að hugsa um hvort lyfjaskápurinn hans hafi akkúrat verið tómur þegar þetta var tekið upp. Dölli á að vera heima hjá sér og fást við hannyrðir! Gítarinn gæti hann selt í góða hirðinum fyrir nokkra hundraðkalla!

Annað lag heitir Kveðið um Kötu. Þar er á ferð tilþrifalítil tónsmíð og flatur flutningur. Textann nennti ég ekki að hlusta á og segir það eiginlega allt um álit mitt á laginu, frekar vont. Röddin tilþrifalaus og undirleikur klénn. Birgir Olgeirsson þarf að æfa sig betur og koma aftur eftir þrjú ár og gáum þá hvort hann getur eitthvað.

Learn how to behave er þriðja lagið og alveg sæmilegasta smíð. Það líður reyndar fyrir það hvað enskuframburði flytjanda er ábótavant. Einnig er munnhörpukaflinn svolítið eins og skrattinn úr sauðaleggnum. Góður gítarleikur en röddin full skerandi. Textinn er alls ekki frumlegur. Hann er að snúa út úr biblíunni í heild og tekst það því miður illa. Eins konar Biblía fyrir Rednecks! Lag sem ekki fer á repeat í mínum spilara. Tómas Axel Ragnarsson þarf að skipuleggja lagið betur og syngja það minna aggressíft til að ná árangri. Gæti sómt sér vel í rokkinu en ekki sem trúbador.

Fjórða lagið heitir Dansa og mér finnst það áberandi best. Þar fer maður með þýða rödd og greinilega kunnáttu í gítarspili. Lagið er ljúft og angurvært. Textinn er heimspekilegar pælingar um lífið og tilveruna sem höfundur virðist vilja dansa í gegn um. Textinn minnir óneitanlega á lag sem Hemmi Gunn söng hér um árið, Dansa, hvað er betra en að dansa... En þau orð koma einmitt fyrir í viðlaginu. Þar með lýkur Hermanns þætti Gunnarssonar í þessum samanburði. Svavar Knútur syngur vel og raddar sjálfan sig á mjög vandaðan hátt. Margir hafa reynt að radda sjálfa sig en með misjöfnum árangri. Svavar getur það vel. Gítarleikurinn er til fyrirmyndar og öll útsetning almennt. Það sem ég held að fleyti Svavari lengra en hinum er sú staðreynd að hann er ekki að rembast eins og rjúpa með harðlífi við staurinn. Hann syngur þetta algerlega áreynslulaust og ræður vel við það.

Ef Svavar vinnur ekki þessa trúbadorakeppni þá er eitt og annað skítugt við hana og hreinsa þarf úr eyrum landsmanna.

   (179 af 287)  
9/12/04 22:02

Bölverkur

Allir trúbadorar eru undirmálsmenn! Hvað er annars trúbador?

9/12/04 23:00

Prins Arutha

Einmitt. Hvaðan kemur þetta orð, Trúbador?

9/12/04 23:00

Ívar Sívertsen

Þetta er að ég held spænska og þýðir farandsöngvari... en ég svo sem sel það ekki dýrara en ég keypti...

9/12/04 23:00

víólskrímsl

Fyrir umþaðbil 5 árum vann ég um skeið með téðum Dölla. Lagið "pabbi minn" var þá afar heitt á vinsaeldalistanum. Gaman að sjá að hann hefur ekki baett við sig síðan þá...nema síður sé.

9/12/04 23:01

Ívar Sívertsen

Og hann Svavar vann

Ívar Sívertsen:
  • Fæðing hér: 11/8/03 12:21
  • Síðast á ferli: 22/6/23 12:25
  • Innlegg: 12356
Eðli:
Ákaflega fagur ungur maður með mikinn metnað og kann sig á allan hátt. (hann lærði það á kvöldnámskeiði hjá Bréfaskóla SÍS)
Fræðasvið:
Ég veit allt, get allt og kann allt en fer rosalega leynt með það og kann að fela það vel.
Æviágrip:
[i]Fæddur að handraðanesi á sóðbrókarströnd í Ristilfirði. Lést skömmu síðar. Reis upp frá dauðum eftir korter og bað um brauð. Eftir það var ekki aftur snúið. Hann hefur síðan verið ánetjaður Baggalúti og virðist ekkert vera að skána.Hann fékk sér fæðingarblett á kinnina skömmu áður en hann lét taka hann af sér. Hann hló skömmu eftir það. Ívar hefur nú hafið búskap á Eyðibýli á Auðkúluheiði. Hann hefur aldrei verið við kvenmann kenndur en hann er all oft kenndur. Sívertsenættin hefur lýst hann útlægan og krafist þess að hann afsali sér ættarnafninu og taki upp nafnið Nestrevís en hann hefur margsinnis hafnað því. Ef þú ert að lesa þetta ennþá þá ert þú líklega jafn skemmdur og Ívar... ef ekki skemmdari barasta. Ertu enn að lesa? Nei nú læt ég leggja þig inn á geðdeild! Það er ekki heilbrigt að lesa svona langt! Viltu hætta þessu! HÆTTU SEGI ÉG!!! Ef þú ert enn að lesa og finnur ekki fyrri vott af þreytu þá skal því bætt við að þegar Gestapó var opnað í árdaga þá gerðist Ívar fastagestur hið snarasta. Hann hefur æ síðan verið einn virkasti gestapóinn og ritað mikið. Hins vegar er ljóst að hann kemur til með að auka viðveru sína á Gestapó á komandi árum því nú hefur hann komið sér í innivinnu við tölvu. Ertu enn að lesa þetta? ÉG held svei mér að þú ættir í alvöru að leita þér hjálpar. Ég er löngu hættur að lesa þetta... ég veit ekki einu sinni hvað stendur eftir línu þrjú. En hvað um það. Síðan hafa mörg vötn runnið til sjávar og eiginlega svo mikið að það er ekkert salt eftir í sjónum, það lagði á flótta upp í ár og stöðuvötn þannig að nú er sjórinn pakkfullur af ferskvatnsfiskum og ferskvatnshvölum. En það bar til um þessar mundir, að boð kom frá Megasi keisara, að skrásetja skyldi alla drykkina. Þetta var fyrsta skrásetningin og var gjörð þá er Gylfi Ægisson var blandstjóri í Stúdjó Sýrlandi. Fóru þá allir til að láta stjaksetja sig, hver til sinnar borgar. Þá fór og Rúnar Þór úr Litlu Hraunum frá Hótel Borg upp í Morgunblaðshús, til borgar Davíðs, sem heitir Hádegismóar, en hann var af ætt og kyni Davíðs,að láta skrásetja sig ásamt Maríu hjákonu sinni, sem var þung. En meðan þau voru þar, kom sá tími, er hún skyldi verða léttari. Ældi hún þá bjór sinn frumdrukkinn, sagði hann vondan og lagði hann í fötu, af því að eigi var romm handa þeim í gistihúsi. En í sömu byggð voru barþjónar úti í haga og gættu um nóttina drykkja sinna.Og vörður laganna stóð hjá þeim, og dýrð Áfengis ljómaði kringum þá. Þeir urðu mjög fullir, en löggimann sagði við þá: Verið óhræddir, því sjá, ég boða yður mikinn fögnuð, sem veitast mun öllum lýðnum: Yður er í dag afréttari færður, sem er Hristur og hrærðu, í Mogga Davíðs.Og hafið þetta til marks: Þér munuð finna gubb vont, lagt í fötu. Og í sömu svipan var með löggumanninum fjöldi himneskra hljómsveita, sem lofuðu stuð og sögðu: Dýrð sé stuði í Hádegismóum, og fiður á Davíð og mönnum sem hann hefur velþóknun á. Þannig hljóðar hið heilaga stuðspjall. Og þegiðu svo!