Nú hefur Gestapó verið breytt ofurlítið, nöfn gestapóa eru nú aðgengilegt nánast hvar sem þau finnast, félagsrit gestapóa eru aðgengilegri, nýjar myndir komnar af helstu gestum auk þess farið er að benda gestum á rafmæli lúta og gefur það manni kærkomið tækifæri til að rifja upp gamlar minningar tengdar téðum lútum.
Teningakast var innleitt og hefur það strax getið af sér þúsundir pysta í tileinkuðum þráðum og virkar sem ágætasta krydd í öðrum þráðum. Einnig ku Enter af sinni alkunnu forsjá hafa stoppað fyrir 1900 vandann enda ekki nema tæp 7 ár þangað til hann ber að dyrum.

Allar þessar breytingar eru hið besta mál að mínum dómi. Ég er þessa stundina að vinna að lítt áberandi en þó umfangsmiklum álagsprófunum og enn sem komið er virðist sem þetta sé allt saman frækilega smíðað.
...enn sem komið er. [Ljómar upp!]

‹|| Dagbókarfærslur ||›
28. 11 2008
Kæra dagbók, það heldur áfram að vera kalt og blikur halda áfram að vera á lofti í efnahagslífinu. Verðbólga í nóvember var þó lægri heldur en í október og eru það góðar fréttir. Verðbólgan er samt há, 1,74% á milli mánaða (sambærilegt við 20,88%) en er orðin lægri en dráttarvextir. Til samanburðar var verðbólgan í október 2,16% (sambærilegt við 25,92%). Það sem þetta þýðir samt er að síðan Glitnir féll þá hefur heildar upphæð verðtryggðra skulda minna hækkað um 3,94% vegna verðbólgunnar - slík aukning boðar ekki gott.

Það eru samt líka góðar fréttir að viðskiptajöfnuður var jákvæður um 11 milljarða strax í október, það gefur góða von um að þau séu jafnvel betri í nóvember. Með öflugu átaki náum við að toga okkur upp úr þessu, hægt í fyrstu en síðan með auknum hraða.

Lög hafa verið sett á alþingi um gjaldeyrisviðskipti. Ég hef ekki kynnt mér þau fyllilega enn, en af því sem ég hef séð þá valda þau mér áhyggjum. Þarna er verið að þvinga fjármagn og af minni reynslu þá bregst fé ekki alltaf vel við þvingunum - það er betra að smala því.

Rannsókn á meintum efnahagsafbrotum er á frumstigi og vonandi mun það verða öflugt starf. Ef vel á að vera þá verður almenningur að treysta starfinu og slíkt fæst einungis fram með óháðum aðilum og góðri upplýsingagjöf um hvernig starfið fer fram og hvers má vænta af rannsókninni.

2. desember 2008
Veðrið heldur áfram að vera kalt, það er samt ákaflega fallegt inn á milli. Ég fór til mömmu og pabba um helgina, þar var öll fjölskyldan samankomin og við skárum meðal annars út nokkrar laufabrauðs kökur. Það var ákaflega skemmtilegt kvöld. Mér þótti mjög miður að hin merku tímamót um fullveldi íslands í 90ár skyldu líða hjá án þess að á það væri minnst. Að auki virðist fjas um inngöngu í Evrópubandalagið sífellt aukast og einkennist slíkt alltaf annað hvort af græðgi eða fáfræði, nema þá ef bæði sé. Skelfing sem mér þykir það bagalegt þegar fólk hrapar algerlega í huga mér með blaðri um Evrópubandalagið þess efnis að það eigi að vera einhver algóður faðir sem eigi að færa okkur botnlausa velsæld án þess að fá nokkuð fyrir sinn snúð. Barnalegt fjas fáfróðra aumingja sem hafa haft það allt of gott um dagana segi ég!
Þetta fékk mig meira að segja til að rita félagsrit nú rétt fyrir miðnættið. Svo rakst ég á stafsetningarvillu hjá mér sem ég og lagaði en eyðilagði með því dagsetningu ritsins - meiri klaufaskapurinn hjá mér.
Annars er ég farinn að hugsa til jólannanna - þau gerast víst ekki af sjálfu sér.

4. desember 2008
Jæja, það heldur áfram að vera líflegt í þjóðfélaginu. Það gleður mig nokkuð að andstæðingar Evrópubandalagsins innan þjóðfélagsins virðast vera að rumska og tjá skoðun sýna. Loksins.
Ég hef verið að brjóta heilann yfir jólagjöfunum þetta árið, það gæti reynst erfitt að finna íslenskar gjafir handa öllum, þ.e. viðeigandi gjafir. Varðandi óvenjulegri gjafahugmyndir þá hefur mér m.a. dottið í hug heimareykt hangikjöt, gjafabréf frá ferðaþjónustu bænda, árs byrgðir af Omega3 og kind frá kindur.is. Hefðbundari gjafir eins og handverk, tónlist, bækur, DéskotansVandræðaDiskar, leikhúsmiðar, ostakörfur, Latabæjargóss og borðspil koma líka sterklega til greina. Kannski dettur mér fleira í hug - já, ljósmyndir þær eru skemmtilegar. Og tímar í nudd eða dekur, það gæti verið eitthvað fyrir hana Ormlaugu. Jájá, þetta kemur allt saman. Konfekt er líka möguleiki - handa langömmu t.d. henni finnst svo gott að geta boðið gestum eitthvað slikkerí. Handprjónuð lopapeysa er svo alveg eðall - og árskort í húsdýragarðinn.