Mér varð á að líta yfir fréttirnar í dag og sá þar að mönnum á höfuðborgarsvæðinu er ekki lengur stætt á að horfa bara á sjónvarpið til að svala fýsnum sínum. Þannig er að maður sagði við lögreglu að bera út orð um að tveir eiturlyfjasalar hefðu snuðað sig um tíuþúsund krónur vegna misheppaðra fíkniefnaviðskipta. Þar hafði hann semsé látið þeim í té peninga til að versla svokallaðar E-töflur en þeir hafi snúist á hæli (ekki misstigið sig og tognað einsog ég geri yfirleitt) og hlaupið á brott með féð. Ekki þótti honum það félegt og ákvað að kæra þá til lögreglu. Þegar hann ræddi við þá sagði hann þeim að þetta hefði verið mikið tjón fyrir sig þar sem hann er á bótum og hafi ekki efni á því að tapa slíkum fjárhæðum. Ekki mun þess getið hvort hans 'IQ' sé á við eggjaskurn en mér þykir það þó líklegt.

Ekki var þetta þó það eina vegna þess að annar maður sótti sér dóterí með ólöglegum hætti innan úr húsi og tilkynnti það eigandanum í gegnum síma að hafa séð einhvurn fara inn í húsið. Sá hringdi á lögreglu sem staðfesti það en eftir smá hugsanaflipp féll grunur þeirra á tilkynnanda og eftir að hluti þýfis fannst í fórum hans var hann handtekinn. Svona lagað hefur verið reynt áður, að leiða grun frá sér með því að tengja sig málinu frá upphafi með misvísandi leiðbeiningum, svona einsog í amerískum bíómyndum. Lögreglan hér er ekki eins vitlaus og menn vilja halda fram.

Ég vil næst taka svona fólk og múlbinda það því það kemur óorði á restina af okkur.

Ég hef sjálfur orðið uppvís að einhverjum heimskupörum en aldrei myndi ég láta mér detta það il hugar að tilkynna eigið innbrot eða játa á mig vilja til fíkniefnaviðskipta, bara svo fólk einsog ég geti hlegið að því á vísir.is.

Facebook er sniðugt tæki til ýmissa nota. Þess má geta að maður einn, eftir að hafa rifið kjaft á síðunni góðu fékk í vinnuna til sín fjóra drengi með riffil í hönd komna til að sýna honum fram á að það að rífa við þá kjaft opinberlega hafi ekki verið góð hugmynd.

Er Ísland og þegnar þess að fara hraðar til andskotans en við upprunalega héldum?