Af og til renna upp dagar sem ættu ekki að rísa.
Í óbyggðum skína oft stjörnur sem engum lýsa.
Hið albesta kvæði vill enda sem lausavísa.
Mikið óhemju tekur hún á þessi fjandans krísa.

Viðmiðið besta fann Ómar - sinn Uppsalagísla.
Alltaf er gaman að hvetja til annarra písla.
En hversu sem mönnunum þokar og mikið þeir sýsla
mælist oft tilveran leiðinleg rannsóknarskýrsla.

Hversu allt var nú betra hér forðum og fyrrum í den.
Af fortíðarþránni ég sviðna og loga og brenn.
Þótt fórnað ég hafi mér fyrir allt vont í senn
fóru nú löngum í hundana betri menn.