Röflskúfar 2.

-Útbreiðsla.

-Því hefur verið haldið fram að landnámsmenn og íslenska sauðkindin hafi eytt kjarrlendi á íslandi. Mér er til efs að áhrif Röflskúfa á gróður hafi verið metin með fullnægjandi hætti. Eins og komið hefur fram þá eru Röflskúfar jórturapar og afar þurftafrekir. Útbreiðsla þeirra hefur því takmarkast af gróðurlendi. Því finnast þeir nú um stundir helst í uppsveitum Árnessýslu, í nágrenni Akureyrar og í Borgarfirði. Á höfuðborgarsvæðinu er helst að finna Röflskúfa við Austurvöll, í Laugardalnum, Miklatúni og á hátíðlegum stundum í kringum umhverfisráðherra.

-Félagsleg áhrif.

-Röflskúfar hafa víða brotið sér land meðal stjórnmálahreyfinga, helst meðal markaðs og nýhyggjusinna. Enda nýjungagjarnir og uppátektarsamir. Helsti styrkur Röflskúfa er sá að láta ekki samvisku eða siðferðisspurningar rugla sig í ríminu, því hafa þeir náð langt sem stjórnskörungar. Vissulega veldur það almennum borgurum ákveðnum vandkvæðum hve samviskulausir og siðdaprir Röflskúfar eru, en á hinn bóginn nýtist það Röflskúfum afar vel því þeir velkjast aldrei í vafa um að þeir hafi rétt fyrir sér. Sannfæring þeirra um eigin ágæti er óhagganleg í þeirra huga. Þjóðfélagslegt umburðarlyndi gagnvart kynferðislegum nýjungum, vímandi inntökuefnum, fjárhagslegum fjölbreytileika auk eymdar og alsnægta meðal þegnanna má þakka víðsýnum Röflskúfum.

-Eiginleikar.

-Röflskúfar eru líkamlega illa fallnir til handverks og erfiðisvinnu, auk þess sem þeir gera sér enga grein fyrir orsök og afleiðingu. Þ.e hvort kemur á undan hinu. Því hafa þeir valist til stjórnunar og umsýslustarfa. Landbúnaðarráðuneytið hefur notið sérstaklega góðs af starfskröftum Röflskúfa. Einnig má finna talsvert af Röflskúfum í bakherbergjum Orkuveitu Reykjavíkur og í Seðlabankanum. Hið háa Alþingi hefur verið undirlagt í Röflskúfum um langan aldur. En þar sem Röflskúfar eru afskaplega vinnusamir og geðþekkir lítur almenningur framhjá ambögum þeirra og því tjóni sem þeir vinna á Íslensku mannlífi. Síðustu misseri hafa Röflskúfar verið að festa rætur í bankakerfinu, en það kemur sér fremur illa því líkamsstarfssemi þeirra krefst þess að þeir éti pappír til þess að bæta meltinguna. Nýlegar launakröfur æðstu Röflskúfa í bankakerfinu ollu uppnámi og ættflokkadeilum meðal þeirra. Sumir Röflskúfar gengu meira segja svo langt að taka pappírsforða sinn úr geymslum bankanna.