Ég er búin að vera viðloðandi Gestapó í ansi mörg ár, og flesta eða alla daga sem ég er nálægt tölvu á annað borð hef ég kíkt hingað inn. Bullað, leiðst, skemmt mér, glaðst og sárnað, veitt og fengið stuðning og undanfarin 1000 ár tekið þátt í mafíuleikjunum.
Síðustu mörg ár hefur ritstjórn hætt að sinna svæðinu, sem sést meðal annars á því að nýjir póar fá ekki einkennismynd. Það eru engar myndir í safninu, og Enter virðist ekki svara pósti lengur þegar menn leita til hans beint og eru þá væntanlega búnir að finna sjálfir flotta mynd. Þannig að helmingurinn af mafíuspilurunum, allir þessir nýju, eru með apaklær og allir eins.
Svo tók ég eftir að apaklærnar voru bara á mafíuþráðunum, og ég áttaði mig á því að líklega lesa þeir ekki allt hitt bullið í okkur gamla litríka fólkinu. Þá vaknaði hugmyndin að laumupúkaleiknum.

Hugmyndin óx og dafnaði og þegar vel heppnuðum leik var lokið í vor og eitthvert tómarúm skapaðist, ákvað ég að láta til skarar skríða. Ég kynnti leikinn og tók fram að leiknum gæti lokið snögglega (afar mikilvægt atriði) og í upphafsinnlegginu kom fram að leikurinn væri siðlaus, eða allavega að eitthvert siðleysi ætti sér stað. Þetta var um miðjan júní og mér fannst ég hafa allan heimsins tíma.
Það tók viku að starta leiknum, skráningarþráður og svona. Síðan taldi ég hvað margir væru með apaskott, þeir áttu að vera í mafíunni, en fimm á móti sex var ekki sniðugt hlutfall. Þannig að ég setti górillurnar fimm í öfuga stafrófsröð og gaf þeim númer, og kastaði svo teningum á þræðinum Tala dýrsins. Ég þurfti að kasta tvisvar því þó ég kastaði fjórum teningum fyrst kom sama talan tvisvar, þannig að fremsta talan í næsta (rétta) kasti var látin gilda líka. Þetta lenti neðst á síðu þannig að líkega hefur enginn séð þetta.
En sabbtug varð þorpsbúi með þessu móti. Uglustrákurinn bættist við eftir þessar aðgerðir, hann fékk að vera vannabí mafíósi, og var það hugsað þannig að ef einn mafíósi væri eftir og uglustrákurinn enn á lífi mætti mafiósinn velja að stækka mafíuna um þennan aðila, en ekki þó þannig að það myndi þýða sigur mafíunnar í einu vettvangi.
Síðan setti ég allt klabbið í mafíumeðhjálparann til að fá sannfærandi orðalag á hlutverkapóstum. Ég valdi 2-3 lækna hjá þorpsbúum, fékk tvo sem voru báðir þorpsbúar svo það fékk að standa, en vildi engar löggur og enga frímúrara, því allir þorpsbúar höfðu möguleika á að verða ofurlöggur. Þess vegna var enginn guðfaðir hjá mafíunni, en þeir fengu þó bæði blokkara og njósnara. Svo setti ég rétt nöfn í rétta pósta og sendi.
Ég setti tilkynningar á leynda staði um hverjir væru í mafíunni, með hvaða hlutverk, og það fylgdi með að ef þeir fyndu þetta þá myndi mafían vinna.

Svo hófst leikurinn og ég byrjaði að gefa vísbendingar um þessa leyndu staði á öðrum þráðum. Enginn fattaði neitt. Ég hintaði og ég hintaði og ... ... (á innsoginu) og ég hintaði og ég hintaði og ég .... (aftur á útsoginu) og hintaði en enginn fattaði neitt. Ekki einu sinni tvíræðnina í nafninu á leiknum!
Ég var voða hæversk í vísbendingunum í byrjun og líklega vonlaust fyrir nokkurn að skilja neitt. Svo áttaði ég mig smátt og smátt á að flestir þorpsbúar lásu heldur ekki neitt nema mafíuþræðina, þannig að það væru afar fáir sem hefðu möguleika á að fatta hvað var í gangi.
Allt í einu fannst mér áttundi ágúst vera rétt handan við hornið, en þá fer ég frá minni tölvu, en ég þarf að vera þar til að geta almennilega séð um þennan leik. Ég setti þá hina og þessa hvata í leikinn til að flýta honum, til dæmis þvingaða henginu og að gefa skotmanninum skotleyfi. (Siðlaust, ég veit, en það var gefið að það mætti).
Á þriðja degi var mafían komin með yfirburðastöðu. Þeir voru þrír á móti fimm löggu- og frímúraralausum og eiginlega læknislausum þorpsbúum. Ég hafði val um það að láta leikinn bara klárast þannig, en gerði úrslitatilraun til að einhverjir þorpsbúar föttuðu leikinn. Það tókst svo vel að það voru allt í einu komnar tvær ofurlöggur og frímúrarar, sem breytti stöðunni talsvert.
Að þriðja degi loknum urðu skilyrðin fyrir stækkun mafíunnar raunveruleiki. Ef mafíudráp myndi heppnast yrði hlutfallið 4 þorpsbúar á móti einum mafíósa, ef einn þorpsbúi skipti um lið yrði hlutfallið 3/2. Þannig varð það, vannabíinn varð mafíósi og ég gaf vísbendingar. Einn þorpsbúi enn kveikti á perunni um nóttina og stækkanlega frímúrarareglan Hvert skal halda varð til. Í lok nætur var mafíósunum enn einu sinni sagt að þeir gætu unnið snögglega án þess að segja þeim hvernig, til dæmis minntist ég ekki á að með því að lesa aðra þræði væri hægt að komast áleiðis. Ég varð hins vegar sífellt nákvæmari í vísbendingunum.
Um hásumarið kom fyrir að fólk hvarf dögum saman. Ofurlaumupúkunarreglan varð til svo hægt væri að komast eitthvað áleiðis þó ekki kæmi atkvæði frá þeim tiltekna aðila.
Og nú er leiknum lokið. Ég vona að enginn verði sár og einhverjir hafi skemmt sér, dauðir og lifandi. Þeir sem finna laumustaðina ættu auðvitað að þegja yfir hvar þeir eru, þó þeir geti alveg gortað yfir því að hafa fundið þá.
Takk fyrir mig, þetta var langdreginn hrekkur og tók stundum á taugarnar, en það var samt gaman.