— GESTAPÓ —
Í uppáhaldi:
Félagsrit:
Vladimir Fuckov
Friðargæsluliði.
Heiðursgestur og  sagnaþulur.
Pistlingur - 9/12/03
Heppilegasta lengd sumarfría

Hvers vegna er hún óþekkt ?

05.09.2004

Nú er eigi mjög langt liðið frá því er sumarfríi voru lauk. Vorum vér eigi orðnir leiðir á að vera í fríi í lok þess heldur hefðum vér þvert á móti getað hugsað oss að vera lengur í fríi. Raunar höfum vér aldrei verið orðnir leiðir á sumarfríi í lok þess, m.a.s. eigi í lok þess lengsta (um 5 vikur samfellt). Eigi ber að skilja þetta sem merki um að vinna vor sé óbærilega leiðinleg heldur frekar að eigi eigum vér erfitt með að finna oss eitthvað að gera í frítíma vorum. Þetta varð oss hinsvegar tilefni athyglisverðra og nýstárlegra hugleiðinga: Hvers vegna í sumarfríssjúkum simpönsum hefur aldrei neinum dottið í hug að gera umfangsmiklar rannsóknir á heppilegustu lengd sumarfría ? Nú má líklegt telja að fólk standi sig betur í vinnu ef það á sér enga aðra ósk heitari en að mæta til vinnu en slíkt getur gerst eftir (of) langt frí.

Slík rannsókn myndi að sjálfsögðu felast í að fá stóran hóp tilraunadýra/sjálfboðaliða er síðan væru í fríi mislengi. Hversu lengi yrði einstaklingsbundið og réðist af því hvenær þeim tímapunkti væri náð að viðkomandi tilraunadýr vildi frekar mæta til vinnu en vera áfram í fríi. Að sjálfsögðu yrði að kanna eftir hve langan tíma sá tímapunktur kæmi með tilliti til hver aldur tilraunadýrsins væri, eftir því á hvaða árstíma frí væri tekið o.m.fl. Þá þyrfti einnig að kanna hvort lengd frís hjá sama einstaklingi yrði breytileg milli ára eftir veðri og ýmsum ytri aðstæðum, kanna hvort lengd frís myndi breytast eftir aldri, kyni, búsetu, starfi o.s.frv. Tæki rannsóknin því mörg ár og yrði tilraunadýrunum að vera það ljóst áður en þátttaka þeirra í rannsókninni hæfist. Er eigi að efa að niðurstöðurnar yrðu afar áhugaverðar og yrði með þessu unnt að ná aukinni þjóðhagslegri hagkvæmni með því að hætta að neyða þá í langt frí er eigi kæra sig um slíkt en aðrir myndu mæta þeim mun endurnærðari og vinnuglaðari til vinnu á ný eftir frí er væri nákvæmlega af þeirri lengd er þeim hentaði best.

Nú þarf bara einhver að gera svona rannsókn. Vegna þess að hugmyndin að þessu er frá oss komin yrði eflaust óskað eftir þátttöku vorri. Er jafnframt ljóst að vegna þess að hugmyndin er frá oss komin gætum vér eigi mælst undan þessum augljóslega fyrirsjáanlegu óskum um að taka þátt sem tilraunadýr. Að þessu tilefni viljum vér nota tækifærið og vísa til föðurhúsanna auðfyrirsjáanlegum vangaveltum um að vér séum að bjóða oss fram til þessa í þeim tilgangi einum að fá lengra sumarfrí. Til þeirra er láta sér detta slíkt í hug: Skamm ! (og þið eruð eigi hepppileg tilraunadýr).

PS Þar eð pistlingur þessi snertir að ýmsu leyti eigi ósvipað efni og sumarfríspistlingur vor frá 17.08.2004 er við hæfi að rifja upp eftirfarandi orð vor úr þeim pistlingi og tengjast þau Víti í Öskju:

"Augun segja e.t.v. meira en þúsund myndir og því erfitt að sýna þetta á myndum. Nú bölvum vér því samt að eigi skuli vera mögulegt að senda hér inn myndir því þá myndum vér e.t.v. reyna að sanna mál vort með birtingu á 'tveggja hæða' (5x2) panoramamynd er vér tókum af stað þessum standandi á gígbarminum (spurning er hvort vér laumum myndinni inn einhversstaðar annarsstaðar við tækifæri ef vér nennum)".

Nú er alkunna að hér á Gestapó er máttur hins ritaða orðs mikils metinn og eigi mikið um myndir nema þá af gestum. Höfum vér samt ákveðið að notfæra oss tækniundur eitt eigi all lítið er veraldarvefur nefnist til að gestir hér geti metið hvort umrædd panoramamynd segi meira en þúsund orð. Vonum vér að svona nýjungagirni mælist eigi of illa fyrir og að vér fáum eigi yfir oss skæðadrífu mótmælaskilaboða í kjölfarið. Umrædda mynd má semsagt sjá á:

http://www.pbase.com/vladimir_fu/2004 (best er að velja stærð sem 'original')

Mynd þessi er dálítið 'Photoshoppuð' til að losna við samskeyti milli mynda o.fl. og er eigi nálægt því jafn flott og að sjá þetta með eigin augum (litadýrðin ofan í gígnum var meiri) en vér höfum samt á tilfinningunni að hún segi meira en þúsund orð, þrátt fyrir mikinn mátt orðsins hér á Gestapó.

   (65 af 102)  
Vladimir Fuckov:
  • Fæðing hér: 20/8/03 21:21
  • Síðast á ferli: 23/8/23 21:21
  • Innlegg: 19773
Eðli:
Forseti Baggalútíu. Kóbalt- og hergagnaframleiðsluráðherra og viðskiptaráðherra Baggalútíu. Æðstiklerkur Skipulagsstofnunar Hreintrúarflokksins. Eigandi sálar Ég sjálfs (eða hvernig sem það nafn fallbeygist). Rocket scientist. Stofnandi Nátthrafnasamtaka Baggalútíu (NHS-B). Erkilaumupúki.Flöt jörð, slétt föt, hrein trú !
Fræðasvið:
Rocket science, life, the universe and everything
Æviágrip:
Vjer fæddumst í Rússlandi, að líkindum seint á 19.öld eða snemma á síðustu öld en munum eigi hvenær, vorum of ungir er það gerðist til að muna eftir því. Snemma hófum vjer tilraunakenndar eldflaugasmíðar og vorum óvart næstum búnir að þurrka megnið af Síberíu út við tilraunageimskot í Tunguska. Þar vorum vjer þó heppnir þvi eigi komst hitinn og eldurinn í kóbalt vort. Síðar lukum vjer doktorsnámi í eldflaugaverkfræði og efna- og eðlisfræði kóbalts svo og í notkun tölva til stjórnunar á gjöreyðingarvopnum og flúðum að því loknu land til að stunda tilraunir á eigin vegum víðsvegar um heim. Seint á árinu 2003 urðu tímamót í rannsóknum vorum er vjer skruppum í svaðilför mikla til Rússlands og stálum þar gjöreyðingarvopni því er elipton nefnist. Er vopn þetta núna mikilvægur liður í því að tryggja stöðu Baggalútíu sem stórveldis og hefur því stöku sinnum verið beitt gegn óvinum ríkisins. Nýlega hófum vjer síðan umfangsmiklar rannsóknir á hagnýtingu plútóníums, einkum til hálkuvarna og götulýsingar, t.d. á Hellisheiði.