— GESTAPÓ —
Í uppáhaldi:
Félagsrit:
Vladimir Fuckov
Friðargæsluliði.
Heiðursgestur og  sagnaþulur.
Pistlingur - 31/10/03
Byrjandabragur

Hvatning til gesta er telja kveðskap ofar sinni getu en hafa samt áhuga

23.7.2004

Um mánaðamót júní/júlí datt oss skyndilega í hug sú nýlunda að reyna fyrir oss í kveðskap hér á Baggalúti. Reyndar höfðum vér áður prófað það einstaka sinnum en þar var á ferðinni skelfilegur leirburður því bragfræði höfðum vér eigi kynnt oss. Helstu tilefni þess að vér ákváðum að prófa voru pistlingur Skabba (sjá http://www.baggalutur.is/profile.php?mode=viewprofile& amp;u=90&n=717 [tengill] hér [/tengill]) og svar Enters við fyrirspurn, sjá http://www.baggalutur.is/viewtopic.php?t=2569 [tengill] hér [/tengill]).

Hér á eftir kemur lausleg lýsing á hvernig þetta hefur gengið hjá oss ef verða skyldi öðrum byrjendum til hvatningar og gagns og ef einhverjum er eigi hefur reynt fyrir sér dytti í hug að prófa þetta. Vér ákváðum að lýsa reynslu vorri af þessu núna meðan vér höfum sjónarhorn byrjanda á þetta; eftir nokkra mánuði er eigi ólíklegt að vér verðum búnir að gleyma þessu að verulegu leyti. Og svo það sé á hreinu þá teljum vér oss enn óralangt frá því að vera fullnuma á þessu sviði en það erfiðasta kann að vera að baki.

Fyrsta skrefið hjá oss var að kynna oss bragfræði á
http://rimur.is/?i=4 [tengill] http://rimur.is/?i=4 [/tengill] og á
http://www.heimskringla.net/bragur/Default.asp [tengill] http://www.heimskringla.net/bragur/Default.asp [/tengill]

Vér kynntum oss fyrst einungis einföldustu grundvallarreglur um stuðla, höfuðstafi og rím enda eigi á dagskrá að gera eitthvað virkilega flott eða flókið í byrjun (það hefði misheppnast). Síðan fórum vér að senda frá oss kveðskap, yfirleitt a.m.k. einu sinni á dag, til að komast í æfingu. Þetta gekk afar brösuglega í byrjun, aðallega því vér vildum hafa kveðskapinn bragfræðilega réttan (sem eftir á að hyggja tókst eigi alltaf). Tók oss því yfirleitt mjög langan tíma að hnoða saman stöku (oft hálftíma eða meira, metið er um 3 klst. en þar var reyndar á ferð nokkuð flókinn kveðskapur). Óttuðumst vér m.a.s. í byrjun að um væri að ræða meðfæddan hæfileika er einungis útvaldir hefðu en vér eigi. Brátt skánaði þó kveðskapurinn heldur og hraðinn jókst lítillega. Allt gerðist þetta með aðstoð blaðs og blýants því blaðlaust getum vér þetta eigi, a.m.k. eigi enn sem komið er. Einnig fórum vér að koma oss upp ýmsum aðferðum/vinnubrögðum við kveðskapinn er oss datt í hug að nota, t.d. sú sannkallaða 'brute force' aðferð að renna hreinlega í gegnum allt stafrófið frá A til Ö í huganum í leit að rímorðum í stað óskipulegri aðferða. Nokkuð hliðstæða aðferð notum vér stundum líka í tengslum við stuðla og höfuðstafi til að finna heppileg orð. Allar þessar aðferðir urðum vér að 'finna upp' því hvergi höfum vér rekist á umfjöllun um hvernig sé best að gera svona nokkuð - vér höfum einungis séð umfjöllun um bragfræði.

8. júlí sl. hittust nokkrir Baggalýtingar er Haraldur Austmann kom í bæinn en hann er hagmæltur vel. Urðu þá m.a. fróðlegar umræður um kveðskap og reyndist sumt af því oss gagnlegt. Þar kom oss nokkuð á óvart að sú að oss fannst frumstæða aðferð að fara gegnum allt stafrófið í huganum í leit að (rím)orðum er líklega algeng. Einnig var það oss hálfgerð opinberun að það geti verið gott að byrja á að ákveða hvernig síðasta línan á að vera í stað þess að byrja á fyrstu línunni. Er á þann hátt auðveldara að koma saman hnyttnum kveðskap en í slíkum kveðskap er einmitt sérlega mikilvægt að síðasta línan sé vel heppnuð (hinar hámenningarlegu samkomur Baggalýtinga geta semsagt verið hið mesta þarfaþing og leggjum vér hér með opinberlega til að þær verði fleiri - spurning með e.k. 'skáldskaparkvöld' kannski ?!).

Næstu daga eftir þetta notfærðum vér oss m.a. þessa nýju vitneskju til að reyna að bæta heldur gæði kveðskaparins en þó sérstaklega til að auka hraðann. Breytingar voru þó fremur hægar þar til hraðinn skyndilega margfaldaðist á tímabilinu 17-19. júlí. Varð þá skyndilega all algengt að vér þyrftum innan við 5 mínútur (alloft mun minna) á hverja stöku í stað hálftíma eða meira í byrjun. Auk þess grunar oss að kveðskapur vor hafi jafnframt í heild orðið minna 'stirðbusalegur' þó aðrir verði eiginlega að dæma um slíkt. Er oss eigi alveg ljóst hvað gerðist á áðurnefndum þremur dögum, líklega hafa áhrif 'kveðskaparæfinga' undangenginna vikna komið svona skyndilega fram í stað þess að gera það smátt og smátt. En semsagt, rúmum 2 vikum eftir að vér byrjuðum var tíminn er í þetta fór orðinn skikkanlegur (þ.e. oft um 5 mín. í stað hálftíma eða meira). Þýðir þetta að vér erum núna afkastameiri sem svo vonandi þýðir hraðari framfarir en það verður framtíðin að leiða í ljós.

Til fróðleiks er hér hraðametið hjá oss, nýlegur botn er varð til á um einni mínútu en fyrriparturinn er eigi eftir oss:

Það þykir gaman
að þegja saman
segir sæta daman
sæl og glöð í framan

Til samanburðar tók botninn í eftirfarandi óratíma enda varð þetta til í byrjun júlí. Og eigi er þessi botn betri nema síður sé þrátt fyrir tímann er í hann fór:

Er veðrið er á varðri grund
vart skal hafa í huga
Hæðum fylgir heiðríkj'um stund
hátt þá suðar fluga

Í stuttu máli: Fyrstu vikuna tók óratíma að hnoða saman einhverju af viti og var útkoman oft eigi mjög góð. Vika 2 var heldur skárri. Í upphafi viku 3 urðu síðan stórstígar framfarir, sérstaklega í hraða. Framfarirnar verða semsagt ekki endilega smám saman og jafnt heldur geta komið í stórum stökkum á mjög stuttum tíma og fátt síðan gerst milli slíkra stökka. Þetta er þó örugglega einstaklingsbundið.

Niðurstaða vor er sú að kveðskaparhæfileikar séu eigi meðfæddir nema að litlu leyti, þetta er aðallega spurning um æfingu. Teljum vér því líklegt að flestir gestir hér er á annað borð hefðu áhuga á að prófa þetta gætu komist á bragðið. Það þarf bara dálitla þolinmæði í byrjun. Í tilfelli voru var þar sérstaklega um að ræða fyrstu tvær vikurnar. Vér erum þó langt í frá fullnuma á þessu sviði og stöndum þeim bestu hér óralangt að baki.

Að lokum ber þess að geta að þetta hefur eigi verið jafn mikil vinna og e.t.v. kann að virðast af pistlingi þessum. Ef þetta virðist hafa verið mikil vinna stafar það aðallega af því að pistlingur þessi er nokkuð ítarlegur (e.t.v. einum of).

   (71 af 102)  
2/12/07 06:01

Regína

Jamm, ég var að hugsa um að henda þessu úr uppáhaldinu, en las það aftur og steinhætti við. Þetta er eitthvað svipað minni reynslu nema ég hafði eitthvað meiri grunn í bragfræði fyrir.
En það mættu fleiri reyna aðferð Vladimirs og æfa sig. Æfingin og þekkingin er það sem skapar hagyrðing.

2/12/07 06:00

Andþór

Ég lærði þetta nákvæmlega eins og Vladimir.

4/12/07 13:02

hvurslags

Nákvæmlega! Gott félagsrit.

9/12/07 06:01

Wayne Gretzky

Ég líka..

Vladimir Fuckov:
  • Fæðing hér: 20/8/03 21:21
  • Síðast á ferli: 23/8/23 21:21
  • Innlegg: 19773
Eðli:
Forseti Baggalútíu. Kóbalt- og hergagnaframleiðsluráðherra og viðskiptaráðherra Baggalútíu. Æðstiklerkur Skipulagsstofnunar Hreintrúarflokksins. Eigandi sálar Ég sjálfs (eða hvernig sem það nafn fallbeygist). Rocket scientist. Stofnandi Nátthrafnasamtaka Baggalútíu (NHS-B). Erkilaumupúki.Flöt jörð, slétt föt, hrein trú !
Fræðasvið:
Rocket science, life, the universe and everything
Æviágrip:
Vjer fæddumst í Rússlandi, að líkindum seint á 19.öld eða snemma á síðustu öld en munum eigi hvenær, vorum of ungir er það gerðist til að muna eftir því. Snemma hófum vjer tilraunakenndar eldflaugasmíðar og vorum óvart næstum búnir að þurrka megnið af Síberíu út við tilraunageimskot í Tunguska. Þar vorum vjer þó heppnir þvi eigi komst hitinn og eldurinn í kóbalt vort. Síðar lukum vjer doktorsnámi í eldflaugaverkfræði og efna- og eðlisfræði kóbalts svo og í notkun tölva til stjórnunar á gjöreyðingarvopnum og flúðum að því loknu land til að stunda tilraunir á eigin vegum víðsvegar um heim. Seint á árinu 2003 urðu tímamót í rannsóknum vorum er vjer skruppum í svaðilför mikla til Rússlands og stálum þar gjöreyðingarvopni því er elipton nefnist. Er vopn þetta núna mikilvægur liður í því að tryggja stöðu Baggalútíu sem stórveldis og hefur því stöku sinnum verið beitt gegn óvinum ríkisins. Nýlega hófum vjer síðan umfangsmiklar rannsóknir á hagnýtingu plútóníums, einkum til hálkuvarna og götulýsingar, t.d. á Hellisheiði.