Hin fullkomna lausn fundin á ýmsum vandamálum
Lengi hefur staðið til hjá oss að birta hjer fjelagsrit um tímavjelar. Sökum almennrar leti hefur eigi orðið af því þrátt fyrir góð áform. En nú er hin fullkomna lausn fundin, lausn sem með hliðsjón af vandamálinu er svo augljós að oss datt hún ei fyrr í hug. Lausn sem gagnast gæti við ýmislegt fleira.
Lausnin er sú að nota einfaldlega tímavjel til að fara nógu langt fram í tímann (t.d. til ársins 2020) til að vjer sjeum þá örugglega búnir að koma því í verk að rita umrætt fjelagsrit. Sækja fjelagsritið þannig fram í framtíðina og birta það svo hjer. Vegna þess að vjer getum með því móti birt fjelagsritið strax (en ekki einhverntíma í framtíðinni) losnum vjer þannig algjörlega við að þurfa einhverntíma í framtíðinni að semja það því þá verðum vjer þegar búnir að birta það hjer.
Oss er reyndar ekki alveg ljóst hvernig fjelagsritið nær að verða til í atburðarásinni sem lýst er hjer að ofan en það er aukaatriði. Aðalatriðið er að hægt verður að birta það innan tíðar án þess að þurfa nokkurntíma að eyða neinni vinnu í að semja það en samt verður það samið af oss Ljómar upp. Þessi aðferð getur svo að sjálfsögðu gagnast við ýmislegt fleira en fjelagsritaritun, t.d. kóbaltsöfnun.
Til að eigi verði neinn misskilningur er svo að lokum nauðsynlegt að geta þess að eigi er þetta fjelagsrit umrætt fjelagsrit (ef að líkum lætur).
Þessi góða hugmynd forsetans minnir oss á er vjer lærðum að klippa og líma. Það var mikil framför á þeim tíma, og hefðum vjer þá gjarnan hafa haft yfir tímavjel að ráða. Vjer hlökkum til að sjá umrætt fjelagrit, en verðum að bíða, þar sem vjer höfum eigi yfirráð yfir slíkri vjel.
Er þetta ekki félagsritið? Þetta félagsrit er um notkun tímavélar til að birta félagsrit, svo það má segja að það sé um tímavél. Nú langar mig að vita hvort þú hafir kannski náð í þetta félagsrit með tímavélinni og því sé í raun ekki búið að semja það núna, heldur hafi það verið gert framtíðinni og nú sér þú búinn að birta það í nútíðinni og þarft því ekki að semja það í hinni raunverulegu framtíð af því þú ert þegar búinn að því, sem gerir það að verkum að ritið var bæði samið og ekki.
[Verður áttavillt]
Veistu, ég veit ekki hvenaær ég á að gefa þér viðbrögð við þessu frábæra riti en það er mögulegt að ég semji svar í framtíðinni sem þú getur séð áður en þú snýrð aftur með tímavélinni. [Glottir eins og fífl]
Þar eð ég hefi yfir tímavél að ráða og er búinn að skreppa fram í tímann, þá vil ég bara segja þér það að það finnst ekkert tímavélafélagsrit í fyrirsjáanlegri framtíð. Þykir mér það líklegast að sökum ódugnaðar, þá munir þú ekki koma því í verk hvorki í náinni eða fjarlægri framtíð, að rita margumrætt félagsrit.
auk þess sem nokkuð ljóst er að ef þú ferð fram í tímann í þessu skyni í framtíðinni þá ættir þú að vera búinn að birta það í fortíðinni því varla er ástæða til að endurbirta félagsrit úr framtíðinni í framtíðinni heldur frekar fortíðinni.
Ég er ekki nógu greindur til að skrifa hnyttna athugasemd við þetta félagsrit. Vonandi verð ég það í framtíðinni.
Fyrir nokkrum vikum rákumst vjer einmitt á sjerlega hnyttna athugasemd frá yður við þetta fjelagsrit. Því miður munum vjer eigi hvenær í framtíðinni hún var rituð.
En þar sem þetta félagsrit hefur birst áður (þ.e. í framtíðinni), er þetta þá ekki nokkurskonar ritþjófnaður?
Og þarf maður þá að skrifa orð í belg við sama félagsrit aftur eftir nokkur ár? Þetta er allt of flókið.
[Rífur í parukkið svo púðrið flýgur - hverfur í parukkspúðurreyk]
Þetta svar var einmitt skrifað með því að fara fram í tímann og finna þar svar eftir mig. Verst að það er svona lélegt og innihaldslaust.
Hafið þið nokkuð séð einhvers staðar á þessu flakki hvort ég hef svarað ritinu?
Þjer hafið ekki gert það þannig að oss er með öllu óskiljanlegt hvernig stendur á því að þessi spurning yðar er hjer.
Ef nokkurntíma hefur verið ástæða tilað nota orðalagið "tímalaus" snilld, þá er það einmitt núna. Eða síðar. Eða fyrr & síðar. Eða fyrr & nú. Eða einhverntímann.