Í fyrsta lagi, ef að þú ert ósýnilegur þá bið ég þig að vera ekki að eyða mikilvægum tíma í að lesa þetta. Sért þú hins vegar ósýnilegur og alveg sérlegur áhugamaður um boðflennur þá kannski finnurðu eitthvað sniðugt hér.

Undirbúningur:
Ef laumast á inn á e-n stað óboðinn þá er mjög mikilvægt að taka með sér gott nesti þar sem oft þarf að bíða eftir rétta tækifærinu. Gott nesti er mjög breytilegt eftir smekk hvers og eins en ég mæli með einhverju fyrirferðalitlu þar sem oft þarf viðkomandi að húka á dimmum stað í fleiri klukkustundir í senn. Gott er líka að klæðast ekki of áberandi því þú vilt láta lítið á þér bera. Glimmerhúðaðir samfestingar eða speedo sundskýlur einar fata eru þó sérstaklega varhugaverðar þar sem gangandi vegfarendur væru vel vísir til að hafa samband við lögreglu. Þá ber að hafa í huga að því dimmra sem er úti því minna ljós endurkastast frá þér svo forðist það að reyna að lauma ykkur inn í dagsbirtu.

Framkvæmd
Það getur verið mjög mismunandi eftir aðstæðum hvernig best er að bera sig að. Nú sé t.d. um einkasamkvæmi í heimahúsum að ræða má hafa í huga nokkur góð ráð:

1. Vertu þér út um Dominos búning og tóman pizzakassa og eftirleikurinn ætti að reynast auðveldur. Fólkið gæti hins vegar tekið misvel í það þegar það sér að kassinn er tómur og þá er oft gott að vera á góðum hlaupaskóm, hér er sérstaklega er mælt með nýju Nike Training Thunder línunni.

2. Mun erfiðara er að komast yfir lögreglubúning en því auðveldara er að komast inn. Þegar inn er komið ættu gestgjafar að taka þér fegins hendi þegar þau sjá að þú ert bara kominn til að skemmta þér.

3. Nú ef fólk er orðið mjög ölvað getur reynst gott að lesa einfaldlega á útidyrahurðina og segja bara "blessaður (setja inn nafn á útidyrahurð, hér: Palli) mannstu ekki eftir mér, við vorum saman í Nam árið ´84!" Svo er bara að bíða eftir viðbrögðum og vona það besta.

4. Oft getur verið gott að þekkja einhvern í viðkomandi hópi og er þá oft tekið vel á móti manni. Það getur líka sparað helling af vinnu og tíma og þar sem tíminn er nú ein verðmætasta afurð okkar Gestapóa þá mæli ég eindregið með þessari aðferð.

Nú þá ættu allir að geta fundið sér eitthvað teiti um næstu helgi og óska ég ykkur góðrar skemmtunar. Athugið að þessi bálkur fjallaði bara um samkvæmi í einkahúsum þar sem á samkomustöðum er yfirleitt dyravörður eða annað ódrukkið pakk sem sér fljótt í gegnum slíkar brellur. Þakka ég nú fyrir mitt fyrsta félagsrit og vonast til að losna við þessa ristíflupest sem hefur verið að hrjá mig undanfarið.