Fyrir svona viku síðan lagði ég leið mína í þá ágætu verslunarmiðstöð Kringluna með það í huga að festa kaup á einhverri fallegri afmælisgöf handa henni ömmu minni. Þrátt fyrir þó nokkra leit fann ég ekkert sem mér leist nógu vel á og var hér um bil búin að gefast upp á þessari verslunarferð þegar ég álpast framhjá Skífunni og dettur þá snilldarlega í hug að athuga hvort Köntrískífa Baggalúts sé komin í verslunina. Ég vatt mér inn og hvað sé ég ekki nema skífuna sjálfa í allri sinni dýrð og orðin “Pabbi þarf að vinna” ómuðu í huga mér. Ég ákvað að vera eigingjörn, rétti út höndina, greip plötuna og hljóp....að næsta kassa, borgaði og dreif mig eins og ég gat heim þar sem geisladrifið í tölvunni minni beið átekta. Diskurinn byrjaði að snúast og æðisgengnir banjótónar ómuðu um herbergið og fögur rödd Núma (skilst mér) með. Ég hlustaði á diskinn allan í gegn og í huga mér var ég komin á sveitaball í Kansas með hænsavír, höttum og heyi, svo ekki sé minnst á kynæsandi kúreka að dansa við. Svo hlustaði ég á diskinn aftur og þá voru kúrekarnir orðnir aðeins léttklæddari...nei ég er að stríða. Ég hef ekki hætt að hlusta á þessa skífu síðan ég fékk hana og eignaðist strax nokkur uppáhaldslög svo sem lög nr. 1.Settu brennivín í mjólkurglasið vina, 4. Pabbi þarf að vinna, 5. Hún er stúlkan mín, 7.Kaffi og sígó, 12.Öskjuhlíð og 15. How do you like Iceland? Allir sem hafa hlotið þann heiður að fá að hlusta á þetta meistaraverk eru sammála mér í þeirri skoðun að þetta sé afburðar vel unnin plata, textarnir mjög góðir og skemmtilegir og að hún höfði til eiginlega allra. Ég ákvað meira að segja að festa kaup í öðru eintaki handa henni ömmu minni og líkaði henni mjög vel. Þessi diskur fengi 10 stjörnur ef sá möguleiki væri fyrir hendi, en þar sem 5 eru hámarkið verður það að nægja.

Húrra fyrir “Pabbi þarf að vinna”
Húrra fyrir Baggalút og
Þrefalt húrra fyrir Ritstjórninni.

P.s. Afburðar ánægjulegt var að fá textana á prentuðu formi í bæklingnum ásamt nytsamlegum orðskýringum.