— GESTAPÓ —
Kargur
Heiðursgestur og  skriffinnur.
Dagbók - 3/11/10
Hin fyrstu jól.

Enn eys ég úr drullupolli vizku minnar.

Fyrir hálfum öðrum áratug eyddi ég mínu fyrstu jólum utan æskuheimilis míns. Um haustið hafði ég ráðið mig sem vetrarmann í Bandaríkjahrepp, hvar ég dvaldi um hátíðarnar.
Jólaundirbúningurinn fannst mér nokkuð einkennilegur hjá innfæddum. Þeir hófu hann af krafti í byrjun Nóvember. Undirbúningurinn fólst aðallega í því að dreifa ómerkilegu pjátri um, á og í kringum bústaði sína. Því hallærislegra, því betra; að því mér sýndist.
Húsbóndi minn hafði eitt sinn gegnt herþjónustu fyrir hrepp sinn og naut þeirra forréttinda að sinna skyldum sínum á Íslandi. Þar hafði hann uppgötvað augljósa yfirburði íslenska hestsins og ákveðið að gjörast hrossabóndi þegar hann hætti herskyldu.
Móðir húsbóndans hét að sjálfsögðu Gramma, eins og títt er um kerlingar á hennar reki á þeim slóðum. Gramma var merkileg kerling; hún hafði alist upp við gífurlega fátækt í sveit er kennt er við steikt hænsn. Hún hafði frá mörgu merkilegu að segja. Merkilegast fannst mér hvurnig hún talaði um KKKlanið. Ef hún hefir sagt rétt og satt frá, þá hefir KKKlanið verið voða svipað mæðrastyrksnefnd þegar hún var að alast upp, akkúrat í Kreppunni miðri.
Áður en lengra er haldið verður að minnast á hina tvo vetrarmennina á búgarðinum. Annar var systursonur húsbóndans; próflaus letihaugur með sítt að aftan. Hinn var sonur stríðsfélaga húsbóndans; ekki eins latur, en meira steiktur og reyktur apaköttur.
Gramma hafði afar næmt auga fyrir smekklausu prjáli. Auk þess hafði hún rúmar tómstundir. Þess vegna var hestabúgarðurinn líkastur ódýrri upplýstri plastútgáfu af jólahelvíti.
Um síðir rann Aðangadagur upp, snjólaus og volgur. Engum datt í hug að opna jólapakkana um leið og ég. Ég opnaði pakkana sem höfðu komið að heiman einn og óáreittur. Reyndar opnaði ég þá frekar snemma sökum asnalegs tímamunar á Bandríkjahrepp og uppsveitum Borgarfjarðar. Akkúrat þegar ég var búinn að hringja heim og þakka fyrir góssið komu hinir vetrarmennirnir tveir og kröfðust þess að ég dytti í það með þeim. Sem ég gerði skammlaust.
Daginn eftir, Jóladag, var von á öllum ættingjum Grömmu að eta tröllhænsn nokkut kennt við Tyrkland. Um hádegi mætti skarinn, nokkuð góður þverskurður af staðalímyndum mörlandans af amerískum apaköttum. Að sjálfsögðu hófust kerlingarnar handa við að fullelda tyrkjann og hafa til meðlætið. Við karlmennirnir flúðum ofan í kjallara til að horfa á leik daxins í ameríska ruðningnum. Hvurri árás kvenna og barna á vígi okkar var hrundið af hreinni karlmennsku. Þess ber að geta að karlmennirnir höfðu borið með sér þungar klyfjar mjaðar. Er tröllhænsnið var gegneldað gjörðum við leiftursnöggar árásir á krásirnar, hvar við hrúguðum keti og meðlæti á pappadiska og hurfum aftur ofan í kjallarann áður en kerlingar gátu æst sig.
Þegar líða tók á daginn ákváðu nokkrir ábyrgir fjölskyldufeður að það væri í þeirra verkahring að sýna mér allt það merkilegasta sem sveit þeirra habbbði upp á að bjóða. Til að gjöra laaaaanga sögu stutta þá voru mér sýndar allar gerðir af eðlilegum og óeðlilegum brjóstum sem þesstímatækni habbbði upp á að bjóða. Reyndar hefi ég óljósan grun um að þetta hafi ekki allt verið gjört í mína þágu.

   (3 af 54)  
3/11/10 01:02

Herbjörn Hafralóns

Ég bíð spenntur eftir framhaldinu.

3/11/10 01:02

Kargur

Hvur sagði að það væri framhald?

3/11/10 02:00

Herbjörn Hafralóns

Nú, er þetta ekki fyrsti kaflinn af fimmtíuogtveimur? Þú ferð nú varla að skilja mann eftir í lausu lofti. Hvað var með þessi brjóst?

3/11/10 02:00

Kargur

Ítarlegar rannsóknir mínar á brjóstum kvenna í nýlendu vorri í westri koma síðar.

3/11/10 02:00

Offari

Tókstu myndir?

3/11/10 02:00

Heimskautafroskur

Dýrðarpistill. Skál. Meiri brjóst. Takk.

3/11/10 02:01

Huxi

Skemmtileg og sérlega "jólaleg" jólasaga. Skál, takk og skál.

3/11/10 02:01

Regína

Takk fyrir. Gaman að skyggnast inn í veröld ungra karla.

3/11/10 03:00

krossgata

Er það algengt að fjölskyldufeður í Bandaríkjahreppi eigi brjóstasafn í kjallaranum?

3/11/10 03:02

Kargur

Brjóstin voru geymd ásamt eigendum þeirra á virðulegum samkomustað dannaðra herramanna.

1/12/11 02:01

Golíat

Þakka lesninguna.

1/12/11 12:01

Kiddi Finni

Skemmtilegt að fræðast um framandi þjóðir. Takk!

Kargur:
  • Fæðing hér: 8/5/05 19:39
  • Síðast á ferli: 15/10/23 21:26
  • Innlegg: 10540
Eðli:
Kargur bóndadurgur.
Fræðasvið:
Ekkert sérstaklega fróður um nokkurn skapaðan hlut.
Æviágrip:
Hefur unnið að fullkomnun sérvizkunnar frá unga aldri. Tilnefndur til nóbelsverðlauna í þrjósku árlega. Gafst upp á hefðbundnum búskap fljótlega upp úr fermingu og vann um stund að kynbótum á könum. Lauk þeim farsællega og býr nú heima í heiðardalnum.