Jóla hvað?
Það hlaut að koma að þessu. Ég var farinn að hafa áhyggjur af hátíðarskapi sveitunga minna. En það er búið að redda þessu.
Jólaskrautið er komið upp. Ég er ekki að tala um að búið sé að kveikja á seríu sem aldrei var tekin niður eftir síðustu jól. Nei, plastjólasveinninn sjálfur mættur á plastsleða, með átta plasthreindýr spennt fyrir. Plastjésú var einnig mættur ásamt plastenglum, plastvitringum og plastmaríu-mey. Ég fylltist plasthátíðarskapi þegar ég sá þetta á leiðinni heim áðan.
Svo fylltist ég skömm yfir að vera ekki með neitt plastdrasl á hlaðinu hjá mér. Og jólin alveg að skella á. Fjandinn.
Þetta endar með því að skrautið hengur uppi allt árið því varla tekur orðið að vera að taka það niður fyrir næstu jól.
Mættu bara í verslanirnar á klakanum um þetta leyti. Nú þegar er búið að koma upp jólaskrautinu og jóla-flest-öllu-sem-tönn-á-festir. Svo byrjuðu líka flenniauglýsingar í blöðum að birtast í lok september um að nú væri síðasti séns að panta jólaglöggið og jólahlaðborðin.
Gaman, eða hitt þó heldur. Til að verða ekki kominn með ógeð á jólunum þá verður maður að setja sig í sjálfskipað fjölmiðlastraff og versla bara í Melabúðinni.
Ég pantaði á jólahlaðborð í september. Það er eina jólið sem ég framkvæmi fyrir fyrsta des.
Nei andskotinn hafi það. Ekkert helvítis plastdrasl upp hjá mér eða mínum. Skrautið fer ekki upp fyrr en á 11. desember að góðum og heiðnum sið!
Ég vil jólin strax! Til fjandans með þennan desember. Ég fer í næstu viku niður í Rúmfatalager og kaupi jólaseríur og set þær upp.
Mikið var... kannske maður fari að skrifa jólahugleiðingu... Jóla-skál...
Ég þoli þetta ekki.
Ég hræri ekki við jólaskrauti eða neinu slíku fyrr en í fyrsta lagi 1. des.
Mig langar samt í snjó!
Ég stend nú ekki í svoleiðis, mamma er væntanleg og hún kann sko að taka niður skraut. Annars vænti ég þess að plastgraskerið sem þú settir á veröndina fjúki bráðum, alvörugraskerið mun leka niður þegar það frýs. Ekkert mál.