Örlítil hugvekja.
Smáatriði eru yndisleg. Litlir hlutir eða atburðir sem vekja hjá manni ómælda gleði, þrátt fyrir óáberandi og jafnvel tilgangslausa tilveru. Hlutir eins og sturtusápa með jarðarberjalykt, varasalvi með góðu bragði, lyktin af manneskju sem maður elskar, nýr blýantur, ilmkerti, vel pússuð og kristaltær myndavélalinsa, stjörnubjartur himinn, knús, tilefnislaus gjöf, að uppgötva þúsundkall í jakkavasanum, að vera fyrirgefið, rigning, að vera stolt annarra, eða að fá frítt Malt frá vini - og hafa ekki beðið um það.
Nú er ég bara að nefna það sem gerir mig hamingjusama, vera má að þið mynduð nefna eitthvað allt annað. Ef maður hugsar um það, áttar maður sig á því að það væri erfitt að lifa án allra þessara smáatriða sem veita gleði í litlu magni á hverjum degi. Margt smátt gerir eitt stórt, ekki satt? Prófið að taka eftir litlu hlutunum - þeir eiga skilið smá athygli fyrir allt sem þeir gefa okkur.
Litlu hlutirnir rokka! Sjálf elska ég t.d. tré, sápukúlur, að fá blóm frá einhverjum þó það sé ekki nema einn fífill, eiginlega bara betra þegar það er þannig en ekki rándýr vöndur finnst mér . Oh æðislegt félagsrit Furða...út af því er ég farin að hugsa um litla hluti og bara það eitt að hugsa um þá lætur mig brosa eins og sól í heiði. Takk.
Það að gera sér far um að sjá litlu hlutina, er lífsstíll sem Riddarinn tileinkaði sér snemma. Frábær hugvekja Furða mín.
Algjörlega sammála þessu öllu saman. Þessir litlu hlutir geta haft gífurlega áhrif á líðan manns. Einstaklega vel heppnuð hugvekja.
Að uppgötva þúsundkall í vasanum, briljant. Ég átti einu sinni soap on a roap sem mér þótti undarlega vænt um, svona rakspírailmsápa sem hægt var að hengja upp á bandi sem var steypt inn í það nú eða hengja sápun um hálsinn.
Litlu hlutirnir eru dásamlegir. Ég hugsa um þá og tek eftir þeim á hverjum degi.
Það er til dæmis stórmál að eignast barn, því fylgir oftast mikil hamingja. Það sem viðheldur þessari hamingju eru svo allir litlu hlutirnir tengdir barninu.
Ég er t.d. sjaldan hamingjusamari en þegar sonur minn segir að ég sé besta mamma eða býr til alveg nýtt orð til þess að reyna að útskýra hvað hann meinar.
Orð í tíma töluð Furðuvera. Ég legg mig í Lima og tek eftir litlu hlutunum sem gefa lífinu gildi.