— GESTAPÓ —
Í uppáhaldi:
Félagsrit:
Tina St.Sebastian
Heiðursgestur.
Pistlingur - 1/12/04
Ísland Farsælda Hvað?

Mál og menning og músík og myndir og milljónir á milljónir ofan, í myndir og músík og menningarmál. Hvers vegna átt þú að ráða á hvað ég horfi? Hvað gefur þér rétt til að velja mína afþreyingu? Þú ert ekki mamma mín og ég er ekki sex ára lengur. Ég fæ sjaldan martraðir, en þegar mig dreymir illa er það vegna þín. Ef ég vil horfa á eitthvað annað en hjörðin er það mitt mál. Mér er nokk sama um "menningararfinn" og ég vil ekki að þú troðir honum upp á mig! Lestu LAXNESS, hlustaðu á BJÖRK, horfðu á HRAFN GUNNLAUGSSON! Ef Laxness var svona mikill snillingur, af hverju fæ ég þá skammir fyrir að skrifa "ÚNGUR DREINGUR"? Af hverju þarf ég að kunna setningarhlutagreiningu? Af hverju þarf ég að KUNNA REGLURNAR á bak við stafsetningu ef ég stafset allt rétt? Af hverju má enginn stela nema þú? Þú mátt stela af okkur sjónvarpinu ef við neitum að horfa á afþreyingarefnið sem þú velur ofan í okkur, þú mátt ræna af okkur vinnulaunum, þú mátt brjóta niður ævistarf okkar, jafnvel starf margra kynslóða ef þú heldur að við séum of VALDAMIKIL. Þú selur okkur rándýran varning sem við megum ekki nota, þú stelur af okkur pening og til hvers? Til að halda lífi í hjátrú og kreddum, til að bendla mitt nafn við morð í fjarlægum löndum, til að halda verði á matvælum uppi, til að halda lífi í fólki sem vill ekki lifa, til að borga fæði og húsnæði fyrir fólk sem valdi vitlaust dóp. Það vildi ekki ríkisrekna eitrið þitt, og þú tókst af þeim þetta litla frelsi sem það taldi sig hafa.Það var svosem ekki mikið, en þú varst búin að dæla í það allskyns orðagjálfri sem það á endanum trúði. TJÁNINGARFRELSI! TRÚFRELSI! VALFRELSI! ATVINNUFRELSI! Ég kann líka sniðug orð; FJÖLMIÐLALÖG! SAMKEPPNISSTOFNUN! KRISTNIFRÆÐSLA! ÞJÓÐKIRKJA! TEKJUSKATTUR! ÁFENGISKAUPAALDUR! EFTIRLITSMYNDAVÉLAR! HLERUN! ÁFENGISTOLLUR! INNFLUTNINGSBANN! ÚTIVISTARTÍMI! Þú refsar fólki fyrir rangt val á eitri, en þú leyfir fólki sem brýtur á réttindum annarra að gera það sem það vill! Kannske kæmi hræsnin í ljós ef þú refsaðir fólki fyrir að kvelja börn, þegar þú gerir nákvæmlega það sama með lélegu námsefni, sköttum á ófullráða einstaklinga, og með því að leyfa börnum að alast upp nánast undir fátæktarmörkum. Þú refsar ekki þeim sem ræna af okkur peningum, ef þeir eiga næga peninga fyrir, en ef fólkið rænir brauði fyrir börnin sín eru börnin tekin af þeim. Þú leyfir fáfræði að viðgangast, þú elur á hatri og þú dregur okkur vísvitandi inn í stríð gegn fátækum þjóðum, til þess eingöngu að þykjast valdamikil og réttlát í augum einstaklinga sem þjást af ofsóknaræði og komust eingöngu til valda með prettum. Ég hef fengið nóg! Héðan í frá mun öll mín orka, allur minn tími, öll mín sál fara í að afhjúpa hræsnina, lygarnar, morðin og þjófnaðina sem þú stundar undir yfirskini “verndar.” Ég mun ekki hvílast fyrr en meðbræður mínir sjá ljósið og sameinast í uppreisn gegn þér, valdasjúka kvikindið þitt! Farsælda frón og hagsældar hrímhvíta DRUSLA, þú munt ekki segja mér fyrir verkum. Ég mun leggja á mig ómælt erfiði og þrautir, til þess eins að sýna heiminum þitt rétta andlit! Lýðræði? Lýðræðið er dautt, lélegur brandari, úrelt eins og íslenzk fyndni! Þú stærir þig af lygunum, og það upp í opið geðið á okkur, og verra er að þeir sem ættu að vita betur trúa þvaðrinu! Meirihluti þræla þinna kokgleypir kjaftæðið með bestu lyst, en undrast svo meltingartruflanir og brjóstsviða, og þú klappar þeim á bakið og dælir alka-seltzer á uppsprengdu verði ofan í múginn. OG ENGINN SEGIR NEITT! Þau ropa bara kurteislega og þakka fyrir klappið, rölta svo í vinnuna til að geta unnið sig til dauða til að borga þér! Koma heim, of hrædd til að gera nokkuð annað en glápa á áróður þinn fyrir ÍSLENSKRI MENNINGU! Sofna svo fyrir framan imbann muldrandi þjóðsönginn og rasista-komment í bland við möntruna “ÞAÐ ER SVO GOTT AÐ BÚA Á ÍSLANDI…ÞAÐ ER SVO GOTT AÐ BÚA Á ÍSLANDI…” Svo vakna þau daginn eftir, endurtaka leikinn og bíða eftir helginni, sem fer í að þamba áfengi á ofurprís, sofa og kvíða fyrir mánudegi. Og svona er allt lífið; vakna, éta, vinna, skíta, glápa, drekka, sofna! Engum dettur í hug að þú hafir rangt fyrir þér! Þau gleypa molana sem þú burstar af fötunum, sama þó þeir séu kusk-blandaðir og úldnir, af því að “það er svo góð búbót fyrir lágtekjufólk…” Og þú glottir, sitjandi á valdastól smíðuðum úr hræjum fátæklinga og uppreisnarmanna, smekklega lökkuðum með blóði verkalýðsins. Kóróna þín er farin að ryðga, en kannske tekur enginn eftir því ef þú heldur áfram að benda í hina áttina, á þá sem leyfa sér að synda mót lygastraumnum og benda á sannleikann, þú skellir skuldinni á dópistana, alkana, reykingamennina, hórurnar, hommana, djöfladýrkendurna, gotharana, pönkarana, alla þessa sem leyfa sér að brjóta gegn reglunum, vera öðruvísi, vera frjálsir!
Móðir Ísland, skítug og útriðin, þú munt aldrei framar stjórna mér!

   (42 af 43)  
1/12/04 17:00

Ívar Sívertsen

Heyrðu... ég ætla að leggja mig og lesa þetta svo. Maður þarf greinilega að vera vel upplagður til að lesa þetta.

1/12/04 17:00

Tina St.Sebastian

Nei, einmitt betra að vera þunglyndur, og helst drukkinn. Hvetur til sjálfsvíga.

1/12/04 17:01

krumpa

Úff - virðist áhugavert og góðir punktar í þessu. Mætti hins vegar benda þér á að nota GREINASKIL ? Eða Enter ? Fæ því miður hroll og gugna á að lesa svona samfellda romsu til enda. Því miður - því ég var sammála því litla sem ég las - að meira eða minna leyti.

1/12/04 17:01

Finngálkn

Krumpa: á hvaða hátt á hann að nota aumingja Enter? Það er alltaf verið að níðast á strákgreyinu...

1/12/04 17:01

krumpa

Æi-hann hefur bara gott af því... Sagði mér einu sinni að fá mér trefil! Auk þess var ekki gert nóg af því hér að ýta á Enter...

1/12/04 17:01

Tina St.Sebastian

Ég þekki Enter ekkert, og fer varla að ýta á hann núna. En af hverju er hér vísað til mín í karlkyni? Ég kann að vera karlmannleg í útliti, en innan skinns er ég að mestu leyti kvenkyns...

1/12/04 17:01

krumpa

hmm-kannast ekki við að hafa vísað til þín í karlkyni. Þrátt fyrir herfilegt útlit er ljóst af nafninu hvers kyns þú ert. Finngálkn var heldur ekki að tala um þig í karlkyni - hann var að tala um Enter (er það ekki gálknið mitt?) og Enter er sko ALL-MAN...

1/12/04 17:01

krumpa

Vil svo bara bæta við að þetta er drullugott hjá þér þó að Enter vanti!

1/12/04 17:01

Þarfagreinir

Þetta var mögnuð lesning. Hvetur mig barasta til að gera byltingu hið snarasta.

1/12/04 17:01

Skabbi skrumari

Þetta kalla ég reiðilestur í lagi... salút...

1/12/04 17:01

Heiðglyrnir

Jájá og seisei Tina mín var búinn að vara þig við, þetta áður umtalaða svelti kynni ekki góðri lukku að stýra, þú átt samúð Riddarans alla, þó að ekki taki hann undir mikið af því sem hér er ritað. En það er gott og gagnlegt að fá svona útrás. Vona bara að rætist úr öllu hjá þér Tina mín.

1/12/04 17:01

Finngálkn

ANARKÍ!!!

1/12/04 17:01

Afturhaldskommatittur

Þú ert sannarlega flokknum til sóma, Tina!

1/12/04 20:00

Leðurhomminn

Húra húra loksins eitkvað að viti þetta var flott
hjá þér loksins kom ræða sem ég fíla að viti
þú kant að láta ríkið heira það.
Það þarf fleiri svona eins og þig.

Tina St.Sebastian:
  • Fæðing hér: 12/1/05 17:54
  • Síðast á ferli: 18/12/16 21:15
  • Innlegg: 7042
Eðli:
Slettir ensku miskunnarlaust, sem og dönsku, latínu, hindí og heimatilbúnum tungumálum. Mun aldrei framar setjast á hækjur sér, af siðferðilegum orsökum. Vill láta banna krumpuð leðurstígvél.
Fræðasvið:
Rit Davíðs Þórs Jónssonar. Breskir uppistandarar. Eldamennska. Málvillur í útvarpi. Sósíalkommúnismi í Íslenskum framhaldsskólum, einkum í úthverfum Reykjavíkur.
Æviágrip:
Fæddist í útihúsi í Betlehem í Virginíufylki Bandaríkjanna um miðbik síðari heimsstyrjaldar. Dóttir hjónanna Victoriu Mooseport (húsmóður) og Don Corleone (heiðvirðs kaupsýslumanns). Strauk að heiman um sjö ára aldur til að ganga í herinn, en var hafnað sökum kynferðislegrar brenglunar. Tók þá upp nafnið Tina St.Sebastian, og tókst með klókindum, undirförli og lauslæti að komast í Frímúrararegluna, Lionsklúbbinn Rex og Kvenfélag Strandasýslu. Lítið er vitað um ferðir hennar síðustu áratugi. Síðast var hún með fasta búsetu skráða Í Dallas, Texas, en flutti þaðan snögglega í nóvember 1963. Vitað er að hún heimsótti New York borg árið 1980, að sögn talsmanns til að "heimsækja fyrrverandi Bítil," en engar nánari upplýsingar hafa fengist um þá heimsókn. Vitni þykjast hafa séð hana við opnun Þjóðminjasafnsins, en þær sögur eru -enn sem komið er- óstaðfestar.

--

Vígð prestur frá Universal Life Church í nóvember 2006