Jæja, nú er orðið tímabært að skrifa svonefnt félagsrit. Mér líkar annars afar vel við þetta nafn. Það inniheldur orðið félag, sem er gott hugtak, jafngott og bræðralag og samábyrgð.

Það er nefnilega svo að í hinu kapítalíska nútímasamfélagi hættir okkur til að gleyma grunngildunum góðu og göfugu, en þau snerta einmitt hinn félagslega þátt mannlegs samfélags. Já, sam-félags. Þar er það komið.

Við búum nefnilega einmitt í sam-félagi; við erum í þessum skít saman, í félagi hvert við annað. Áhersla kapítalistasvínanna á 'samkeppni' og þess háttar er afvegaleiðandi. Þetta er líka hið mesta misnefni. Hvernig er það sam-keppni að etja fólki saman og láta það klifra upp einhverja metorðastiga, traðkandi hvert annað niður í svaðið? Það er nú enginn sameiningarandi í því, o nei.

Það sem gildir er samvinna, sem er hins vegar réttnefni hið mesta. Við verðum að vinna saman að því að byggja þjóðfélagið og axla ábyrgð hvert á öðru. Sýnum smá náungakærleik og hlýhug í verki. Hættum að keppast í sífellu um efnisleg gæði og reyna að eiga meira en einhver annar. Það á alltaf einhver eitthvað meira, og hvað með það?

Þetta er auðvelt að segja, en erfiðara er að fylgja því eftir. Ég verð bara að vona innilega að orð mín séu ykkur hinum hvatning og innblástur.

Megum við öll drekka saman dús (öðru nafni vodka) eftir byltinguna!