Þegar ég var stödd í miðbæ Hafnarfjarðar í dag, sá ég mann á hjóli. Það er auðvitað ósköp hversdagsleg sjón, en þessi maður lék ótrúlegar jafnvægislistir. Hann hélt nefnilega á köflóttri ferðatösku í hægri hendi, um leið og téð hendi sinnti skyldum sínum við að stýra.
Ferðataskan var mjög stór og virtist vera úttroðin, það kæmi mér reyndar hreint ekki á óvart að hún hafi verið ansi þung.

Nú hef ég ekki reynt að hjóla með meiri farangur á reiðhjólastýri en sem nemur einum plastpoka með 4-5 bókum í. Þar að auki er ansi langt síðan ég sté síðast fæti á reiðhjól. Þess vegna fór ég að velta því fyrir mér hvernig það væri yfirleitt hægt að hjóla á reiðhjóli með risastóra ferðatösku. Er þetta mögulegt í alvörunni? Ég er helst á því að þarna hafi verið um geimveru að ræða.
Þetta er allavega grunsamlegt í meira lagi.