Jæja, nú hef ég verið að velta einu fyrir mér. Ég hef lengi verið nokkuð meðvitaður um tiltekinn þátt minnar eigin heilastarfsemi. Snertir þetta bílaauglýsingar, eins og titill þessa pistlings gefur til kynna.

Þannig er mál með vexti að ég, sem einstaklingur í tæknivæddu samfélagi nútímans, kemst ekki hjá því að sjá endrum og sinnum auglýsingar í sjónvarpi. Þar á meðal eru stundum auglýsingar sem hafa sjálfrennireiðar sem viðfangsefni sitt. Nú viðurkenni ég hins vegar fúslega að ég hef nánast engan áhuga né þekkingu á bílum. Ég á eldgamlan Benz sem ég veit ekki einu sinni hvað heitir. Ég kann að keyra hann og setja á hann bensín. Fyrir mér er það nóg.

En nú er ég kominn út fyrir aðalatriðið, sem er sú staðreynd að mér er ómögulegt að muna nokkurn tímann hvaða bílategund tilteknar auglýsingar eru að reyna að pranga upp á mann. Ég man eftir einstökum auglýsingum, flestum asnalegum. En hvernig sem ég reyni, þá get ég aldrei tengt auglýsingarnar við bílategundir, þó ég geri mér grein fyrir að það er oftast tekið fram hvaða tiltekna merki er verið að lofa á nýstárlegan og listrænan hátt í hverri ræmu.

Er ég einn um að finna fyrir þessari hugsanagloppu? Einskorðast þetta kannski eingöngu við einstaklinga sem ekkert vita um bíla?