Sem yfirlýstur skröggur ákvað ég að setja saman andspyrnu jólalaga-spilunarlista til að geta komist í rétta ég-þoli-ekki-jólastúss-stemmningu.

Því miður varð sá listi ekki langur, né getur hann rúllað lengi. Ég get þó huggað mig við það að það bætist lag við hann fyrir jólin, í formi jólalags Baggalúts, sem verður ábyggilega engu síðra en lögin sem áður hafa komið.

En vindum okkur í hvaða lögum ég gat sópað saman til að mynda þennan lista:

Við byrjum alvarlega, en það endist ekki lengi:

* Jethro Tull - Christmas Song
* Áblástur - Með klamedíu á jólunum
* Dáðadrengir - Mér hlakkar svo til

Og þá tekur Baggalútur við:

Jólalag Baggalúts 2001
Jólalag Baggalúts 2002: Jóla-jólasveinn
Jólalag Baggalúts 2003: Gleðileg jól
Aðventulag Baggalúts 2004: Kósíheit par exelans (nú geng ég út frá því að þau verði fleiri)

Á þennan lista vantar kannski helst lagið Grandma Got Run Over By A Reindeer, en það að 4 lög af 7 séu frá Baggalúti sína að það vantar fleiri metnaðarfulla listamenn í þennan, almennt, lágkúrulega geira tónlistar.

Þess má geta í framhjáhlaupi að ég lagði fram mjög áhugaverða hugmynd að þjóðþrifaverki í vinnunni í dag. Benti ég á að alls staðar í öllum verslunum yrðu spiluð jólalög næsta mánuðinn. Til að skapa tilbreytingu og létta fólki lund stakk ég upp á að í stað jólatónlistar yrði boðið upp á stanslaust þungarokk á vinnustaðnum mínum, með Iron Maiden í fyrirrúmi, ásamt Motörhead og Black Sabbath.

Skemmst er frá að segja að andstaða var nánast almenn, svo ég stakk upp á því að hafa pönkveislu í staðinn. Það virtist ganga vel, þar til ég fór að skemmta fólki með sögum af æviskeiði GG Allin, sem mér fannst tilvalinn til að leiða aðra frækna pönktónlistarmenn.

Mér er því fullljóst að það er framsóknarmenn alls staðar og maður er hvergi óhultur.