Michael og Renee

"Ég elska Renee og við ætlum að giftast", sagði Michael Schumacher, ökuþór að lokinni keppni í Uddevalla í Svíþjóð í gærkvöldi. Turtildúfurnar hittust í veislu hjá sameiginlegum vini þeirra beggja, Mikka Hakkinen,í síðustu viku og urðu þeir strax ástfangnir upp fyrir haus.

Renee Spaulding er svissneskur fjallgöngumaður og hefur hann löngum verið í hópi eftirsóttustu piparsveina í heimalandi sínu. Búist er við að brúðkaupið fari fram snemma í næsta mánuði.

Útvarpsráð ákvað í dag að fá Herbert Guðmundsson sölumann til að semja jólalag Ríkisútvarpsins í ár.

Ákvörðunin er liður í ímyndarbreytingu Ríkisútvarpsins, en undanfarin ár hefur það sætt mikilli gagnrýni vegna þeirra tónskálda sem hingað til hafa samið jólalög Ríkisútvarpsins. Hafa þau þótt vera komin til ára sinna og semja helst til krefjandi tónlist og vera "einhverjir fokking gamlir, útbrunnir kallar með eitthvað klassískt drasl," eins og einn meðlima útvarpsráðs orðaði það. Hefur af þeim sökum verið ákveðið að yngja jólalagið upp og lá því beint við að hinn síungi Herbert yrði fyrir valinu.

"Þetta verður svona suðræn sveifla, samið undir áhrifum af portúgölsku þjóðlagi sem ég heyrði á ferðum mínum nýlega," sagði Herbert kotroskinn í viðtali við Baggalút. "Við gefum lagið út 1. desember og svo verður það "plöggað" stanslaust í útvarpinu alveg stöðugt fram að jólum, þannig að allir þekki það og geti sungið með þegar það verður síðan flutt á hádegi á jóladag."

Lagið eftir Herbert, sem hlotið hefur nafnið Jólasamba, verður flutt af Morgunblaðskórnum við undirleik skólahljómsveitar Ísaksskóla.

Dr. Einar Jónsson fiskifræðingur kynnti í dag ný gögn sem benda til mistaka við flokkun dýrategundanna. "Það er augljóst á þessu að ég hef haft rétt fyrir mér allan tímann," sagði Dr. Einar hróðugur. "Þorskar geta geta flogið og tilheyra því ekki fiskaríkinu."

Sjávarútvegsráðherra segir að þetta sýni fram á að að brottkast er óframkvæmanlegt og því óþarfi að breyta fiskveiðilöggjöfinni. "Hún er bara flott eins og hún er," sagði hann ánægður í viðtali við Baggalút í dag.

Meðlimir stjórnarandstöðunnar voru á öðru máli. "Háttvirtur sjávarútvegsráðherra gleymir því að í þessum gögnum kemur líka fram að þeir þorskar sem verða uggstýfðir á bátnum geta ekki flogið lengur og drukkna því við brottkastið, litlu greyin," sagði Össur Skarphéðinsson.

Gögnin sem um ræðir eru ljósmyndir af sjómönnum að kasta þorski sem síðan hefur sig til flugs. Myndirnar þykja sanna mál Dr. Einars, sem hefur lengi legið undir ámæli vegna kenninga sinna. "Þið hélduð að ég væri geðveikur, en nú hef ég sýnt ykkur að það eruð þið sem eruð geðveik," æpti Dr. Einar að lokum.

Silungurinn eftirsótti

Loksins hefur hulunni verið svipt af borginni sem fær að halda fimmtu Lagarkvikmyndahátíðina. Hátíðin, sem haldin var í Reykjavík árið 1994, sama ár og Haraldur Hallgrímsson, leikari og handritshöfundur vann hinn eftirsótta Gullsilung fyrir kvikmyndina "Laukateiti", verður haldin í Toronto á næsta ári. Nokkur samkeppni var milli Toronto og Halmstad í Svíþjóð, svo fór að hin fyrrnefnda borgin varð fyrir valinu eftir miklar vangaveltur.

Smáralindin er tilvalinn sambandsstöð.

Árni M. Mathiesen, sjávarútvegsráðherra skýrði í dag frá ákvörðun ríkisstjórnarinnar þess efnis að mannvirki þau sem hýsa nú verslunarmiðstöð í Smáralind í Kópavogi, hýsi þess í stað stjörnusambandsstöð að tillögu Hins íslenska áhugamannafélags um ennýal og samtengingu gjörkosmískra plana.

Talsmaður félagsins, Geir Fannsker múrarameistari, sagðist í samtali við Baggalút vera himinlifandi, þótt ákvörðunin hafi ekki komið sér á óvart. „Við höfðum fyrir því nokkra vissu að svona myndi fara, enda er frá því skýrt nákvæmlega í spádómum dr. Helga, þar segir t.d.: „Bjargvætturinn kemur úr borg fuglanna og við tíunda tungl mun hann halda mikla ræðu.“ Þetta eru því ekki tíðindi í okkar huga, en fagnaðarefni öngvusíður.“

Samkvæmt heimildum Baggalúts mun hafa verið stuðst við teikningar dr. Sigvalda Ben heitins af Opinberri stjörnusambandsstöð við hönnun hússins, þar sem svokallaðir „kvistir“ og „framtrjóna“ gegna lykilhlutverki.

„Það er von mín að áhugamenn um astrófýsísk fræði og gjörkosmíska eigindaskömmtun muni eiga samastað og samnefnara í stöðinni og hún verði þeim skjól sem leita sannleikans af vettvangi nýalsins,“ sagði ráðherra, sem er annarrar gráðu regintengill í stúku astraleiginda í Reykjanesskjördæmi. Hvorki forsætisráðherra né aðrir aðilar ríkisstjórnarinnar könuðust við málið, en Geir Haarde sagðist ekki geta fylgst með öllum ákvörðunum samráðherra sinna frekar en þeir hans.

Thundervolt á tónleikum í Lissabon 1979

Stórsveitin Thundervolt frá Þýskalandi er væntanleg til landsins snemma á næsta ári. Mun sveitin leika á tvennum tónleikum í sal Karlakórs Reykjavíkur, Ými.

Að sögn eins aðstandenda tónleikanna, Snæbjörns Falk, er þetta "...langþráður draumur minn sem loks er að rætast. Ég eignaðist fyrstu plötuna þeirra 'Bangin' the smurfs' þegar ég var smá patti og hef ekki verið samur síðan."

Thundervolt er án efa ein fremsta þungarokkshljómsveit heims og nýtur gríðarlegra vinsælda í austur-evrópu. Sveitin er nú skipuð upprunalegum meðlimum, sem stofnuðu sveitina 1977, en ekki er langt síðan trommuleikarinn Udolf Swatzmüller kom í leitirnar eftir að hafa verið talinn af í 15 ár. Í stuttu samtali við Baggalút sagði Tony Ztarblaster, söngvari: "Við höfum við aldrei verið betri - og nýja efnið sannar það bara enn og aftur að 'METAL WILL NEVER DIE'

Mikill fengur að fá þessa hressu kappa hingað á klakann, en heimsókn þeirra er liður í kynningu á nýrri breiðskífu, 'Thunder Prezzure' sem kemur út á næstu vikum.

ÁTVR hefur stórlækkað verð á flestum tegundum áfengis í verslunum sínum. Lækkunin er tilkomin vegna innflutnings ÁTVR á niðursoðnu áfengi frá Miðausturlöndum. „Eins og menn vita er niðursuðuvara yfirleitt ódýrari en fersk, við gerðum góðan díl“, sagði forstjóri ÁTVR. „Við bjóðum í byrjun upp á niðursoðið vodka og rauðvín en hyggjumst einnig hafa á boðstólnum líkjöra og jafnvel bjór, sem reyndar er í dósum fyrir, ekki niðursuðudósum samt“. Talið er að lækkunin nemi allt að 80%. Einnig er búist við að sala hefjist innan tíðar á ódýrum vakúmpökkuðum sígarettum og vindlum.