Geir Sveinsson í ham gegn dönum

Íslendingar burstuðu Dani 6-0 í frábærum knattspyrnuleik í Kaupmannahöfn á laugardaginn. Að öðrum ólöstuðum má segja að Geir Sveinsson hafi verið maður leiksins enda skoraði hann alls ellefu mörk, þó fimm þeirra hafi verið dæmd ógild. Mikill fjöldi Íslendinga var á leiknum og sagði Atli Mikson, Landsliðsþjálfari, að stuðningurinn hafi í raun gert útslagið. "Við fundum fyrir gífurlegum stuðningi, sérstaklega eftir að Guðni skoraði áttunda markið. Ég er frekar ánægður með sigurinn en betur má ef duga skal". Næst tekur landsliðið á móti liði Falklandseyja, hvernig leggst leikurinn sá í þjálfarann? "Þetta verður geysierfiður leikur og ég vona bara að Stefán Jón verði í góðu formi, en hann hefur jú verið meiddur. Eins er alltaf erfitt þegar lykilmenn eins og Gunnar Þórðarson eru fjarri góðu gamni".

Marteinn hefur sagt af sér

Marteinn Ólafsson, landsliðsþjálfari Íslands í knattspyrnu boðaði til blaðamannafundar í morgun til að tilkynna um afsögn sína. Ástæðan mun vera afar gott gengi liðsins að undanförnu og ber þar helst að nefna frækinn sigur á Dönum 6-0 síðastliðinn laugardag. "Markmiðið var alltaf að lækka okkur um styrkleikaflokk, en það er nú ljóst að því markmiði verður ekki náð. Þetta eru gífurleg vonbrigði fyrir mig og ég kaus því að láta af störfum". Störf þjálfarans hafa verið harðlega gagnrýnd eftir að hann valdi hinn unga og efnilega Guðna Bergsson í liðið, en Guðni leiddi einmitt strákana til frækins sigurs á Norður-Írum, 3-0 um daginn. Marteinn vildi taka það fram að hann einn bæri ábyrgð á árangri liðsins : "Það er ekki hægt að skamma strákana fyrir þetta".

Árni Johnsen, tónlistarmaður, hefur játað að hafa keypt um 12.000 lítra af Coca Cola, í þeim tilgangi að sópa að sér vinningum í sumarleik Vífilfells, á kostnað Landafundanefndar. Árni var sérlegur ráðgjafi nefndarinnar og gjaldkeri á árunum 1998-2001. Öll árin keypti hann þúsundir lítra af Coca Cola út á beiðnir frá Hafrannsóknastofnuninni, til greiðslu frá Landafundanefnd. Árni mun einnig hafa leyst út skilagjald fyrir flöskurnar, alls um 300.000 kr. Ríkislögreglustjóraembættið rannsakar nú ábendingar um Happaþrennukaup Árna og mögulega þátttöku í happatappaleik Ölgerðarinnar.

Orsök veðurofsans?

Alþjóðaveðurfræðistofnunin (IMI)hefur í samstarfi við Alþjóðahafrannsóknaráðið (ICES)kynnt niðurstöður þrotlausra rannsókna margra helstu vísindamanna heims á sviði veðurfræði, haffræði, sjávarspendýrafræði, líffræði og stærðfræði, sem beindust að orsökum fellibylja. Niðurstöðurnar koma fæstum á óvart: Helsti orsakavaldur fellibylja er nefnilega hvalveiðar, eins og menn hafa talið öldum saman. Thure Vaktlukt, forseti IMI, segir að við hvalveiðar fari í gang ákveðið ferli sem aftur veldur fellibyljum. "Segjum sem svo að veiddar séu 1000 langreyðar í Atlantshafinu öllu, það hefur gífurleg áhrif á yfirborðshæð sjávar og seltu, þar sem stórt hlutfall seltu er sviti frá slíkum skepnum. Einnig lækkar hitastig sjávar við brotthvarf svo heitfengra dýra sem hvala. Þessir þættir, og fleiri, koma af stað keðjuverkun sem endar með fellibyljum". Ekki er vitað hvaða áhrif niðurstöðurnar hafa á fyrirhugaðar hvalveiðar Íslendinga, en sjávarútvegsráðherra sagðist aðspurður ekki hafa miklar áhyggjur af því þótt "fólk suður í rassgati þurfi að hneppa að sér annað slagið".

Bush var ekki sáttur við vin sinn Árna

Bush Bandaríkjaforseti fordæmdi í dag, í beinu sjónvarpsávarpi, vinnubrögð Árna Johnsen, tónlistarmanns. Hann sagði Bandaríkin ekki vilja frekara stjórnmálasamband við Vestmannaeyjar og gaf í skyn að undirbúningur væri hafinn á flutningi Keikós til Oregon, "þaðan sem hann átti aldrei að fara". Hann sagðist ekki trúa því að faðir slíks manns hefði verið í bandaríska hernum eins og Árni vill meina, heldur væri sennilega um njósnara kommúnista eða nasista að ræða. "Í Texas höfum við sérstaka stóla fyrir svona karaktera", sagði forsetinn að lokum.

Elvis segir John til

Í dag fékkst staðfesting á frétt danska tímaritsins "Se og hör" þess efnis að Elvis Presley og John Lennon væru á lífi og störfuðu í Kaupmannahöfn. Staðfestingin kom frá danska ríkissjúkrahúsinu (Riget), í kjölfar DNA-rannsókna.

Þeir félagar hafa búið saman í raðhúsi á Amager um alllangt skeið undir dulnefnunum Lars og Sören Olsen. Þeir hafa unnið að tónlist undanfarin 20 ár sem "Olsen-bræður" og tóku m.a. þátt í, og unnu, vinsæla dægurlagakeppni í Stokkhólmi fyrir rúmu ári síðan. Upp komst um svikin þegar Lars (Lennon) sagði sannleikann í viðtali við áðurnefnt tímarit. Í framhaldi af því gengust þeir "bræður" undir DNA-rannsókn og lygapróf. Niðurstöður þeirra voru sláandi; þarna voru komnir ástsælustu tónlistarmenn sögunnar. "Mér fannst kominn tími til að snúa aftur til Yokóar og krakkans", sagði Lennon um yfirlýsingu sína og Elvis bætti við á óaðfinnanlegri dönsku: "maturinn hérna er ógeðslegur, en menn eru samt umburðarlyndari gagnvart vímuefnum en í Memphis. Ég vona að ég finni lyklana að Graceland, ég tími varla að borga mig inn".

Í gær tilkynntu lúxembúrgskir vísindamenn við þarlenda erfðavísindastofnun, að þeim hefði tekist að einangra erfðavísi sem veldur samkynhneigð meðal karlmanna. Erfðavísirinn fannst við endurskipulagningu á rannsóknastofum við stofnunina og brá mönnum nokkuð í brún enda búnir að margleita á svipuðum stað að geni tengdu kvikmyndaáhuga samkynhneigðra Belga. „Það er ljóst að hér er um byltingu að ræða,“ sagði formaður Samtaka um karlmannleg gildi (SUKD). „Í starfi mínu sem Alþingismaður og sem Vestmannaeyingur hef ég stundum þurft að sinna þessum þrönga hópi. Ég viðurkenni fúslega að ég hef kastað upp eftir samskipti mín við þetta fólk og fór meira að segja að gráta eitt sinn á Þjóðhátíð þegar ég var beðinn að spila 'It's raining men' við brekkusöng. armur kynvillingsins er langur og ég fagna mjög þessum fundi sem vonandi leiðir af sér bætt meðferðarúrræði fyrir þetta fólk,“ sagði formaðurinn að lokum, en hann vill ekki láta nafns síns getið.

"Dvergar eru ekkert svo litlir". Þetta eru niðurstöður nýrrar fjölþjóðlegrar rannsóknar sem gerð var á árunum 1986-2000 á 9.800 dvergum víðsvegar um heim. "Niðurstöður okkar sýna á óyggjandi hátt að dvergar eru ekkert sérstaklega lítið fólk, hinsvegar erum við hin afskaplega hávaxin," sagði stjórnandi rannsóknarinnar, Dr. Ole Nomansland. Búist er við að fjöldi dverga verði atvinnulaus vegna þessa þar sem margir þeirra hafa fært sér þessa sérstöðu sína í nyt í starfi. Lofarr Ingebritsen, formaður Aþjóðaráðs dverga segir að samtökin muni berjast fyrir rétti dverga til að vera minnihlutahópur og boðar harðar aðgerðir: "Fólk um og yfir meðalhæð ætti að gæta sín."

Einar dreymdi fyrir verslunarmannahelgarveðrinu og páskaveðri næsta árs þegar ljósmyndari Baggalúts leit við hjá honum.

Einar Waage (80) hefur játað að vera „heilinn á bak við Veðurstofuna“. Þessi fyrrum gjaldkeri hefur hafist við á veðurstofunni undanfarin 48 ár og gert veðurspár. „Kemur mér algjörlega í opna skjöldu“ sagði veðurstofustjóri þegar Baggalútur krafði hann svara. „Ég stóð í þeirri meiningu að starfsfólk okkar ynni þessar spár, Einar virðist, því miður, hafa dreymt fyrir veðrinu öll þessi ár, hann er ekki sérlega berdreyminn“.

Alþjóðlegt veggspjald fyrir myndina

Loksins er komið að því að frumsýna stórmyndina 'the Pulverized Chicken' sem Baggalútur fjármagnaði að stórum hluta - rúm 17 ár eru síðan tökum lauk á þessu þrekvirki flæmska leikstjórans Frank Operkapern eftir klassískri sögu, samnefndri, eftir Alberd Codman, en myndin skartar engum öðrum en færeyska stórleikaranum Rogham Djonsy.

Þetta fjölþjóðlega meistaraverk, sem fjallar um glaðbeittan bókhaldara sem lendir í ýmsum ævintýrum, hefur nú alls verið 19 ár í vinnslu, en aðstandendur eru þess fullvissir að biðin sé þess virði:

"...já...ég veit ekki...mér fannst hún fín - örugglega allt í lagi fyrir krakka," sagði hr. Djonsy í stuttu spjalli við Baggalút fyrir stundu. Ennfremur sagði leikstjórinn Frank Operkaper um myndina: "Já hún, ehh það er nú orðið soldið síðan ég sá hana en hún var alveg slarkfær, svona lala eitís hrollvekja - ef ég man rétt."

Rithöfundurinn Codman vildi ekkert tjá sig við blaðamann Baggalúts, sagði að við skulduðum honum ennþá pening fyrir handritið og skellti á.

Myndin verður sýnd í C-sal Tónabíós á morgun, laugardag, og á sunnudaginn kl. 15:00 - aðgangur er ókeypis, en myndin er bönnuð börnum.

Siv ræðir við George Lucas

"Ég er mjög ánægð. Þetta er stór dagur fyrir mig og alla þjóðina í raun. Ég er mjög ánægð," sagði Siv Friðleifsdóttir umhverfisráðherra í samtali við Baggalút í dag um samkomulagið sem náðist í nótt milli hennar og George Lucas, um að hún taki að sér hlutverk Svarthöfða í þriðja kafla stjörnustríðs myndanna.

"Það er rétt - ég mun leika Darth Vader í þessari síðustu mynd sem George ætlar að gera - ég verð reyndar að mestu hulin því þá verður hann kominn í leðurgallann fræga, sem ég hlakka mikið til að máta. Ég hef ákveðnar hugmyndir um hvernig má skila flóknum tilfinningum persónunnar þrátt fyrir grímuna, með aukinni líkamstjáningu og dansi - og George virtist sammála mér. Ég er mjög ánægð með það, mjög ánægð."

Aðspurð um hvort það muni há henni eitthvað við persónusköpun að hún er kona sagði Siv: "Það hefur ekki háð mér hingað til."