Sýslumaðurinn í Reykjavík gerði árangurslaust fjárnám hjá Framsókn í Reykjavík fyrir viku.
Var ætlun sýslumanns að fjarlægja um 100 kindur sem hafa hafst við í húsnæði flokksins í vetur, en talsvert hefur verið kvartað undan skrílslátum, hávaða og fnyk þaðan.
Mættu fulltrúar sýslumanns mikilli mótspyrnu og þurftu að hrökklast tómhentir burt. Var sú skýring gefin á veru kindanna að verið væri að þjálfa nýja starfsmenn í þjónustu- og símaver flokksins.
Lifandi fallbyssukúla
(fjárhagslega sjálfstæð) óskar eftir að kynnast reyklausum síamstvíburum, helst kvenkyns. Með nánari kynni í huga. Afgreiðsla vísar á.
Ég sé að fullháttvirtur forseti hins háa Alþingis er með eitthvað bakkaklór eftir ömurðarveisluna sem hann hélt á Völlunum að viðstöddu fámenni í gær.
„Forseti Alþingis harmar að heimsókn danska þingforsetans hafi verið notuð til að varpa skugga á hátíðarhöldin og leyfir sér að trúa því að það sé minnihlutasjónarmið að viðeigandi sé að sýna danska þingforsetanum óvirðingu þegar hann sækir okkur heim og kemur fram fyrir hönd danska Þjóðþingsins og dönsku þjóðarinnar.“ — segir forseti.
Ég mótmæli herra forseti.
Þessi vanhugsaða og alls óvelkomna heimsókn var hreint ekki „notuð“ til að varpa skugga á fjölmilljónapartíið þitt. Heiðursgesturinn flóttalegi sá alveg sjálfur um að varpa sínum skoðanamyrka skugga á hátíðahöldin og eyðileggja þau gersamlega.
Það eru miklu fremur Danir sem sýna okkur óvirðingu með því að senda þessa útdönkuðu rasistapíu hingað — og skömmin er þeirra að púkka upp á hana sem þingforseta yfirhöfuð.
Það er nefnilega míkróminnihlutasjónarmið að halda að það sé í lagi að dubba upp rauðklædda rasista og leiða til hásætis á hátíðarþingfundi á sjálfu Lögbergi. Og það að gera lítið úr gagnrýni á þetta skipulagsslys er ekkert annað ómerkilegt yfirklór og eftirámjálm.
Svo eiga menn bara að drullufrussfretast til að biðjast afsökunar á klúðrinu í stað þess að barma sér undan eðlilegum viðbrögðum við þessum skammarlega undirlægju– og druslugunguhætti.
Góðar stundir.
Baggalútur sendir frá sér glænýtt aðventulag sem ber heitið „Afsakið þetta smáræði.” Þar bregður ljóðmælandi sér í hlutverk hins hógværa gestgjafa, sem afsakar lítilræðið sem er á boðstólnum. Lagið er áminning um að forðast asann og stressið í desember og setjast aðeins niður og slaka á. En um leið að fara nú ekki of geyst í áti, útbelgingi og ítroðningi.
Lag og texti er eftir Braga Valdimar Skúlason en ótal valinkunnir veislugestir komu að hljóð– og leikmynd lagsins. Guðm. Kristinn Jónsson stýrði upptökum í félagi við Sigurð Guðmundsson og Ágúst Bent leikstýrði krásum hlöðnu myndbandi, sem tekið var upp í hinum fornfræga skíðaskála í Hveradölum.
Í tilefni einmuna veðurblíðu sendir hljómsveitin Baggalútur frá sér nýtt lag, sem ber heitið Appelsínugul viðvörun.
Lagið er bæði uppblásið og háfleygt og er því tilvalin 17. júní blaðra til að sleppa í loftið á sjálfum þjóðhátíðardegi Íslendinga. Til lukku með lýðveldið.
Lagið er áhlýðanlegt á tónsprænunni Spotify. Því má dreifa sem víðast.
Allsherjar endurmörkun og ímyndarsköpun tónlistarmannsins Megasar er nú á lokametrunum. Að sögn yfirstílista verkefnisins hefur Megas verið endurskoðaður frá grunni, hann straumlínulagaður og útlit hans fært til nútímahorfs — án þess þó að hreyfa um of við sérkennum hans og alþýðlegu yfirbragði.
Samhliða þessu hafa textar Megasar verið einfaldaðir til muna til að ná til breiðari markhóps, auk þess sem þeir hafa verið leitarvélabestaðir og þýddir yfir á bæði hollensku og finnsku til að ná til stærra markaðssvæðis.
„Breytingin er ótrúleg. Hann hefur fengið alveg nýja litapalettu, nýtt og ferskt lógó, auk þess sem söngkonan Birgitta Haukdal mun ljá honum rödd sína. Sem er spennandi nýjung.“
Þá verða ný gildi Megasar kynnt, en þau eru ÁKEFÐ, EINURÐ og RÁÐDEILD.
Amma óskast
á gott heimili í Vesturbænum. Þarf að vera komin úr barneign. A.v.á.
Karlmaður á besta aldri, Nói Albínusarson, tók kassabíl bróðursonar síns traustataki snemma í morgun og ók af stað í honum, án þess að biðja um leyfi.
Því miður kunni Nói ekki á stjórntæki bílsins og mölbraut því sérsmíðaðan gírkassa bílsins, sem hafði einmitt unnið Ofvitann, nýsköpunarverðlaun ofurgáfaðra leikskólabarna.
Nói komst við illan leik úr bílnum, sem gereyðilagðist. Hann var þó hinn hressasti og vildi ólmur sýna blaðamanni hvernig hann sýður egg.
ÞÚ TRÚIR ALDREI HVAÐ GERÐIST NÆST!
Fyrirtæki íslensku jólasveinanna fékk í dag jafnlaunavottun, en félagið hefur á undanförnum árum tekið með skipulögðum hætti á kynbundnum launamun innan fyrirtækisins og komið á metnaðarfullri jafnréttisstefnu.
„Við erum mjög ánægðir, eða alltsvo ánægð með þetta. Það eru að vísu mestmegnis karlmenn, sem starfa hjá okkur, eða eingöngu eiginlega, sem stendur. En það breytir því ekki að þetta er mikill heiður fyrir okkur… öll,“ segir Kertasníkir Leppalúðason, framkvæmdastjóri mannauðs– og jafréttissviðs Jólasveinanna.
Hann segist jafnframt vonast til að fleiri konur (og raunar fólk af öllum mögulegum kynjum) bætist í þessa rótgrónu — og um margt íhaldssömu stétt — á næstu áratugum eða öldum. Hann tekur þó fram að öllu slík aðlögun taki tíma og þurfi auðvitað að ígrunda vel. Hann áætlar að í dag séu um 300 sveinar í starfsnámi hjá félaginu, „allt jú, mögulega karlmenn“.
Kristín Framnes hefur tryggt sér fyrsta íslenska eintakið af svonefndum „snjallkalli“ af gerðinni Man–o–matic 3030b.
Er þetta þáttur í alhliða snjallvæðingu heimilisins, en Kristín hefur þegar fest kaup á snjallperum, snjalleldhúsi, snjallúri, snjallsjónvarpi, snjallbíl, snjallsímstöð, snjallþvottavél, snjallrúmi, snjalltrampólíni og snjallhamstri.
Snjallkallinn hlýðir öllum fyrirmælum fljótt og vel, heldur uppi lágmarkssamræðum og er með öllu áhugalaus um knattleiki. Hann talar lýtalausa íslensku og kann skil á öllum helstu heimilisstörfum. Þá kemur hann með sérstöku unaðsprógrammi, sem þó er enn í Beta–prófunum.
Fyrrum eiginmaður Kristínar fæst gefins, gegn því að vera sóttur.
Sönnunargögn
Eigum fyrirliggjandi ýmis sönnunargögn, engin sönnunarbyrði áhvílandi. A.v.á.
Svo virðist sem Bára Halldórsdóttir, hljóðmeistari, og hugsanlegur vitorðsmaður hennar hafi náðst á mynd í öryggismyndavélakerfi Klaustur bars mánudaginn 19. nóvember. Er talið að þau hafi verið að koma fyrir hlerunarbúnaði og gera svokallað „sándtest,“ sem mun vera forsenda þess að gæði hljóðupptaka séu tryggð. Þau hafi svo kvöldið eftir beitt sérþekkingu sinni og háþróaðri upptökutækni til að taka upp spjall grunlausra gesta.
Á myndinni sjást Bára og meintur vitorðsmaður hennar taka ljósmyndir til að undirbúa aðgerðir kvöldið eftir. Sérstaka athygli vekur að þau eru í afar vönduðum dulargervum.
Elísabet Alexandra María Georgsdóttir, fyrrum drottning, hefur verið ráðin yfirflugfreyja hjá íslenska flugfélaginu WOWi.
Elísabet, eða Beta eins og hún er jafnan kölluð, er þekkt fyrir ríka þjónustulund, brennandi áhuga á ferðalögum og yfirburða kímnigáfu og því þótti hún smellpassa í hlutverkið.
Hún hefur ekki áhyggjur af því að takast á við nýtt hlutverk, komin á tíræðisaldurinn. „Nei, veistu, það er öllum hollt að skipta um starfsvettvang öðru hverju. Annars bara staðnar maður. Sjálf var ég svona að detta í netta kulnun.“
„Ég er líka pínu stressuð útaf þessu Brexit–kjaftæði öllu og vildi bara fá mér tryggari vinnu,“ sagði Elísabet að lokum áður en hún renndi sér fótskriðu eftir endilangri vélinni.
Smári Snorrfinnsson hefur flutt lögheimili sitt frá móður sinni, Magðalenu, til Elísabetar Strömm, húsfreyju.
Smári er menntaður númiðlunartæknifræðingur og er með MBA gráðu í framvirkum sammiðlunarfræðum frá konunglega miðlunarskólanum í Drammen.
Að sögn Smára hefur hann lengi dreymt um að skipta um umhverfi og hlakkar hann til að takast á við ný og spennandi verkefni á heimili Elísabetar. Þar mun hann hafa yfirumsjón með öllum þvotti ásamt matseld á þriðju– og fimmtudögum, þá mun hann taka við alhliða dagskrárstjórn á skjámiðlum heimilisins ásamt því að vinna að þróun hreyfiáætlunar fyrir fressköttinn Bartólemeus.
Að sögn Magðalenu, móður Smára, og fyrrum vinnuveitanda verður leitast við að ráða sem fyrst í stöðu hans á heimilinu, eða einfaldlega festa kaup á snjallryksugu.
Hljómsveitin Baggalútur hefur sent frá sér nýtt dægurlag. Lagið heitir „Sorrí með mig“ og er ákaflega skemmtilegt og jafnframt áheyrilegt.
Lagið er nú komið á „Veraldarvefinn“, „Alnetið“ og jafnvel sjálft „Lýðnetið“ og er fáanlegt hjá eftirtöldum aðilum:
Við höfum aukinheldur, undir merkjum aukins gagnsæis, ákveðið að dreifa laginu á nótum. Þannig getur fólk betur áttað sig á verkinu, lært textann og jafnvel raulað laglínuna fyrir munni sér — áður en það hlýðir á það í fyrsta skipti.
Eftir að áætlanir um byggingu álvers á Reyðarfirði urðu að engu fyrir svik Norðmanna leitar ríkisstjórnin nú logandi ljósi að …
Ævar Svavarsson, ljónatemjari hefur lýst eftir eiginkonu sinni, Súsönnu Ellertsdóttur - en hún hvarf skyndilega er Ævar skaut henni í …
Hafnfirskur rafvirki á fimmtugsaldri neitar að kveðja árið 2010. Hann kveðst langt í frá verða búinn að klára árið, hann sé …
„Auðvitað er maður alveg í skýjunum,“ sagði Dr. Kristján Bergdísarson hóra í samtali við Baggalút, en hórur, mellur og aðrar …
Samtök flippaðra framsóknarmanna íhuga að bjóða fram á landsvísu fyrir næstu þingkosningar. Fyrir flokknum fer Guðmundur Steingrímsson, einn flippaðasti framsóknarmaður allra …
Hjónin Helena og Maríus Grunnevik, sem áttu silfurbrúðkaupsafmæli nú í síðustu viku, gáfu hvort öðru dauðageisla í brúðkaupsafmælisgjöf. "Þetta var …
Lögregla hefur öruggar heimildir fyrir því að sjóndapur Ísfirðingur - afar sturlaður, hafi komið sér upp gereyðingarvopnum. Mun Ísfirðingurinn hafa nálgast …
Félagar í Kiwanisklúbbnum Blesa hafa setið að sumbli frá því snemma á Þorláksmessu með það að markmiði að verða „gersamlega …
Atferlisfræðingurinn og háskólaprófessorinn Gerhard les Bian, sem oft hefur verið nefndur faðir hins svokallaða lesbíisma og helsti hugmyndafræðingur þeirrar stefnu …