Atli og Jói mega þó eiga það að þeir eru með þvottekta útvarpsandlit.

Brögð hafa verið að því í vetur að sjálfumglaðir útvarpsmenn hafi lesið upp fréttir Baggalúts í útsendingu. Hefur þetta verið gert í fullkominni óþökk ritstjórnar, sem lítur athæfið alvarlegum augum – og undirbýr lögsóknir í fjölmörgum löndum til að vernda viðkvæmt efni sitt fyrir slíkum hryðjuverkum.

Fremst í flokki þessara ófyrirleitnu hugverkaþjófa fer tvíeykið tilgerðarlega, Atli Þór og Jói G., sem gerast svo djarfir að leggja heilan dagskrárlið í þætti sínum „Frá A til J“ undir svokallaðar „Baggalútsfréttir“. Þar stauta þeir sig hikstandi og stamandi gegnum fréttir af vefnum, misþyrma innihaldinu, slátra samhengi og níðast á hinu góða vörumerki Baggalúts.

Hefur Baggalútur nú fengið lögbann á þennan ósóma og fengið það í gegn, eftir tilfinningaþrunginn fund með menntamálaráðherra, útvarpsstjóra og dagskrárstjóra Rásar 2, að þátturinn verði lagður af – með skömm – og að drulluskunkarnir tveir, Atli og Jói, verði gerðir útlægir frá mennta- og menningastofnunum ríkisins um aldur og ævi.

Þessi mynd náðist af þrjótnum úr eftirlitsmyndakerfi í íbúð tengdamóður hans.

Sturlaður Hafnfirðingur réðst á vefsíðu Baggalúts síðdegis í dag.

Maðurinn, sem er þekktur tölvuþrjótur og netníðingur, kom auga á síðuna á tölvuskjá tengdamóður sinnar og missti algerlega stjórn á skapi sínu.

Greip hann nálæga öxi og lét höggin dynja á tölvunni og ýmsum innanstokksmunum, ásamt því að brúka afar ókristilegan munnsöfnuð um ritstjórn Baggalúts, holdafar tengdamóðurinnar og Internetið almennt.

Vefsvæði Baggalúts og tengdamóðirin eru að mestu óskemmd eftir atvikið, en tölvan – sem var af asískri gerð – er gerónýt.

Áhöld til viðamikillar neyslu fundust í kjallara Seðlabankans.

Ónefndur bankaráðsmaður Seðlabankans, er ekki vanhæfur til að sinna verkefnum bankaráðsins þrátt fyrir að hafa hafa skipulagt stórar svall- og mannátsveislur hjá kunnu stórfyrirtæki á útrásartímanum svokallaða.

Þetta segir formaður bankaráðs Seðlabankans, sem segir viðkomandi starfsmann hafa unnið 'drullufínt starf' í bankaráðinu og vill ógjarnan missa hann.

„Þetta er bara eitt af því sem tíðkaðist á þessum árum. Ég held að allir geti verið sammála um að þetta sé ogguponsulítið óheppilegt fyrir viðkomandi – en það er nú engin ástæða til að gera mál úr þessu.“

Áætlað er að um 93% af bílaflota landsmanna sé nú á Reykjanesbrautinni.

Gríðarleg umferð er nú um Reykjanesbraut og hafa langar raðir myndast allt frá Hafnarfirði og að Keflavíkurflugvelli.

Svo virðist sem mikill ótti hafi gripið um sig meðal landsmanna eftir að ljóst var að VG fengi úthlutað nýju innanríkisráðuneyti.

Reynir lögregla eftir fremsta megni að hafa stjórn á mannfjöldanum, en reynist sérstaklega erfitt að hafa hemil á óttaslegnum sjálfstæðismönnum, sem margir hverjir eru gersamlega sturlaðir af hræðslu.

Nú er um að gera að skella sér í messu og setja feitt læk á ritningarlesturinn.

Þjóðkirkjan hefur ákveðið að bregðast við sívaxandi ímyndarvanda sínum með því að aðlaga sig nýrri tækni og auka um leið þjónustu við kirkjugesti.

Hefur svokölluðum like-hnöppum verið komið fyrir við hvert sæti í öllum kirkjum landsins, sem fólk getur smellt á kunni það vel að meta orð prestsins, sálmasöng eða orgelspil.

Hefur nýja kerfið mælst vel fyrir og gefist vel við skírnir, brúðkaup og almennt messuhald – þó eilítið hafi borið á misnotkun þess við jarðarfarir.

Þá hefur hinu úrsérgengna 'ameni' alfarið verið skipt út fyrir hátt og snjallt 'læk!' við messuhald.

Dæmigerður Maríuhani

Lögreglan hefur stöðvað umfangsmikla ræktun á Maríuhana á Suðurlandi. Maríuhaninn þykir mikið lostæti, ýmist reyktur eða bakaður. Hann er hins vegar í útrýmingarhættu, enda er Maríuhaninn sveimhuga og á afar erfitt með að einbeita sér. Þar að auki gengur erfiðlega að rækta stofninn upp sökum ofsókna hinna ýmsu yfirvalda.

Forsvarsemenn ræktunarinnar héldu því fram að um misskilning væri að ræða og að ræktunin væri lögleg. Lögreglan tók hins vegar ekki mark á því og lét umsvifalaust fella allan stofninn.

Úrræðið þykir í senn stílhreint og smekklegt.

Ríkisstjórnin kynnti i morgun nýtt úrræði fyrir skulduga einstaklinga og heimili; skuldagreiðslujöfnunaraðlögun.

Ekki er vitað hvernig úrræðið virkar, né fyrir hverja það er nákvæmlega - en vonast er til að það komi til með að nýtast sem flestum.

Páll verður framvegis í harðlæstri dagskrá eftir miðnætti á miðvikudögum.

Stöð 2 hefur tryggt sér útsendingarrétt á Páli Magnússyni, útvarpsstjóra.

Þetta kemur fram í tilkynningu frá Stöð 2, undirritaðri af Ara Edwald, að meðfylgjandi litlum broskalli og alþjóðlegu gleðiupphrópuninni 'LOL'.

Er þetta enn eitt áfallið fyrir RÚV á skömmum tíma, en samkvæmt heimildum Baggalúts eru líkur á að fleiri fastir dagskrárliðir fylgi í kjölfarið á næstu dögum – þ.á.m. táknmálsfréttir, Kastljós, auglýsingar og hin sívinsælu dagskrárlok.

Það er þó huggun harmi gegn að RÚV mun hafa tryggt sér útsendingar á Wallander til ársloka 2052.

Myndin tengist fréttinni ekki – þannig lagað.

Samkvæmt áreiðanlegum heimildum Baggalúts stendur til að stokka ærlega upp í rikisstjórn Jóhönnu Sigurðardóttur.

Í stuttu símaviðtali við Jóhönnu seint í nótt kom ýmislegt fróðlegt í ljós. Æringinn og 'flippmógúllinn' Ögmundur Jónasson mun 'koma ferskur inn í innanríkissjittið' um leið og utanþingsráðherrarnir Ragna 'Gothmálagella' og Gylfi 'partípúpa' Magnússon víkja.

Þá mun Álfheiður Ingadóttir, sem hefur að sögn Jóhönnu verið 'frámunalega þurr og leiðinleg í staffapartíum' víkja fyrir nýjum stuðmálaráðherra – Gutta 'Glitter'.

Ný og öflug loftnet á lóð fyrirtækisins tryggja að útsendingar Baggalúts munu nást á Vestfjörðum í vetur.

Samningar hafa náðst um endurfjármögnun og áframhaldandi starfsemi útgáfu- og afþreyingarrisans Baggalúts. Ljóst er að starfsemin verður áfram á Internetinu, en um tíma var útlit fyrir að hún yrði flutt alfarið yfir á textavarpið.

Meðal nýjunga á þessu 10. starfsári Baggalúts má nefna grímulausan áróður sem við kjósum að kalla BMX – Gallsteina, stórkostlega endurbætt útlit, sem hannað er af nemendum hannyrða- og fágunarskóla Sigþrúðar í Grafarholti – auk þess sem sérstakt tillit er tekið til farsímaunnenda, sem geta nú notið lystisemda Baggalúts á m.baggalutur.is.

Að gefnu tilefni skal þó tekið fram að Randver verður ekki með að þessu sinni.