'Kókaín'

"Ég held að hér sé engin hætta á ferðum, hér er um sárasaklaust efni sem notað er við stífluðu nefi. Viðbrögð lögreglunnar vil ég þó ekki setja út á, þau eru skiljanleg og eðlileg miðað við það andrúmsloft sem við nú búum við," segir Pablo Escobar, dreifingarstjóri "Kókaínsamtaka Kólumbíu" (KK), en lögreglan hefur hvatt fólk, sem fær sent svonefnt "Kókaín", að sýna fyllstu aðgæslu. Innpakkað umslag, sem barst á Vog, hafði að geyma torkennilegt hvítt duft, sem sagt var að hugsanlega kynni að innhalda miltisbrandsgró. Lögreglan segir að í ljósi atburða síðustu daga sé ástæða til að taka á málinu af fullri alvöru þar til annað kemur í ljós.

"Þetta er eðlilegur ótti miðað við það sem átt hefur sér stað. Alls sendum við út 900.000 kíló í viku hverri en í aðeins 9 tilvikum hefur fólk kvartað, að meðtöldu atvikinu í Reykjavík. Við hvetjum alla sem eitthvað óttast til að leita til læknis, en ég ítreka að efnið í umslögunum er sárasaklaust, það hefur m.a. verið staðfest með rannsókn spænsku lögreglunnar, þeir voru bara mjög hressir með þetta" sagði Escobar og hló.

Guðni var tilbúinn að leggja nokkuð á sig til að fá hlutverkið

Aðdáendur Guðna Ágústsonar, landbúnaðarstjörnu, urðu trúlega fyrir vonbrigðum á dögunum þegar tilkynnt var að hann kæmi ekki til greina sem næsti Bond.

Framleiðendur myndarinnar gáfu frá sér yfirlýsinguna þegar þær raddir urðu æ háværari að Guðni myndi feta í fótspor ekki ómerkari manna en Sean Connery, Roger Moore og Woody Allen.

Guðni hefur verið næstum jafn þekktur fyrir fagurt útlit sitt og limaburð og afrek á stjórnmálasviðinu.

Guðni fór með lítið hlutverk í kvikmyndinni 'Muppets take Manhattan' ásamt því að hafa reynt fyrir sér sem fyrirsæta.

Tónlistaskólakennarar við stjórnarráðið í morgun

Mikill fjöldi kennara safnaðist saman við stjórnarráðið í morgun til að mótmæla launakjörum sínum. Voru flestir mótmælendanna gráir fyrir járnum og höfðu í hótunum við vegfarendur.

"Mér stóð ekki á sama þar sem ég beið á ljósunum í Bankastrætinu." sagði Mörteinn Sigurðsson, leigubílstjóri. "Þeir voru næstum búnir að velta bílnum hjá mér, helvítis ræflarnir."

Kennararnir hafa meðal annars hótað að senda hóp forskólabarna niður í stjórnarráð með blokkflautur verði ekki tafarlaust komið til móts við kröfur þeirra.

Neðanjarðarlestin sem fannst í kjallara Smáralindar

Skömmu fyrir hádegi fann starfsmaður á ræstisviði Smáralindar í Kópavogi, Jón Selfeld, leynilega brautarstöð í kjallara byggingarinnar.

Svo virðist sem hér sé fundinn samgönguæð ætluð forréttindahópum á Íslandi. Hefur nú verið upplýst að átta aðrar stöðvar eru faldar neðanjarðar á víð og dreif um Reykjavík og nágrenni, þ.á.m. við Alþingishúsið, Bessastaði, vínbúðina Heiðrúnu, Keflavíkurflugvöll, McDonalds í Skeifunni, Kaffibarinn og Mótel Venus í Borgarfirði.

Svo virðist sem frammámenn í þjóðfélaginu, og hluti af hinu svokallaða "þotuliði", hafi nýtt sér þessa samgönguleið óspart undanfarin ár til að komast hratt og örugglega milli staða.

Ekki er laust við að reiði gæti meðal almennra borgara í garð yfirvalda: "...svo sitjum við hin föst í Smáranum marga klukkutíma á dag meðan þetta lið brunar um neðanjarðar", sagði Jón Selfeld gráti nær, en hann er enn að jafna sig á því áfalli sem hann varð fyrir við fundinn.

Sylvía stolt með sigurlaunin.

Sylvía Wiium sló eigið Íslandsmet frá árinu 1979 í keppasaumi á landsmóti sláturfélaganna nú um helgina. Þetta er í 45. sinn í röð sem Sylvía hampar titlinum og hefur hún að eigin sögn aldrei verið í betra formi.

Bergur Hróðmarsson stigavörður segist aldrei hafa séð annað eins og „er hún vel að titlinum komin - hún er vandvirk, örugg og geysilega hraðvirkur saumari - gædd hreinni snilligáfu.“

Bára Bergdal, sem hefur veitt Sylvíu harða keppni undanfarin 36 ár lenti í öðru sæti og var að vonum vonsvikin: „Vissulega eru þetta vonbrigði, en því verður ekki neitað að Sylvía er séní þega kemur að keppasaumi. En mér finnst tímabært að hún leggi nálina á hilluna - það er ekki verra að hætta á toppnum.“

Sylvía mun keppa fyrir Íslands hönd á heimsmeistaramótinu sem fram fer í Skotlandi í nóvember, en hún er í 6. sæti á styrkleikalista alþjóða íþróttasambandsins.

Færeyskir landgönguliðar í Þórshöfn í gær

Færeyingar héldu í nótt áfram gegndarlausum loftárásum sínum á suð-austurströnd Íslands. Að sögn talsmanns þeirra, Oyvind Thordal, munu árásirnar standa yfir þar til Íslendingar framselja tónlistarmanninn Paul Young, sem sakaður er um að hafa eyðilagt tugi tonna af skerpukjöti snemma í síðasta mánuði. Young hefur verið í felum á Skeiðarársandi síðustu árin eða síðan frægðarsól hans tók að dvína seint á 9. áratugnum.

Færeyingar ráða yfir her sérþjálfaðra lunda sem að sögn Hilmars Th. Blandon, íbúa á Höfn - „...eru að kaffæra okkur í skít!“.

Ríkisstjórn Íslands neitar alfarið að tjá sig um málið að svo stöddu, en heimildarmenn Baggalúts telja að Íslendingar séu vel undir það búnir að fara í hart við landher Færeyinga ef til átaka kemur.

„Paul er drengur góður og á betra skilið...“, sagði talsmaður utanríkisráðuneytisins, sem ekki vill láta nafn síns getið.

Davíð kynnir undratækið

Davíð Oddsson forsætisráðherra kynnti í dag nýjan búnað á landsfundi sjálfstæðisflokksins, sem vísindamenn innan flokksins hafa þróað. Búnaður þessi skannar mál ræðumanns og varpar viðeigandi klisjum á tjald.

Á myndinni hér að ofan má einmitt sjá búnaðinn að störfum þar sem ráðherra talaði um efnahagsmál. Búnaðurinn, sem hlotið hefur nafnið Klisjubirtir, stakk umsvifalaust upp á orðinu „tækifæri“ þegar talið barst að slöku gengi krónunnar og verðbólgu. „Þessi búnaður er nauðsynlegur öllum stjórnmálamönnum þar sem hann umorðar tal ræðumanns og birtir 'klisjur' eða 'slagorð' sem endurspegla þann skilning sem líklegt er að áheyrendur vilji leggja í orð hans, formannsins í þessu tilfelli.“ Sagði Einar Thors, uppfinningastjóri Sjálfstæðisflokksins.

Búist er við að búnaðurinn verði markaðssettur erlendis á næstunni.

Geir Sveinsson í ham gegn dönum

Íslendingar burstuðu Dani 6-0 í frábærum knattspyrnuleik í Kaupmannahöfn á laugardaginn. Að öðrum ólöstuðum má segja að Geir Sveinsson hafi verið maður leiksins enda skoraði hann alls ellefu mörk, þó fimm þeirra hafi verið dæmd ógild. Mikill fjöldi Íslendinga var á leiknum og sagði Atli Mikson, Landsliðsþjálfari, að stuðningurinn hafi í raun gert útslagið. "Við fundum fyrir gífurlegum stuðningi, sérstaklega eftir að Guðni skoraði áttunda markið. Ég er frekar ánægður með sigurinn en betur má ef duga skal". Næst tekur landsliðið á móti liði Falklandseyja, hvernig leggst leikurinn sá í þjálfarann? "Þetta verður geysierfiður leikur og ég vona bara að Stefán Jón verði í góðu formi, en hann hefur jú verið meiddur. Eins er alltaf erfitt þegar lykilmenn eins og Gunnar Þórðarson eru fjarri góðu gamni".

Marteinn hefur sagt af sér

Marteinn Ólafsson, landsliðsþjálfari Íslands í knattspyrnu boðaði til blaðamannafundar í morgun til að tilkynna um afsögn sína. Ástæðan mun vera afar gott gengi liðsins að undanförnu og ber þar helst að nefna frækinn sigur á Dönum 6-0 síðastliðinn laugardag. "Markmiðið var alltaf að lækka okkur um styrkleikaflokk, en það er nú ljóst að því markmiði verður ekki náð. Þetta eru gífurleg vonbrigði fyrir mig og ég kaus því að láta af störfum". Störf þjálfarans hafa verið harðlega gagnrýnd eftir að hann valdi hinn unga og efnilega Guðna Bergsson í liðið, en Guðni leiddi einmitt strákana til frækins sigurs á Norður-Írum, 3-0 um daginn. Marteinn vildi taka það fram að hann einn bæri ábyrgð á árangri liðsins : "Það er ekki hægt að skamma strákana fyrir þetta".

Árni Johnsen, tónlistarmaður, hefur játað að hafa keypt um 12.000 lítra af Coca Cola, í þeim tilgangi að sópa að sér vinningum í sumarleik Vífilfells, á kostnað Landafundanefndar. Árni var sérlegur ráðgjafi nefndarinnar og gjaldkeri á árunum 1998-2001. Öll árin keypti hann þúsundir lítra af Coca Cola út á beiðnir frá Hafrannsóknastofnuninni, til greiðslu frá Landafundanefnd. Árni mun einnig hafa leyst út skilagjald fyrir flöskurnar, alls um 300.000 kr. Ríkislögreglustjóraembættið rannsakar nú ábendingar um Happaþrennukaup Árna og mögulega þátttöku í happatappaleik Ölgerðarinnar.

Orsök veðurofsans?

Alþjóðaveðurfræðistofnunin (IMI)hefur í samstarfi við Alþjóðahafrannsóknaráðið (ICES)kynnt niðurstöður þrotlausra rannsókna margra helstu vísindamanna heims á sviði veðurfræði, haffræði, sjávarspendýrafræði, líffræði og stærðfræði, sem beindust að orsökum fellibylja. Niðurstöðurnar koma fæstum á óvart: Helsti orsakavaldur fellibylja er nefnilega hvalveiðar, eins og menn hafa talið öldum saman. Thure Vaktlukt, forseti IMI, segir að við hvalveiðar fari í gang ákveðið ferli sem aftur veldur fellibyljum. "Segjum sem svo að veiddar séu 1000 langreyðar í Atlantshafinu öllu, það hefur gífurleg áhrif á yfirborðshæð sjávar og seltu, þar sem stórt hlutfall seltu er sviti frá slíkum skepnum. Einnig lækkar hitastig sjávar við brotthvarf svo heitfengra dýra sem hvala. Þessir þættir, og fleiri, koma af stað keðjuverkun sem endar með fellibyljum". Ekki er vitað hvaða áhrif niðurstöðurnar hafa á fyrirhugaðar hvalveiðar Íslendinga, en sjávarútvegsráðherra sagðist aðspurður ekki hafa miklar áhyggjur af því þótt "fólk suður í rassgati þurfi að hneppa að sér annað slagið".