Insol er þenkjandi maður með djúpan skilning á nýal

Tónlistarmaðurinn Insol hefur gert tímamótasamning við útgáfufélagið EMI í Bandaríkjunum um útgáfu á nýjustu breiðskífu hans, Flower of Pain, sem m.a. inniheldur lagið "When will an official star-connection-base rise here in Iceland?" Verkið kemur út í 18 löndum víðsvegar um heiminn og verður því fylgt eftir með hljómleikaferð "Insol 2002 Rainbow tour", sem hefst í heimabæ listamannsins, Seljavík, snemma á næsta ári.

Björn er laginn við að klippa á borða

Björn Bjarnason menntamálaráðherra opnaði í nótt formlega nýtt tónlistarhús. Nýbyggingin er hin fyrsta af átta "óvæntum" húsum sem ráðgert er að reisa um allt land í vetur og gera áætlanir ráð fyrir að önnur byggingin rísi á næstu dögum - þó enn sé ekki vitað hvar. Með tilkomu nýju byggingarinnar margfaldast stærð húsnæðis Tónlistarskóla Reykjavíkur og fer úr 50 fermetrum í 8 þúsund fermetra.

Fram kemur á heimasíðu skólans, að fjöldi stúdenta hafi meira en þrefaldast á þeim áratugum sem skólinn hafi verið starfræktur. Við stofnun skólans voru stúdentar um 4, en nú haustið 2001 var fjöldi þeirra sem hófu nám um 12.

"Það er bara svo gaman að sjá svipinn á þeim," sagði Björn í samtali við Baggalút: "Við erum búnir að halda þessu leyndu fyrir tónlistarfólki og þóst ekkert ætla að gera í málunum. Svo bara skellum við þessu upp á nokkrum dögum - þetta er alveg magnað," sagði Björn ennfremur og bætti við að erfiðast hefði verið að halda þessu leyndu fyrir konunni sinni - "...en það var svo sannarlega þess virði."

Númi er fyrir miðri mynd (rauð ör)

Hinn geðþekki fræði- og hugsjóna-maður, Dr. Númi Fannsker, tók um helgina þátt í mótmælagöngu Alþjóðasjúkra-liðafélagsins, sem gengin var í Punjab í Indlandi. Birtist af þessu tilefni meðfylgjandi mynd af honum á forsíðu Punjab Weekly, fréttablaðsins. Mun þetta vera í fyrsta sinn sem mynd birtist af Íslendingi á forsíðu jafnvíðlesins tímarits! Baggalútur er afar stoltur af Núma, sem er einn af frumkvöðlum íslenskrar nútímamenningar og starfsmaður Baggalúts til margra ára. Númi var staddur í Punjab ásamt formanni sjúkraliðafélagsins, Kristínu Á. Guðmundsdóttur og Ögmundi Jónassyni, þingmanni, til að mótmæla kjörum íslenskra sjúkraliða og þeirri meðferð sem þeir sæta hjá samninganefnd ríkisins þessa dagana. Ögmundur sagðist sannfærður um að fundur þessi skilaði miklu í baráttu Sjúkraliðafélagsins. Ferðin var greidd af ríkissjóði. -NF

Perlan mun án efa sóma sér betur annars staðar

Stjórn Orkuveitu Reykjavíkur samþykkti á fundi sínum í morgun að selja Perluna, sem nú stendur á Öskjuhlíð, úr landi.

"...við erum bara orðnir leiðir á henni, svo einfalt er það - auk þess er maturinn þar ekkert spes og útsýnið svona lala," sagði Tumi Theodórsson, formaður árshátíðarnefndar O.R.

Ekki er enn ljóst hvert Perlan fer, en geimvísindastofnun Bandaríkjanna, NASA, mun hafa sýnt byggingunni mikinn áhuga og eins alþjóðlegt samtök áhugamanna um astrófýsísk fræði og gjörkosmískar megineigindir (FARAN).

"Auðvitað eiga einhverjir eftir að sakna kofans, ég veit að Davíð Oddsson er pínu spældur, en það er annað hvort þetta eða að ganga í hús og selja klósettpappír - fólk getur svo alltaf farið bara í keilu í staðinn, þar er líka meira skjól," sagði Tumi að lokum.

Huppa má vara sig á næstunni

Öryggisgæsla hefur verið hert við kýr á suðurlandi eftir að fréttir bárust um áform færeyskra hryðjuverkamanna um að beita eina þeirra kynferðisofbeldi. Grani Davíðsson, bóndi á Neðri-Skolti, sagði í gærkvöldi að sýslumaður hefði fengið "trúverðuga hótun" um að reynt verði yfir helgina að leita á búfénað á Hellu, Hvolsvelli eða Kirkjubæjarklaustri.

"Besti viðbúnaðurinn er að láta hryðjuverkamennina vita, að við vitum hvað þeir ætlast fyrir. Við erum viðbúnir. Þetta mun ekki takast," sagði Grani hróðugur á blaðamannafundi í gær.

Talsmaður Sólveigar Pétursdóttur dómsmálaráðherra sagði að hótunin væri óstaðfest og ekki eins trúverðug og sú sem leiddi til allsherjarviðvörunar fyrr í vikunni, en hún var byggð á hótun sem beindist aðallega að kindum.

Grani sagði að hótunin beindist að Skjöldu á Hellu, Klöru á Hvolsvelli og verðlaunatarfinum Bola á Kirkjubæjarklaustri.

Sharon og Khatami í góðum gír við athöfnina

Það kom nokkuð á óvart þegar Ariel Sharon, forsætisráðherra Ísraels, tilkynnti samstarfsfólki sínu nú um hádegið að hann hefði tekið múhameðstrú og segði hér með starfi sínu lausu.

Svo virðist sem Sharon hafi fyrir tilviljun lent í gleðskap hjá gömlum félaga sínum, Mohammad Khatami, forseta Írans, sem hafi endað með því að Sharon sneri til íslamstrúar. "...í einhverju flippi." eins og hann orðaði það í samtali við fréttaritara Baggalúts í Tel Aviv.

"Æ, ég var líka orðinn hálf leiður á öllu þessu veseni - arabarnir, vinir mínir, voru orðnir hálf pirraðir á mér - held ég. Þetta er búið að vera vanþakklátt starf, og ég vil miklu frekar geta einbeitt mér að því sem ég hef raunverulegan áhuga á - en það eru kamelkappreiðar," sagði fráfarandi forsætisráðherra Ísraels, Ariel Sharon, að lokum og hagræddi vefjarahettinum.

Jerry 'the knife' Blerm, formaður dómnefndar

Tónlistarmaðurinn Árni Johnsen hefur verið valinn “bófi ársins” hjá alþjóðasamtökum bófa og svikahrappa (International Organisation of active crooks and swindlers). Árni tók á móti viðurkenningu af þessu tilefni í gærkveldi í hinu fræga Sing Sing fangelsi í Bandaríkjunum. Jeremy Fjodor Blerm, formaður dómnefndar sagði Árna hafa borið höfuð og herðar yfir aðra sem voru tilnefndir: “Þarna voru menn eins og Gordon Tweed, peningafalsari og Ohmar Ghandi fjárglæframaður, þessir kallar áttu bara ekkert í Árna sem hefur svo sannarlega komið Íslandi á kortið í “geiranum”. Okkar félagsmenn eru farnir að líta mun meira til Íslands í leit að góðum bófum og svindlurum og nú þegar eru fjölmargir Íslendingar í vinnu hjá samtökum eins og Cosa Nostra á Ítalíu og Halta drekanum í Kína.” Árni þakkaði fyrir sig í ræðu þar sem hann sagði meðal annars að án íslensku þjóðarinnar hefði þetta aldrei verið hægt og “...í raun er mér til efs að nokkur þjóð önnur hefði gefið manni eins og mér tækifæri til að láta að sér kveða á þessum vettvangi...”.

Bræðurnir eru ávallt viðbúnir

Hinir landsfrægu bræður Hilmar og Þormar Valdimarssynir, rjúpnaskyttur og bændur frá Glufu á Hnefaheiði syðri, hafa tekið í notkun nýstárlegan búnað við skotveiðar. Búnaðinn keyptu þeir félagar í bændaferð til Kína, þar sem hann var boðinn til sölu á markaði á hinu þekkta Torgi hins himneska friðar. "Þeir voru að selja einhverja afganga þarna og við Himmi bróðir sáum að þetta gæti nýst vel á skytteríinu. Við keyptum þessvegna nokkrar svona byssur og slatta af hylkjum", sagði Þormar. Búnaðurinn skýtur svokölluðu táragasi yfir bráðina og tapar hún af því sjón og áttum. Veiðimaðurinn er búinn sérstakri (gas)grímu sem hann hylur vit sín með og gerir hún honum kleift að skjóta bráðina af nokkurri nákvæmni, í þessu tilfelli með sjálfvirkri Uzi vélbyssu, en slíkan búnað keyptu þeir bræður á ferðum sínum í Ísrael á dögunum.

Nýji sauðailmurinn

Framleiðsla er að hefjast á íslensku ilmvatni og rakspíra sem kallast True Sheep. Það er fyrirtækið Hross sf. í Gilsfirði sem framleiðir True Sheep en það er í eigu hjónanna Eyleifs Aspelunds tamningamanns og Hallvörðu Bauksdóttur.

Eyleifur hefur hannað umbúðirnar sem eru í líki sviðahauss og hefur undirbúningur staðið í rúman mánuð. Flöskurnar eru framleiddar á Krít, en innihaldið er hins vegar ættað úr nálægum fjárhúsum og er blandað hjá Glundri hf.

"Þetta er svona aðeins til að gefa útlendingum innsýn í þann lyktarveruleika sem við íslenskir bændur búum við dags daglega. Ég hef trú á því að þetta eigi eftir að njóta mikilla vinsælda, enda um sterkan, karakterríkan ilm að ræða.," sagði Eyleifur í samtali við Baggalút.

John Lennon

Ingibjörg Gísladóttir, borgarstjóri, afhjúpaði í morgun minnismerki um bítilinn John Lennon, sem lést af slysförum árið 1980. Styttan er frá árinu 1982 og er eftir rússneska myndhöggvarann Igor Kranokoff.

”Ég rakst á þessa glæsilegu styttu af Lennon á internetinu, þar sem hún var boðin til sölu ásamt allskyns glingri. Rússar eru fátæk þjóð sem er tilbúin að selja þær gersemar sem ríkislistamenn Sóvétríkjanna sköpuðu á dögum kalda stríðsins. Ég get alveg upplýst það hér að styttan kostaði 2.800 kr. að undanskildum flutningskostnaði, sem er gjafaverð”, sagði innkaupastjóri Reykjavíkurborgar, Júrí Vladimírsson.

Borgarstjóri afhjúpaði minnismerkið í Hljómskálagarðinum í morgun og sagði við það tilefni að Reykjavík væri sannarlega borg alheimsmenningar og að hún væri stolt af þessari glæsilegu styttu af einum merkasta tónlistarmanni sögunnar. Styttunni var fundinn staður við hlið styttunnar af Jónasi Hallgrímssyni skáldi, sem varð fyrir voðaskoti í Osló árið 1845.

Íslandsvinurinn don Gianluigi

Hagsmunaráð borgarinnar Palermo á Sikiley, Interesti Nostri, hefur ákveðið að láta myrða íslenska blaðamanninn Fárnýju Nönnu Diðryksdóttur fyrir grein sem hún skrifaði eftir heimsókn til Palermo. Samkvæmt upplýsingum forstöðumanns ráðsins, Don Gianluigi Sampiero, verður Álfheiður Hanna drepin fyrir grein sem hún skrifaði eftir tólf daga dvöl í Palermo og birt var í Morgunblaðinu en í greininni þykir henni hafa tekist að draga upp mjög sanna mynd af íbúum og menningu Palermo. "Hún veit hreinlega of mikið", sagði Don Gianluigi sposkur á svip. "Við höfum rætt við íslenska sendiráðið og þar á bæ fullvissuðu menn okkur um að þetta mun ekki valda neinum brestum í milliríkjsamstarfinu", bætti hann við og saug upp í nefið.

Fárný Nanna verður líflátin við hátíðlega athöfn í fornu klaustri í Palermo 17. nóvember. Fyrr um kvöldið mun hún halda banjótónleika á vegum stofnunarinnar Arte' Muerta.