Moðbingur er elstur sona Grýlu og fyrri eiginmanns hennar, Bola. Hann tók ungur upp á því að hnupla sér moði til að troða í pípu sína og reykja, en neitar því að það sé nokkurs konar fíkn.

Moðbingur kemur nú til byggða í fyrsta skipti í 69 ár, eða síðan hann fór á uppfærslu Þjóðleikhússins á Hamlet árið 1934. Þar olli hann miklum usla þegar hann í hléi rauk upp á svið og "bjargaði" Ófelíu frá drukknun.

Moðbingur er rómaður moðhaus og telur t.d. að einkavæða beri sólkerfið, að strætisvagnar séu leynilegar tilraunastofur fyrir SÍS og að Elvis hafi verið til í raun og veru í "útlöndum". Þá þykir honum merkilegt að kaþólikkar séu sífellt að tönnlast á orðunum "moð er meri" - og þakkar það sínum eigin áhrifum.

Um Moðbing var einhverju sinni ort:

Moðbingur var moðhaus
meinlítið grey
í útihúsin álpaðist
og át bóndans hey

í súrhey var hann sólginn
og sótti stíft í það
fannst að auki fásinna
að fara í bað

Eins og nafnið gefur til kynna er Moðbingur flokksbundinn framsóknarmaður og því er fólki bent á að gæta ítrustu varúðar rekist það á hann á förnum vegi.