Ég heyrði ekki betur en hún hafi verið flutt í heild sinni, nótu fyrir nótu framan og aftan við Alþingishúsið í gær. Það voru kannski ögn færri skaftpottar og aðeins fleiri egg en ég skrifaði út. En samt – grunsamlega líkt.
Það á að heita: Hólíkrapp! í e-moll
Hvernig dirfast þessir aumu peningamenn að stinga upp á slíkum helgispjöllum? Þegar ég segi að eitthvað skuli leikið á 20 tundurdufl, uppstoppaðan pandabjörn og hljómandi flugmóðurskip – þá er það bara þannig!
Er að spá í að útsetja það fyrir tvær baujur, rafmagnstannbursta og hænsnakór.
Ég hef verið hafður að ginningarfífli! Verið fíflaður og prettaður! Er búinn að vera í frábæru gerkosmísku sambandi við lífveru sem ég þóttist sannlega sannfærður um að væri af annarri lífstjörnu, svo langt frá öllum okkar veruleika var hún í hugsun og hátterni. Svo reyndist þetta bara vera einhver skrifstofublók úr einni skilanefndinni.
Ég hefi gert stórkostlega uppgötvun. Svo virðist sem stór hluti þeirra sem komu á einhvern hátt að hruninu búi í annarri tilvistarvídd en þorri almennings, vídd þar sem önnur lögmál og viðmið ríkja en við eigum að venjast. Ef rétt reynist eru þetta stórkostleg gerkosmísk tíðendi. Nú þarf ég einungis að ná þessum mönnum og kryfja þá.
Vér erum geymd í geimi
geimverur, að sönnu.
Ein í eigin heimi
með allt á vorri könnu.